Ukpe nọ u lele i rie, me te mu iruo ifimu họ, ẹsibuobu mẹ họ ohwo nọ ọ rẹ kobaro. Ahwo nọ a re kere emagazini a gwọlọ nọ a re kere kpahe omẹ, ahwo nọ a re fi ahwo họ ifoto a gwọlọ ifoto mẹ, yọ ahwo a tẹ gwọlọ dhesẹ ifimu ọkpokpọ nọ a ru, a re zizie omẹ, ahwo a tẹ gwọlọ rovie uwou okpokpọ hayo eki rai, a re zizie omẹ. Evaọ oria kpobi, mẹ họ ohwo na.

Rekọ nọ oke o be nyaharo na, mẹ tẹ te ruẹ nọ eware kpobi e nwane rọ epanọ me rẹro nọ e te jọ họ. Mẹ rẹ jọ ifimu ohọre, yọ ohwo ọ sae nwa oma. Ahwo nọ a re ru ifimu evaọ Hong Kong a rẹ rehọ omọfa ru oria nọ ohwo ọ sae jọ nwa oma na ha, wọhọ epanọ a re ru evaọ oria nọ a re se Hollywood evaọ obọ America, fikiere mẹ ọvo me re ru ei, wọhọ eria nọ a rẹ jọ rehọ imotosaikoro la ehru omoto vrẹ. Mẹ jọ evaọ ifimu nọ a re jo gbe-ọfariẹ, ru ozighi, je ru eware imizi buobu.

Evaọ ukpe 1995, mẹ tẹ rehọ ọzae nọ o re ru ifimu re. O wọhọ nọ me wo eware kpobi nọ e hae kẹ omẹ evawere evaọ uzuazọ—okpodẹ, efe, ọzae nọ o you omẹ, ghele na, mẹ jẹ hae jọ ọkọkora. Mẹ tẹ siọ iruo ifimu na ba.

Mẹ tẹ te kareghẹhọ egagọ nọ mẹ jọ evaọ okenọ mẹ jọ emaha. Evaọ oke yena, mẹ avọ oniọvo mẹ ọkpako ma jẹ hai weze bru uviuwou Isẹri Jihova jọ evaọ Ẹdẹ-Ọmaha kpobi. Ọsẹ uwou na Joe McGrath, ọ jẹ hai wuhrẹ Ebaibol na kugbe omai avọ emetẹ esa riẹ. Uviuwou rai o jọ sasasa, yọ Ọsẹ na ọ jẹ hai dhesẹ uyoyou avọ adhẹẹ kẹ aye gbe emọ riẹ. Mẹ jẹ hae lele ai kpohọ iwuhrẹ ukoko rai. Ẹsejọ dede ma re kpohọ ikokohọ ilogbo. Oke yena o jọ oke evawere. Ozọ ovo o jẹ hai mu omẹ hẹ, nọ mẹ tẹ rrọ kugbe Isẹri na.

 Rekọ evaọ uviuwou mẹ, ikpehre eware e jẹ hae via kẹ omẹ. Uzuazọ nọ ọsẹ mẹ o je yeri o jẹ wha edada ilogbo se oni mẹ, fikiere oni mẹ ọ jẹ hae jọ ọkọkora. Nọ mẹ jọ ikpe 10, oni mẹ ọ rọ siọ iwuhrẹ Isẹri Jihova ba. Mẹ gbẹ jẹ hai kpohọ iwuhrẹ ghele, bẹsenọ mẹ rọ họ-ame evaọ okenọ mẹ jọ ikpe 17. Rekọ u kri hi, me te mu ekpehre uzuazọ họ eyeri, fikiere me te no ukoko na.

U kri hi nọ me ru ehaa-orọo mẹ no, ekpako ivẹ jọ evaọ ukoko Isẹri Jihova a te weze bru omẹ ze. A tẹ vuẹ omẹ epanọ mẹ sai ro zihe bru Jihova ze, je ru ọruẹrẹfihotọ re imishọnare jọ nọ a re se Cindy o fiobọhọ kẹ omẹ. Fikinọ u kri no nọ me ro no ukoko na, ẹrọwọ mẹ o whrehe no, fikiere mẹ tẹ vuẹ Cindy nọ ọ kẹ omẹ imuẹro nọ i gine dhesẹ nọ Ebaibol na yọ Ẹme Ọghẹnẹ. Ọ tẹ kẹ omẹ iriruo eruẹaruẹ Ebaibol buobu nọ i rugba. Ẹmẹrera na, ma te zihe ruọ egbẹnyusu, ọ tẹ vuẹ omẹ nọ ma wuhrẹ Ebaibol na kugbe. Mẹ tẹ rọwo. Ẹsiẹe me ti ro vuhumu nọ Jihova yọ Ọghẹnẹ oyoyou nọ ọ gwọlọ nọ me wo evawere evaọ uzuazọ.

