Evangeli ra Lukas 9:1-62

  • Imba Omurongo na vevari mave rakiziwa ohunga notjiungura tjokuzuvarisa (1-6)

  • Herodes wa kumisiwa i Jesus (7-9)

  • Jesus ma risa ovandu 5 000 (10-17)

  • Petrus ma raisa kutja Kristus ouṋe (18-20)

  • Jesus ma hunganeke onḓiro ye (21, 22)

  • Oviṋa mbi mo sokutjita kutja u rire omuhongewa wa Jesus (23-27)

  • Omatjitukiro wa Jesus (28-36)

  • Omuatje omuzandu ngwa ri nondemone wa verukisiwa (37-43a)

  • Jesus ma hunganeke onḓiro ye rukwao (43b-45)

  • Ovahongewa mave pose ohunga nokutja ouṋe ngu ri omunanḓengu (46-48)

  • Auhe ngu he tu pirukire u ri pu na eṱe (49, 50)

  • Ovandu votjirongo tja Samaria kave yakurire Jesus (51-56)

  • Oviṋa mbi mo sokutjita okukongorera Jesus (57-62)

9  Neye wa isana imba Omurongo na vevari pamwe nu e ve pe omasa nouvara kombanda yozondemone azehe nokuverukisa omitjise. 2  Nu eye we ve hinda okukazuvarisa ohunga nOuhona wa Mukuru nokukaverukisa ovandu, 3  nu eye wa tja ku wo: “Amu twaerere otjiṋa mouyenda, amu twaerere okati poo ondjaṱu yomondjira poo omboroto poo ovimariva.* Nu amu twaerere ozombanda mbari.* 4  Posi ya indu tji mwa hiti mondjuwo ngamwa aihe, kareye mbo nu okuzambo mu za po mbo. 5  Nu ovandu tji ve hi nokumuyakura, tji mamu piti motjihuro ho, pukumuneye oruuma kozombaze zeṋu otjotjiraisiro tjerakiza ku wo.” 6  Okuzambo owo va ya kotjirongo nga kotjirongo amave raere ombuze ombwa kovandu nokuverukisa akuhe. 7  Nambano Herodes* omunane worukondwa rwa Galilea* wa zuvire ohunga noviṋa avihe mbyaavi tjitwa nu eye wa kuminwe tjinene mena rokutja tjiva aave tja Johanes wa pendurwa okuza movakoke, 8  posi ya varwe aave tja Elia wa kotoka, nu wina varwe aave tja umwe wovaprofete ovakuru wa penduka. 9  Herodes wa tja: “Johanes mba kondisa otjiuru. Nambano omurumendu ngwi ouṋe, orondu me zuu oviṋa ovingi ohunga na ye?” Ku nao eye aa kondjo okumumuna. 10  Indu ovaapostele tji va kotoka, owo va raera Jesus oviṋa avihe mbi va tjita. Ku nao eye we ve twaerera nu e ve twara koruveze ku va kakara aveyerike kotjihuro tji tji isanewa Betsaida. 11  Posi ya ovimbumba vyovandu tji vya tjiwa otjiṋa hi, vye mu kongorera. Nu eye we vi yakura nawa na utu okuhungira ku na vyo ohunga nOuhona wa Mukuru, nu eye wa verukisa imba mbaave hepa okuverukisiwa. 12  Nu eyuva tji ra ri pokuhita, imba Omurongo na vevari ve ya nave tja ku ye: “Raera otjimbumba tjovandu kutja tji yende kovirongo vyopopezu, ve keripahere omara novikurya okurya, mena rokutja imwi mu tu ri omokuti.” 13  Posi ya eye wa tja ku wo: “Eṋe vepeye ovikurya ve rye.” Owo va tja: “Eṱe katu notjiṋa pendje nozomboroto ndano nomahundju yevari, ngahino eṱe tji twa i oveni atu karandera ovandu avehe mba ovikurya.” 14  Pa ri novarumendu ape 5 000. Posi ya eye wa tja kovahongewa ve: “Ve haamiseye moumbumba wovandu ape 50.” 15  Nowo va tjita nao, nu va tjita kutja avehe ve haame pehi. 16  Eye wa toora ozomboroto ndano nomahundju yevari, a tara keyuru na kumbu,* okuzambo eye we ze teya ne ze yandja kovahongewa ve kutja ve ze twa po komurungu wotjimbumba tjovandu. 