“FIKIEME o rọ via kẹ omẹ? Fikieme Ọghẹnẹ ọ rọ kuvẹ nọ oware utiona o via kẹ omẹ?” Enana yọ enọ nọ Sidnei nọ ọ rrọ obọ Brazil ọ nọ evaọ okenọ ọ jọ ikpe 24. Sidnei ọ nwa oma evaọ okenọ ọ jẹ zaharo evaọ ame, o te zihe ruọ ọmo.

Nọ ahwo a tẹ be ruẹ uye fiki ẹyao, asidẹnte, ohwo rai nọ o whu, okpẹtu nọ a r’obọ so ho, hayo fiki ẹmo, a rẹ fo Ọghẹnẹ. Ere o rrọ no anwae ze. Ikpokpoma buobu i te Job ọzae ẹrọwọ na unọjọ utọjọ. Ọ tẹ jẹ rọ fiki orithọ fo Ọghẹnẹ, inọ: “Me bo se owhẹ, whọ kẹ omẹ uyo ovo ho; me dikihẹ aro dede re mẹ ta ẹme, rekọ whọ kezọ mẹ hẹ. Who kurẹriẹ mukpahe omẹ, ẹgba obọ ra who bi ro kpokpo omẹ.”—Job 30:20, 21.

Job ọ riẹ obonọ ebẹbẹ riẹ i je noze he, hayo oware nọ a rọ kẹ ae uvẹ re e via kẹe. Rekọ nẹnẹ na, Ebaibol na ọ vuẹ omai oware nọ o be wha uye-oruẹ ze, gbe oghẹrẹ nọ ma re rri ebẹbẹ mai.

Ebaibol na ọ ta kpahe Ọghẹnẹ nọ: “Iruo riẹ i kiete, keme idhere riẹ kpobi i re wowoma. Ọghẹnẹ ọtẹruo nọ ọ kare eyoma, nọ o re wowoma je kiete.” (Iziewariẹ 32:4) O tẹ rrọ ere, kọ o rrọ oware areghẹ re Ọghẹnẹ nọ ọ rrọ “wowoma je kiete” na, ọ ma ahwo re a ruẹ uye, hayo re ọ rọ uye-oruẹ lahiẹ ahwo?

O rrọ ere vievie he, keme Ebaibol na ọ ta nọ: “Nọ odawọ u te te ohwo, jọ ọ ta ha inọ: ‘Ọghẹnẹ ọ be dawo omẹ.’ Keme a sae rọ eware imuomu rọ dawo Ọghẹnẹ hẹ, yọ ọyomariẹ ọ rẹ rehọ eware itieye dawo ohwo ọvo ho.” (Jemis 1:13) Ma tube wuhrẹ no Ebaibol na ze nọ evaọ emuhọ, Ọghẹnẹ ọ ma ahwo-akpọ re a reawere uzuazọ. Ọ kẹ Adamu avọ Ivi ahwo ọsosuọ na emamọ oria nọ a rẹ rria, eware kpobi nọ a gwọlọ evaọ uzuazọ, gbe emamọ iruo nọ a re ru. Ọghẹnẹ ọ tẹ ta kẹ ae nọ: “Wha yẹ, wha vi, re wha vọ evaọ akpọ na re wha wo i.” Adamu avọ Ivi a wo ẹjiroro ọvo nọ a rẹ rọ fo Ọghẹnẹ hẹ.—Emuhọ 1:28.

Rekọ uzuazọ nọ ma be rria nẹnẹ na u wo ohẹriẹ no onọ Ọghẹnẹ ọ jiroro riẹ. Evaọ uzẹme, u kri no nọ ahwo-akpọ a be rọ ruẹ uye. Uyero mai o nwane rọwokugbe epanọ Ebaibol na o dhesẹ i rie inọ: “Emama kpobi a bi dimẹ jẹ be ruẹ uye edada kugbe rite enẹna.” (Ahwo Rom 8:22) Eme ọ wha uye-oruẹ ze?

Re ma sae wo otoriẹ oware nọ uye-oruẹ o rrọ da akpọ na fia, joma roro kpemu kpohọ okenọ uye-oruẹ u ro muhọ. Fiki eviẹhọ ukọ-odhiwu ọwọsuọ nọ a se Setan Ẹdhọ na, Adamu avọ Ivi a tẹ ghẹmeeyo kẹ Ọghẹnẹ jẹ la vrẹ uzi nọ Ọghẹnẹ o je kẹ ai inọ a re “ure ẹriẹ ewoma gbe eyoma na ha.” Ẹdhọ ọ tẹ ta kẹ Ivi nọ a ti whu hu otẹrọnọ a ghẹmeeyo kẹ Ọghẹnẹ, ọ tẹ rọ ere se Ọghẹnẹ ọtọrue. Setan ọ tẹ jẹ bọwo Ọghẹnẹ ota inọ ọ be rọ uvẹ ẹsalọ oware uwoma gbe uyoma rọ gbọ idibo riẹ ogbọ. (Emuhọ 2:17; 3:1-6) Ẹme Setan na o dhesẹ nọ o te mai woma kẹ ahwo-akpọ re a su omobọ rai viukpenọ Ọghẹnẹ o re su ai. Onana o tẹ wha ẹme avro ologbo ze—Kọ Esuo Ọghẹnẹ ọ mai gine woma?