Nọ me mu iwuhrẹ họ no, mẹ tẹ ruẹ nọ mẹ be reawere usu Isẹri na vi usu ahwo nọ ma gbe je ru ifimu na. Rekọ, o jọ bẹbẹ kẹ omẹ re me fievahọ ahwo fiki eware nọ mẹ rẹro ruẹ evaọ oke emaha, yọ eva e jẹ hae were omẹ hẹ. Oniọvo jọ evaọ ukoko na ọ tẹ rehọ Ebaibol na fiobọhọ kẹ omẹ riẹ epanọ mẹ sai ro yerikugbe ebẹbẹ nana, me te ti wo emamọ egbẹnyusu.

Evaọ ukpe 1997, mẹ avọ ọzae mẹ ma tẹ kwa kpohọ oria nọ a re se Hollywood evaọ obọ America. Mẹ tẹ jẹ daoma re me fiobọhọ kẹ ahwo wo erere no areghẹ nọ ọ rrọ Ẹme Ọghẹnẹ ze. Ebaibol nọ me je ro wuhrẹ ahwo na o jẹ kẹ omẹ evawere vi okpodẹ nọ a riẹ omẹ evaọ ifimu nọ mẹ jẹ hai ru na. Wọhọ oriruo, evaọ ukpe 2002, mẹ tẹ ruẹ Cheri, aye jọ nọ ma gbẹ riẹ oma evaọ obọ Hong Kong. Enwenọ oghẹrẹ uzuazọ ovona ma je yeri. Ọye a ro mu Miss Hong Kong evaọ ukpe nọ o vrẹ taure a tẹ te rọ omẹ mu. Ọye họ ohwo nọ ọ tubẹ rehọ etu tu omẹ nọ a rọ omẹ mu. Ọ jọ ohwo nọ o je ru ifimu re. Ọ tẹ jẹ kwa kpohọ oria nọ a re se Hollywood evaọ America re.

O kẹ omẹ uye gaga kẹ Cheri nọ me yo nọ ẹyao udu o kpe ọzae nọ ọ jẹ te rehọ iẹe. O wo omosasọ ọvo no egagọ Buddha nọ ọ jọ ze he. Wọhọ omẹ, o bi yeri uzuazọ okpohwo nọ ahwo buobu a gwọlọ yeri, rekọ o wo evawere he, yọ ọ be sai fievahọ ohwo ọvo gbe he. Mẹ tẹ vuẹe eware nọ me wuhrẹ evaọ Ebaibol na, rekọ fiki egagọ Buddha nọ ọ jọ, o jọ bẹbẹ kẹe re ọ jẹ ae rehọ.

Ẹdẹjọ evaọ ukpe 2003, Cheri o te se omẹ no obọ Vancouver evaọ Canada ze, oria nọ ọ jọ je ru ifimu jọ. Avọ oma nọ o be were iẹe, ọ tẹ ta nọ epanọ ọ be rọ dhẹ omoto evaọ abọjọ orẹwho na nọ ahwo a rrọ tere he, ọ tẹ lẹ do via nọ: “Otẹrọnọ whẹ họ Ọghẹnẹ uzẹme na, dhesẹ omara kẹ omẹ? Didi odẹ ra?” Ẹsiẹvo na, ọ tẹ nwane dhẹ vrẹ Ọgwa Uvie, jẹ ruẹ odẹ na, Jihova. O te roro nọ Ọghẹnẹ ọ nwane kẹe uyo no na, fikiere ọ tẹ gwọlọ nọ ọ rẹ ruẹ Isẹri Jihova. Me te ru ọruẹrẹfihotọ nọ ọ sai ro kpohọ ewuhrẹ, nọ emedẹ jọ e  vrẹ no, o te kpohọ ewuhrẹ nọ a be jọ ta ẹvẹrẹ Chinese evaọ Vancouver.

