Kwenda na mambu ke na kati

Kwenda na tansi ya malongi

 KITINI 3

Mutindu ya Kuyidika Makambu

Mutindu ya Kuyidika Makambu

“Beno zolana ngolo, sambu zola ke fikaka masumu mingi.”—1 Piere 4:8

Sambu nge ti nkwelani na nge ke yantika luzingu ya mpa, mambu mingi ta basika. Mambu yango lenda basika na mutindu konso muntu ke yindula, ke kudiwa mpi ke tadila luzingu. Mambu ya nkaka lenda katuka na nganda mpi na mambu ya kukonda kukana.

Nge lenda tula ntembe nde mambu yai ta salama ve, kansi Biblia ke longisila beto nde beto ta kutana ti bampasi. (Matayo 5:23, 24) Beno ta manisa mavwanga kana beno ke sadila minsiku ya Biblia.

 1 BENO TADILA MAKAMBU

MAMBU YINA BIBLIA KE TUBAKA: “Kele ti . . . ntangu sambu na kutuba.” (Longi 3:1, 7NW) Zikisa nde beno ke lutisa ntangu sambu na kutubila mambu ya beno ke kutana ti yo. Zabisa nkwelani na nge na masonga yonso mutindu nge ke kudiwa mpi mambu ya nge ke yindula na diambu yango. Konso ntangu ‘tuba kieleka’ na nkwelani na nge. (Baefezo 4:25) Ata nge me wa makasi nki mutindu, kunwanisa ve nkwelani na nge. Mvutu ya pima lenda sala nde mambu ya fioti kubasisa ve kunwana.—Bingana 15:4; 26:20.

Ata beno ke wakana ve, vanda mawete mpi kuvila ve na kumonisila nkwelani na nge zola mpi luzitu. (Bakolosai 4:6) Sala ngolo na kumanisa mavwanga kukonda kusukinina mpi beno yambula ve kusolula.—Baefezo 4:26.

MAMBU YA NGE LENDA SALA:

  • Pona ntangu ya mbote sambu na kutadila makambu

  • Kana yo me kuma ntangu na nge ya kuwidikila, kuzenga ve nkwelani na nge ndinga. Kinga mpi ntangu na nge sambu na kutuba

 2 WIDIKILA MPI BAKISA MAMBU

MAMBU YINA BIBLIA KE TUBAKA: “Beno zolana ngolo. Na yina me tala kupesa bankaka lukumu, beno vanda bantu ya ntete.” (Baroma 12:10) Mutindu yina nge ke widikila nkwelani na nge kele mfunu mingi. Sala ngolo na kubakisa mabanza ya nkwelani na nge mpi “monisa kikalulu ya kuditula na kisika [na yandi] . . ., mpi kudikulumusa.” (1 Piere 3:8; Yakobo 1:19) Kusala ve bonso nde nge ke wa. Kana mpila kele, yambula kima yina nge ke sala mpi tudila nkwelani na nge dikebi ya mingi to lomba yandi kana beno lenda tadila diambu yango na nima. Kana nge ke baka nkwelani na nge bonso nduku kansi ve bonso mbeni, nge ta ‘wila yandi makasi nswalu-nswalu ve.’—Longi 7:9.

MAMBU YA NGE LENDA SALA:

  • Landa na kuwidikila ti mabanza ya mbote, ata mambu yina yandi ke tuba ke sepedisa nge ve

  • Bakisa nsangu yina me bumbana na bangogo na yandi. Tula dikebi na bidimbu ya nitu na yandi mpi ya mungungu ya ndinga na yandi

3 BENO LUNGISA MAMBU YINA BENO KE WAKANA

MAMBU YINA BIBLIA KE TUBAKA: “Lufutu ke vandaka na kisalu ya ngolo ya mitindu yonso, kansi kutuba ya mpamba ke nataka na kinsukami.” (Bingana 14:23NW) Kuwakana mbote na diambu mosi me fwana ve. Kansi beno fwete lungisa mambu yina beno zole me wakana. Yo lenda lomba kusala bikesa ya mingi, kansi bikesa ya beno ta sala ta vanda mfunu. (Bingana 10:4) Kana beno ke sala mambu na kimvuka, beno ta baka “matabisi ya mbote” sambu na kisalu na beno ya ngolo.—Longi 4:9NW.

MAMBU YA NGE LENDA SALA:

  • Beno wakana mambu yina konso muntu lenda sala sambu na kumanisa mavwanga

  • Beno zikisa mbala na mbala kana beno ke kwenda na ntwala