Ẹdhọ ọ wha ẹme avro ọfa jọ ze re. Ọ bọwo ahwo-akpọ ota inọ fiki oriobọ a be rọ gọ Ọghẹnẹ. Ọ ta kẹ Ọghẹnẹ kpahe Job ọzae ẹrọwọ na nọ: “Who gbe diogba wariẹ e, gbe uwou riẹ, gbe eware kpobi nọ o woi? . . . Rekọ enẹna riẹ obọ ra ro te eware kpobi nọ o woi, ọ vẹ te jọ iraro ra la owhẹ eka.” (Job 1:10, 11) Dede nọ Job Setan ọ jẹ ta ẹme na kpahe, ẹme riẹ na o dhesẹ nọ ahwo kpobi ọ ta riẹ kpahe, inọ oriobọ a be rọ gọ Ọghẹnẹ.

Edhere vẹ ọ mai woma nọ a sai ro ku ẹme avro nọ ọ rọ otọ na họ riẹriẹriẹ? Ọghẹnẹ nọ ọ mai wo areghẹ na ọvo ọ riẹ emamọ edhere nọ a sai ru ku ẹme nana họ, evaọ oghẹrẹ nọ u re kiehọ omai oma. (Ahwo Rom 11:33) Ọ tẹ kuvẹ re ahwo-akpọ ọvo a su omarai omoke jọ, re a riẹ esuo ohwo nọ ọ mai woma.

Eware iyoma nọ e rrọ akpọ na via nẹnẹ na i dhesẹ  nọ esuo ohwo-akpọ o wo iruo ho. Egọmeti ahwo-akpọ a be sae wha udhedhẹ, omofọwẹ, hayo evawere ze he, ukpoye a tubẹ raha akpọ na vrẹta no. Onana o nwani dhesẹ nọ ẹme Ebaibol na ginọ uzẹme inọ: “Ohwo o wo ogaga nọ o ro su oma obọ riẹ hẹ.” (Jerimaya 10:23) Esuo Ọghẹnẹ ọvo ọ rẹ sae wha udhedhẹ, evawere, gbe eghale nọ e rẹ ginẹ tọ ze, keme oyena họ ẹjiroro nọ ọ rọ ma ahwo-akpọ.—Aizaya 45:18.

Kọ, ẹvẹ Ọghẹnẹ o ti ro ru ẹjiroro yena gba? Kareghẹhọ nọ Jesu o wuhrẹ ilele riẹ nọ a lẹ inọ: “Jọ Uvie ra o ze. Jọ a jọ otọakpọ na ru oreva ra wọhọ epanọ o rrọ obọ odhiwu.” (Matiu 6:10) Evaọ oke nọ Ọghẹnẹ o fihọ, ọ te rọ ẹkwoma Uvie riẹ si uye-oruẹ kpobi no otọ. (Daniẹl 2:44) Uvuhu, ẹyao, gbe uwhu e vẹ te jọ eware anwae nọ a ti ro gbiku. Ebaibol na ọ ta kpahe enọ a bi kienyẹ inọ ‘okenọ oruori o se Ọghẹnẹ, o re si yei.’ (Olezi 72:12-14) Rọ kpahe enọ e be mọ, Ebaibol na ọ ta nọ: “Ohwo ọvo nọ ọ be ria eva riẹ nọ ọ rẹte ta no, ‘Mẹ be mọ’, ọ rọ họ.” (Aizaya 33:24) Makọ ahwo nọ a whu no dede nọ a rrọ ekareghẹhọ Ọghẹnẹ, Jesu ọ ta kpahe ae inọ: “Oke o be tha nọ enọ e rrọ iki ekareghẹhọ kpobi a ti ro yo urru riẹ a vẹ te nya via.” (Jọn 5:28, 29) Eyaa yena i woma kẹhẹ!

Nọ ikpe 17 e vrẹ no, Sidnei nọ ma jọ obọ emuhọ uzoẹme nana fodẹ na, ọ tẹ ta nọ: “Mẹ fo Ọghẹnẹ vievie he rọkẹ omonwa mẹ na, rekọ evaọ oke ọsosuọ o kẹ omẹ uye gaga inọ Ọghẹnẹ ọ whaha e riẹ hẹ. Ẹsejọ uweri o rẹ jọ omẹ oma, yọ me te roro te uyero mẹ na, me ve muhọ ẹviẹ. Rekọ Ebaibol na o fiobọhọ kẹ omẹ ruẹ nọ obọ Ọghẹnẹ omonwa mẹ na u noze he. Wọhọ epanọ Ebaibol na ọ ta, eware idudhe e rẹ wha eware iyoma buobu ze. Olẹ nọ mẹ be hae lẹ se Jihova, gbe igogo eria Ebaibol jọ nọ mẹ be hai se kẹse kẹse, i fiobọhọ kẹ omẹ gaga no evaọ usu mẹ kugbe Jihova, je bi ru oma sasa omẹ.”—Ọtausiuwoma Na 9:11; Olezi 145:18; 2 Ahwo Kọrint 4:8, 9, 16.

Nọ ma tẹ be hae kareghẹhọ oware nọ Ọghẹnẹ ọ rọ kuvẹ kẹ uye-oruẹ, gbe nọ kẹle na o ti si ei no otọ riẹriẹriẹ, o rẹ whae ze nọ ma gbẹ rọ fo Ọghẹnẹ hẹ nọ ma tẹ rrọ ẹbẹbẹ. U mu omai ẹro nọ Ọghẹnẹ ọ te “hwosa kẹ enọ e be rọ ajọwha gwọlọ iẹe.” Ohwo ọvo nọ o fi ẹrọwọ họ iẹe gbe Ọmọ riẹ nọ u re kiekpe, ọ riẹ hẹ.—Ahwo Hibru 11:6; Ahwo Rom 10:11.