Uwhremu na, Cheri ọ tẹ vuẹ omẹ nọ: “Ahwo nana a rehọ omẹ wọhọ ohwo obọrai. Mẹ sae ta eva mẹ kẹ ae.” Eva e were omẹ gaga nọ Cheri ọ rọ ta eme yena, keme okenọ o je ru ifimu na, o mu usu kugbe ohwo ọvo ho. Cheri o te mu iwuhrẹ họ ẹnya ẹsikpobi. Rekọ evaọ ukpe 2005, a tẹ kẹe ifimu ivẹ jọ inọ o ru evaọ obọ China, fikiere ọ tẹ kwa zihe kpobọ Hong Kong. Evaọ ukpe 2006, Cheri ọ tẹ rehọ uzuazọ riẹ mudhe kẹ Jihova, jẹ họ-ame evaọ okokohọ Isẹri Jihova jọ nọ a ru evaọ Hong Kong. Dede nọ ọ gwọlọ wobọ vọvọ evaọ iruo usiuwoma ota na, o jọ bẹbẹ kẹe fiki iruo ifimu riẹ na, yọ onana o jẹ were iẹe he.

Evaọ ukpe 2009, uzuazọ Cheri u te nwene. Ọ jiroro nọ o re no iruo ifimu na re ọ rehọ uzuazọ riẹ kpobi gọ Jihova ziezi. O te ti wo egbẹnyusu buobu evaọ ukoko na. O te zihe ruọ ọtausiuwoma oke-kpobi nọ o re fiobọhọ kẹ ahwo wuhrẹ kpahe Uvie Ọghẹnẹ, gbe epanọ a sai ro yeri emamọ uzuazọ.—Matiu 24:14.

Cheri o te wuhrẹ ẹvẹrẹ Nepal, re ọ sai kuomagbe utu Isẹri Jihova nọ o be jẹ ẹvẹrẹ Nepal evaọ Hong Kong. Evaọ obọ Hong Kong, a re rri ahwo Nepal vo, keme a rẹ sae jẹ Oyibo hayo ẹvẹrẹ China tere he, yọ uruemu ẹwho rai u wo ohẹriẹ. Cheri ọ vuẹ omẹ nọ obọ nọ o bi fihọ kẹ ahwo nana wuhrẹ Ebaibol na o be were iẹe gaga. Wọhọ oriruo, ọ ta nọ ẹdẹjọ nọ ọ jẹ ta usiuwoma n’uwou ruọ uwou, ọ tẹ nyaku aye Nepal jọ nọ ọ dina riẹ kpahe Jesu omojọ, rekọ ọ riẹ oware ovo kpahe Jihova ha. Cheri ọ tẹ jọ Ebaibol na dhesẹ kẹe inọ Jesu ọ lẹ se Ọsẹ riẹ nọ ọ rrọ obọ odhiwu. Nọ aye na ọ ruẹ nọ ọ sae lẹ se Ọghẹnẹ uzẹme na, ọnọ odẹ riẹ o rrọ Jihova, ọ tẹ ta nọ a wuhrẹ Ebaibol na kugbei. U kri hi, ọzae aye na gbe ọmọtẹ riẹ a te mu Ebaibol na họ ewuhrẹ re.—Olezi 83:18; Luk 22:41, 42.

Nọ mẹ ruẹ epanọ usiuwoma ota oke-kpobi na o be kẹ Cheri evawere te, mẹ tẹ nọ omamẹ nọ, ‘Eme ọ be whaha omẹ usiuwoma ota oke-kpobi na?’ Evaọ oke nana, yọ mẹ kwa ziọ obọ Hong Kong no re. Mẹ tẹ jiroro nọ mẹ rẹ siọ eware jọ ba re me wobọ vọvọ evaọ iruo usiuwoma ota na. Me bi wo evawere gaga fikinọ me bi fiobọhọ kẹ amọfa wuhrẹ kpahe Ọghẹnẹ.

Wọhọ oriruo, me wuhrẹ Ebaibol na kugbe aye Vietnam jọ no, ọnọ eva e jẹ hae were he fiki ebẹbẹ akpọ. Enẹna, eva e be were iẹe, yọ o bi kpohọ iwuhrẹ ẹsikpobi.

Mẹ avọ Cheri ma duku oware nọ u woma vi okpodẹ kpekufiẹ. Dede nọ a riẹ omai okpodẹ evaọ iruo ifimu nọ ma jọ na, iruo usiuwoma ota na nọ ma bi jo wuhrẹ ahwo Ebaibol na họ iruo nọ e be ginẹ kẹ omai evawere, keme e be wha orro se Jihova. Ẹme Jesu na o gine rugba evaọ uzuazọ mai no, inọ: “Ẹkẹ evawere e mae rrọ vi emio.”—Iruẹru Ikọ 20:35.