Otjari “ongaro yokuyenena okuritwa mozongaku zomundu warwe, mokuṱunwa i omuhihamo poo ouzeu womundu ngo.” Dr Rick Hanson ngu tjiwa kutja ourizemburuka wovandu u ungura vi, wa tja: “Otjari otjiṋa tji tu kwatwa na tjo.”

RIPURIRA KU IMBI: Ongwaye tji tu yenena okuraisa otjari poo okuṱira varwe ondjenda, otjikaṋena tji tji ha munika moviutwa vyarwe? Ombeibela i kahurura kutja Mukuru wa uta ovandu kosaneno ye. (Genesis 1:26) Twa ungurwa kosaneno ya Mukuru mena rokutja tu yenena okuraisa ovikaṋena vye, nu tu yenena okuraisa ovikaro tjiva oviwa. Kunao, indu ondjenda tji mai hingi ovandu vorusuvero okuvatera varwe, owo ve raisa otjari tja Jehova Mukuru, Omuute wawo omunaunyaṋutima.​—Omiano 14:31.

Mukuru u tu ṱira ondjenda nu katjaterwa okutumuna amatu munu ouzeu. Ohunga notjiwaṋa tja Israel otjikuru, tji tja tjinda ondatumisire noukarere moEngipte, nozombura 40 mokuti ongaango, Ombeibela i tja: “Eye otje ve yama kozombamisiro zawo azehe.” (Jesaja 63:8, 9) Yandja ombango kokutja Mukuru kaa tjiwa ouzeu wotjiwaṋa tje uriri, nungwari eye wa ṱunwa i omihihamo vyawo. Eye wa tja: “Ami me tjiwa omihihamo vyatjo.” (Eksodus 3:7) Mukuru wa tja: “Auhe ngu me mu tono, ma tono ihi tji tji ri otjihuze pu avihe ku Ami.” (Sakarja 2:8) Ovandu varwe tji mave tu hihamisa, Mukuru wina u hihamwa puna eṱe.

Nandarire kutja mape ya atu rivere nokurimuna kutja katu nonḓengu yokuraisirwa otjari i Mukuru, Ombeibela i tu wisa omutima pehi nomambo nga: “Ndjambi omunene pomeritjiviro wetu womorukoro, nokutja Eye u tjiwa avihe.” (1 Johanes 3:19, 20) Mukuru u tu tjiwa okukapita eṱe oveni. Eye u tjiwa nawa ozongaro azehe mu tu ri, u tjiwa omeripura wetu nongaro yomutima wetu. U notjari na eṱe.

 Omatjangwa maye tu pe ongamburiro ndji

• “Tji mamu kumbu, Ami me mu ziri. Tji mamu ku ombatero ku Ami, indino Ami me tja: ‘OwAmi ngwi.’”​—JESAJA 58:9.

• “‘Ami me tjiwa omeripuriro ngu mbi na wo otja ku eṋe, omeripuriro wohange, nu nge he ri wotjiwonga, omeripuriro wokumupa oruveze ndu maru ya rwomaundjiro norwouṋingandu. Indino tji mamu ku ku Ami namu kumbu ku Ami, Ami me mu zuvire.’”​—JEREMIA 29:11, 12.

• “Omahoze wandje we ye pakera motjikuve. Owo kaye tjangerwe membo roye are?”​—EPSALME 56:8.

Hapo okutjiwa kutja Mukuru u notjari na eṱe maku tu vatere okutjinda omauzeu? Ngatu tare kotjihorera tja Maria:

“Tji mba za nokutuurunga omuhihamo wokupandjara omuatje wandje omuzandu wozombura 18 ngwa verere okangera, ami mba uta okumuna kutja ehupo ezeu nu ri nomauhasemba omengi. Ami mba pindikira Jehova kutja ongwaye tje ha verukisire omuatje wandje!

“Ozombura 6 kombunda yanao, epanga rotjari norusuvero mombongo ra puratena nawa kwami otja tjee mu serekarere ohunga noumune mbu mba ri na wo kutja Jehova kee ndji suvera. Eye we ndji puratena oure wozoiri ozengi nokuhina okundjiwira momambo, nu okuzambo wa hungirira ketjangwa nde ndji ṱuna tjinene. Oro etjangwa ra 1 Johanes 3:19, 20, ndi tja: ‘Ndjambi omunene pomeritjiviro wetu womorukoro, nokutja Eye u tjiwa avihe.’ Eye wa kahurura kutja Jehova u tjiwa omauzeu wetu.

“Posi yokutja nakombanda yanao, ya ri ouzeu kwami okuisa omapindi ngu mbari na wo! Okuzambo mba lesa Epsalme 94:19, ndi tja: ‘Tji mba ri nomeripuriro omazeu morukoro rwandje, omahuhumiṋino woye ya tarareka omuinyo wandje.’ Ee munu tjimuna omatjangwa ngo ya tjangerwa ami! Kombunda yoruveze, mba muna kutja oupupu okuhungira kuna Jehova ohunga nomauzeu wandje, ame tjiwa kutja eye u ye tjiwa nawa nu u puratena.”

Tjiri otjiṋa otjiwa okutjiwa kutja Jehova u tu tjiwa nawa nu u hihamisiwa i omauzeu ngu tu muna! Posi yokutja, hapo ongwaye ouzeu tji wa takavara tjinene? Hapo omauzeu ya takavara mena rokutja Mukuru u tu vera motjimbe tjomauvi ngu tu tjita? Hapo Mukuru ma tjiti otjiṋa okueta omaandero komauzeu ngu tu muna? Omapuriro nga maye ka konḓononwa motupa tu matu kongorere ko.