Ẹsta 2:1-23
2 Nọ eware nana e vrẹ no, nọ ofu Ahasuirọs ovie na+ o kpotọ no, ọ tẹ kareghẹhọ oware nọ Vashti o ru na+ gbe oware nọ a ta nọ a ti ru ei.+
2 Kẹsena iletu nọ e rẹ gbodibo kẹ ovie na omariẹ a tẹ ta nọ: “Jọ a nyae gwọlọ emetẹ-kọkọ nọ i wo erru kẹ ovie na.
3 Jọ ovie na ọ rehọ ahwo mu evaọ ibrotọ esuo riẹ kpobi+ re a koko emetẹ-kọkọ nọ i wo erru kpobi họ ziọ Shushan* oria adhẹzọ* na, re a rehọ ae ziọ uwou eyae na.* Jọ a fi ae họ otọ ẹruọsa Hegae+ ọwharọ ovie na gbe ọsẹro eyae na, re a ru oma rai woma ziezi.*
4 Kẹsena ọmọtẹ nọ ọ mae were ovie na ọ vẹ te jọ aye ovie nọ a re ro nwene Vashti.”+ Ẹme nana ọ were ovie na, yọ ere o ru.
5 Ọzae Ju jọ ọ jọ Shushan,*+ oria adhẹzọ* na, odẹ riẹ Mọdekae,+ ọmọzae Jeya, ọmọzae Shimia, ọmọzae Kish, ohwo orua Bẹnjamin,+
6 nọ a mu no Jerusalẹm kpohọ igbo evaọ usu ahwo nọ a mu kugbe Jẹkonaya*+ ovie Juda, ọnọ Nebukadneza ovie Babilọn o mu kpohọ igbo.
7 Ọye ọ jẹ yọrọ* Hadasa,* koyehọ Ẹsta, ọmọ oniọvo ọsẹ riẹ,+ keme o wo ọsẹ hayo oni hi. Ọmọtẹ na o wo erru evaọ ugboma je siuru gaga, okenọ ọsẹ riẹ avọ oni riẹ a whu no, Mọdekae ọ tẹ rehọ iẹe wọhọ ọmọtẹ riẹ.
8 Nọ a whowho ẹme ovie na avọ uzi riẹ no, okenọ a je koko emetẹ buobu họ ziọ Shushan,* oria adhẹzọ* na re Hegae+ ọ rẹrote ae, a rehọ Ẹsta kpobọ uwou* ovie na re je fi ei họ otọ ẹruorote Hegae, ọsẹro eyae na.
9 Whaọ ọmọtẹ na ọ were riẹ ọ tẹ jẹ dhẹ ruọ ẹe oma,* fikiere ọ tẹ nwani ru ọruẹrẹfihotọ orọ oma riẹ nọ a re ru woma ziezi*+ gbe emu riẹ nọ a rẹ kẹe, ọ tẹ jẹ kẹe emetẹ ihrẹ nọ a salọ no uwou ovie na ze. Ọ tẹ jẹ rehọ iẹe avọ emetẹ riẹ nọ e be gbodibo kẹe kpohọ oria nọ o mai woma evaọ uwou eyae na.*
10 Ẹsta ọ ta ẹme ọvo kpahe ahwo riẹ+ hayo imoni riẹ hẹ, keme Mọdekae+ ọ ta kẹe nọ ọ vuẹ ohwo ọvo ho.+
11 Kẹdẹ kẹdẹ Mọdekae ọ jẹ hae nya aro uwou eyae na* re ọ riẹ epanọ Ẹsta ọ rrọ gbe oware nọ o be via kẹe.
12 Ọmọtẹ kpobi o wo oke nọ a fihọ kẹe nọ ọ rẹ rọ nyabru Ahasuirọs ovie na nọ a te ru oma riẹ woma ziezi no evaọ emerae ikpegbivẹ nọ a fihọ kẹ emetẹ na, keme enẹ a ta nọ a re ro ru oma rai woma ziezi,* udẹ mọr+ emerae ezeza, udẹ balsam+ gbe oghẹrẹ idẹ efa nọ a re ro ru oma woma ziezi* emerae ezeza.
13 A te ru enana kpobi no, yọ ọmọtẹ na ọ ruẹrẹ oma kpahe no re ọ nyabru ovie na, yọ oware kpobi nọ ọ yare nọ a kẹe a rẹ rehọ iẹe kẹe nọ o te bi no uwou eyae na* kpobọ uwou ovie na.