17  Nu avehe va rya nave kuta, okuzambo ovahongewa va wonga outekero wozomboroto mbwa hupire, nave urisa ovimbamba 12 na wo. 18  Kombunda, ngunda ama kumbu erike, ovahongewa ve ya ku ye, nu eye we ve pura kutja: “Hapo ovimbumba vyovandu mavi tja owami uṋe?” 19  Owo ve mu zira ave tja: “OJohanes Omupapitise, posi ya varwe mave tja oElia, nu wina varwe mave tja umwe wovaprofete ovakuru wa penduka.” 20  Okuzambo eye wa tja ku wo: “Posi ya, eṋe mamu tja owami uṋe?” Petrus wa zira kutja: “Oove Kristus, ngwa hindwa i Mukuru.” 21  Okuzambo eye we ve rakiza oukukutu kutja ave ha raere omundu otjiṋa hi, 22  posi ya eye wa tja: “Omuna womundu ma munu omauzeu omengi, nu ke nokuyakurwa i yovanene vOvajuda, novapristeri oviuru, novahonge vomatwako, nokutja eye ma zepewa, nu meyuva oritjatatu eye ma pendurwa.” 23  Okuzambo eye wa kayenda komurungu na tja ku wo avehe: “Indu omundu tji ma vanga okundjikongorera, eye ka sokuhupa otja kombango ye omuini, nungwari ma sokutoora omuti we wondatumisire* eyuva arihe na kayenda komurungu okundjikongorera. 24  Auhe ngu ma vanga okuyama omuinyo we me u pandjarisa, posi ya auhe ngu ma pandjara omuinyo we mena randje eye ongu me u yama. 25  Indu omundu tja munu ouye auhe, posi ya e rihihamisa omuini poo a pandjara omuinyo we, tjiri ouwa waye mbu ma munu? 26  Orondu auhe ngu ma ṱohoṋi okurira omuhongewa wandje, nu ngu ma ṱohoṋi okukambura momambo wandje, Omuna womundu ma ṱohoṋi na ye indu tje ya momasa we na momasa wa Ihe novaengeli ve ovayapuke. 27  Posi ya ami tjiri me mu raere kutja pe na tjiva veṋu mba kurama mba mbe hi nokurora onḓiro oparukaze ngandu tji va munu Ouhona wa Mukuru.” 28  Ape omayuva hambondatu tja za nokuhungira omambo nga, eye wa twaerera Petrus na Johanes na Jakobus pu na ye, nave karonda ondundu okukakumba. 29  Nu otja tjaa kumbu, ombuniko yomurungu we ya runduruka, nu ozombanda ze za rira ozombapa twe amaze keṋakeṋa. 30  Nu tara, ovarumendu vevari aave hungire ku na Jesus. Owo va ri ooMoses na Elia. 31  Ovarumendu mba aave yere nu va uta okuhungira ohunga nomairo we nga ri pokuyenenisiwa moJerusalem. 32  Nambano Petrus na imba mba ri pu na ye va kamburirwe i yozomboṱu, posi ya indu tji va penduka, owo va muna Jesus ama yere novarumendu vevari mba kuramene pu na ye. 33  Nu ovarumendu vevari mbo tjaave za po pu Jesus, Petrus wa tja ku ye: “Muhonge, tjiri otjiṋa otjiwa kweṱe okukara mba. Ku nao, tu yandjera kutja tu tunge ozotenda ndatu mba. Imwe yoye, imwe ya Moses na yarwe ya Elia.” Petrus kaa tjiwa kutja ma tja vi. 34  Posi ya otja tjaa hungire oviṋa mbi, pe ya otjikamba tji tje ve kovera. Otja tjaave hiti motjikamba, owo va uta okutira. 