Mo yenene vi okukara nohange nandarire kehi yovita nozondjito zoutwe?
Gary ngwa ri movita wa tja: “Ami ngunda ambi hi ye rihonga Ombeibela hee tjiwa kutja ongwaye tji ku noutwe, nouhasemba, nomaumba omengi mouye. Posi ya nai mbi nohange mena rokutja me tjiwa kutja Jehova Mukuru ma katjita kutja ouye u kare mondjeverero.”
Gary kaye erike ngu noumune mbwo. Tara komuano Ombeibela mu ya vatera varwe.
OMBEIBELA I TJA: “Muhona, oOve omuwa, nu u isira.”—Epsalme 86:5.
OMUANO ETJANGWA NDI MU RI VATERA: “Ezeva ndi re ndji vatera okutjiwa kutja Jehova u notjari. Ami me tjiwa kutja eye u nonḓero okuisira avihe mbi mba tjita morukapitaveze indu tji mba ri norupa movita.”—Wilmar, Colombia.
OMBEIBELA I TJA: “Ami me meme eyuru epe nehi epe. Ovitjitwa vyoruveze ndwa kapita mavi zembwa nu kavi nakuzemburukwa ko rukwao.”—Jesaja 65:17.
OMUANO ETJANGWA NDI MU RI VATERA: “Ami mba ri nombameno momuinyo mena roviṋa mbi mba muna movita. Posi ya etjangwa ndi ri ndji zemburukisa kutja moruveze rwopopezu Jehova ma katjita kutja e ha zemburuka omeripura ayehe omavi ngu mbi na wo. Otjiṋa otjiwa okutjiwa kutja oyo kamaaye kara momutima poo mourizemburuka wandje rukwao.”—Zafirah, United States.
OMBEIBELA I TJA: “Ousemba ngau nyomoke . . . nohange ngai takavare omueze ngunda amau yere.”—Epsalme 72:7.
OMUANO ETJANGWA NDI MU RI VATERA: “Ami potuingi mbi ripura nomambo ngo nu mbi muna kutja moruveze rwopopezu oviṋa ovivi mbi etwa i yovita mavi yanda. Neṱe katu nokuhepa okurikenda nondjeverero yovasuverwa vetu rukwao.”—Oleksandra, Ukraine.
OMBEIBELA I TJA: “Ovandu vetu imba mba ṱa mave kara nomuinyo rukwao. . . . Avehe mba mba rara momayendo wawo mave penduka nave imbura nondjoroka.”—Jesaja 26:19.
OMUANO ETJANGWA NDI MU RI VATERA: “Ovengi veṱunḓu randje va zepewa indu ovandu vomuhoko warwe tjaave kondjo okuzepa omuhoko wOvatutsi auhe. Posi yokutja ezeva ndi ri ndji vatera okutjiwa kutja me kevemuna rukwao. Ami mbi undja okukazuva omaraka wawo wondjoroka indu tji va pendurwa.”—Marie, Rwanda.
OMBEIBELA I TJA: “Mokaruveze okasupi omurunde tjandje ke tji po. . . . Ovanandjenda mave rumata ehi, nu mave vyarere ohange onene.”—Epsalme 37:10, 11.
OMUANO ETJANGWA NDI MU RI VATERA: “Nandarire kutja ovita vyaanda, ngunda pe nomauhasemba novandu mbe tjita ouvi. Omazeva nga ye ndji vatera tjinene. Jehova u muna oviṋa avihe nu u tjiwa ongaro mu mbi ri. Eye wa kwizika kutja moruveze rwopopezu omauzeu ayehe maye yanda, nu kaye nokukazemburukwa rukwao.”—Daler, Tajikistan.
Ovandu mba tamunwa membo ndi i vemwe va imba omangete wOvahongonone va Jehova mba vaterwa i yOmbeibela okukara nohange. Owo ve rihonga okuisa ombangu youmuhokohoko nokutonda varwe. (Ovaefese 4:31, 32) Ovahongonone va Jehova kave kara norupa movitjitwa vyozopolotika, nu ve panḓa okukara norupa movitjitwa vyoutwe.—Johanes 18:36.
Ovahongonone va Jehova wina ve vaterasana tjimuna eṱunḓu nda suverasana. (Johanes 13:35) Otjotjihorera, Oleksandra ngwa tamunwa rukuru, aa sokutaurira kehi rarwe pu nomuangu we mena rovita. Eye wa tja: “Indu tji twa konda omukoka wehi, eṱe tjimanga twa muna ovahongonone va Jehova mba ri mbo okutuyakura. Ombatero yawo ye tu vatera kutja tu iririre okuhupa mehi rarwe otjovataure.”
Ovahongonone va Jehova mave ku ṋanga okuyekukara pamwe pozombongarero zawo zombongo pu ve rihonga ohunga nombuze yOmbeibela yohange nomuano mu mo yenene okuiṱakamisa. Twende korungovi ndwi jw.org okupaha oruveze ndu ri popezu naove, poo okuningira omerihongero wOmbeibela wotjari ku na umwe wOvahongonone va Jehova membo ndi Yorokera ehupo nga aruhe.