14 Ọ rẹ nya evaọ owọwọ, kẹsena evaọ ohiohiẹ o ve zihe kpobọ uwou avọ ivẹ orọ eyae na,* onọ o rrọ otọ ẹruọsa Sheyashgaz ọwharọ ovie na+ nọ ọ rrọ ọsẹro ese ovie na. O re gbe zihe bru ovie na ha, ajokpanọ ọ were ovie na gaga yọ ovie na ọvo o se odẹ riẹ nọ a rehọ iẹe sei.+
15 Nọ u te okenọ Ẹsta ọmọtẹ Abẹhel, nọ ọ rrọ oniọvo ọsẹ Mọdekae, nọ Mọdekae ọ rehọ wọhọ ọmọtẹ riẹ+ ọ rẹ rọ nyabru ovie na, ọ yare oware ovo ho ajokpaọ oware nọ Hegae ọwharọ ovie na nọ ọ be rẹrote eyae na ọ ta nọ a kẹe ọvo. (Evaọ oke nana kpobi, Ẹsta ọ jẹ were ohwo kpobi nọ ọ ruẹ e riẹ.)
16 A rehọ Ẹsta se Ahasuirọs ovie na evaọ ighẹ ovie* na evaọ amara avọ ikpe, koyehọ amara Tibẹt,* evaọ ukpe avọ ihrẹ+ esuo riẹ.
17 Ovie na o te you Ẹsta vi emetẹ nọ i kiọkọ kpobi, ọ tẹ were iẹe je wo ọjẹrehọ riẹ* vi emetẹ-kọkọ edekọ na kpobi. Fikiere o te ku etu* aye ovie na họ iẹe uzou ọ tẹ rehọ iẹe mu aye ovie+ ro nwene ẹta Vashti.+
18 Ovie na o te ru ehaa emuọriọ ologbo kẹ ikpahwo-esuo riẹ kpobi gbe idibo riẹ, ehaa emuọriọ Ẹsta. O te woro obusino kẹ ibrotọ* na, ọ tẹ jẹ kẹ ahwo ekẹ wọhọ epanọ obọ ovie na u te.
19 Whaọ okenọ a wariẹ koko emetẹ-kọkọ*+ họ orọ avọ isiava, yọ Mọdekae ọ keria unuighẹ ovie na.
20 Ẹsta ọ ta ẹme ọvo kpahe imoni riẹ gbe ahwo riẹ hẹ,+ keme ere Mọdekae ọ ta kẹe; Ẹsta ọ ruabọhọ je ru oware nọ Mọdekae ọ ta, nwane wọhọ epanọ o je ru evaọ okenọ ọ jọ obọ riẹ.+
21 Evaọ oke yena nọ Mọdekae ọ jẹ keria unuighẹ ovie na, Bigthan avọ Tirẹsh, iruiruo ivẹ evaọ ighẹ ovie na nọ e rrọ iriẹthẹ, a tẹ jẹ dha eva, a tẹ gba ẹgwae nọ a re kpe* Ahasuirọs ovie na no.
22 Rekọ Mọdekae ọ tẹ riẹ kpahe iẹe, ọ tẹ vuẹ Ẹsta aye ovie na vẹrẹ vẹrẹ. Kẹsena Ẹsta ọ tẹ rọ odẹ Mọdekae vuẹ ovie na ẹme na.
23 Fikiere a tẹ kiẹ otọ ẹme na jẹ ruẹ nọ ẹme na uzẹme, a tẹ tehe ezae ivẹ na fihọ ure; yọ a kere eware nana kpobi fihọ obe ikuigbe oke yena evaọ iraro ovie na.+
Eme-Obotọ
^ Hayo “Susa.”
^ Hayo “ighẹ ovie; oria nọ o rẹ bẹ ẹvẹruọ.”
^ Koyehọ, ofẹ nọ eyae na e rẹ jọ evaọ ighẹ ovie na.
^ Hayo “wholo oma rai.”
^ Hayo “ighẹ ovie; oria nọ o rẹ bẹ ẹvẹruọ.”
^ Hayo “Susa.”
^ Hayo “rẹrote.”
^ Otofa riẹ họ “Ure Idodo.”
^ Hayo “Susa.”
^ Hayo “ighẹ ovie; oria nọ o rẹ bẹ ẹvẹruọ.”
^ Hayo “ighẹ.”
^ Koyehọ, ofẹ nọ eyae na e rẹ jọ evaọ ighẹ ovie na.
^ Hayo “nọ a re wholo.”
^ Hayo “o te wo uyoyou nọ o rẹ hiẹ hẹ kẹe.”
^ Koyehọ, ofẹ nọ eyae na e rẹ jọ evaọ ighẹ ovie na.
^ Hayo “wholo oma rai.”
^ Hayo “gbe uwholo nọ a re wholo eyae na.”
^ Koyehọ, ofẹ nọ eyae na e rẹ jọ evaọ ighẹ ovie na.
^ Koyehọ, ofẹ avọ ivẹ nọ eyae na e rẹ jọ evaọ ighẹ ovie na.
^ Hayo “uwou ovie.”
^ Rri Ẹme-Ofiba B15.
^ Hayo “uyoyou nọ o rẹ hiẹ hẹ kẹe.”
^ Hayo “etu-udhọfọ.”
^ Hayo “ibrotọ esuo.”
^ Hayo “izoge emetẹ.”
^ Evaọ Hibru, “a te rọ obọ kpahe.”