35  Okuzambo pa zuvaka eraka okuza mu tjo nda tja: “Ingwi Omuna wandje, ngwa toororwa. Purateneye ku ye.” 36  Ngunda eraka amari hungire, owo va muna kutja Jesus wa ri erike. Posi ya owo va mwina nu kave raerere omundu momayuva ngo oviṋa ngamwa avihe mbi va muna. 37  Meyuva ependukirwa, indu tji va heruka okuza kondundu, otjimbumba otjinene tjovandu tja hakaena ku na ye. 38  Nu omurumendu umwe wa ravaera okuza motjimbumba tjovandu na tja: “Muhonge, ami me riheke kove kutja u vatere* omuatje wandje, mena rokutja eye erike ongu mbi na ye. 39  Ombepo ohakohoke i mu kambura, nu eye tjimanga u ravaera na i tjiti kutja ma seuke otumbamba, nokupita etutu kotjinyo. Nu oyo i mwesa pouzeu tji ya zu nokumuhihamisa. 40  Ami mbe rihekere kovahongewa voye kutja ve i pitise, posi ya owo kaave yenene.” 41  Jesus wa zira a tja: “Oweṋe orukwato ndu hi nongamburiro nu orunaurunde. Hapo me sokukara pu na eṋe mba nokutjinda ongaro yeṋu ndji nga ruṋe? Eta omuatje woye omuzandu mba.” 42  Nu nandarire otja tjee ya popezu, ondemone ye mu yumba pehi na i tjiti kutja ma seuke orumbamba. Posi yokutja, Jesus wa vyura ombepo ohakohoke ndjo, nu a verukisa omuatje omuzandu ne mu yarura ku ihe. 43  Nu owo avehe va himisirwe i yomasa omahimise wa Mukuru. Ngunda ava himisiwa i yoviṋa avihe mbyaa tjiti, eye wa tja kovahongewa ve: 44  “Purateneye nawa nu zemburukeye omambo nga, orondu Omuna womundu ma kahororwa nu ma kayandjewa momake wovandu.” 45  Posi ya, owo kaave zuu nawa oviṋa eye mbyaa hungire. Orondu ovyo vya horekerwe ku wo kokutja ave ha yenene okuzuva nawa, nu owo aave tira okumupura ohunga nomaheero womambo nga. 46  Okuzambo ovahongewa va uta okuposa ohunga nokutja ouṋe ngu ri omunanḓengu tjinene mokati kawo. 47  Jesus aa tjiwa omeripura womitima vyawo, na isana okanatje, ne ke kuramisa meṋe ye, 48  nu eye wa tja ku wo: “Auhe ngu ma yakura okanatje nga mena rena randje, wina me ndji yakura, nu auhe ngu me ndji yakura wina ma yakura ingwi ngwe ndji hinda. Orondu auhe ngu me risusuparisa mokati keṋu amuhe ongu ri omunanḓengu.” 49  Johanes wa zira a tja: “Muhonge, eṱe twa munu omundu ama pitisa ozondemone nu ama ungurisa ena roye, nu eṱe twa kondjo okumutjaera mena rokutja ka umwe wetu.” 50  Posi ya Jesus wa tja ku ye: “Amu kondjo okumutjaera, orondu auhe ngu he mu pirukire u ri pu na eṋe.” 51  Otja omayuva tjaaye ya popezu* ku ye okutwarewa keyuru, eye wa tanda okuyenda koJerusalem. 52  Ku nao, eye wa hinda ovahindwa komurungu we, nowo va ya nave kahita motjirongo tjOvasamaria okukaṱuna oviṋa komeero we. 53  Posi ya owo kave mu yakurire, mena rokutja eye we rimanenene* okuyenda koJerusalem. 54  Indu ovahongewa mba Jakobus na Johanes tji va muna otjiṋa hi, owo va tja: “Muhona, mo vanga kutja tu isane omuriro okuza keyuru kutja u ve nyone?” 55  Posi ya eye wa tanauka ne ve vyura. 56  Ku nao, owo va ya kotjirongo tjarwe. 57  Nu otja tjaave kayenda mondjira, omundu umwe wa tja ku ye: “Ami me ku kongorere akuhe ku mo i.” 58  Posi ya Jesus wa tja ku ye: “Ozombandje ze nomina nu ouzera womeyuru u noviruwo, posi ya Omuna womundu ke nopoṋa pe twa po otjiuru tje okusuva.” 59  Okuzambo eye wa tja ku ingwi owarwe: “Ndji kongorera.” Posi ya omurumendu wa tja: “Muhona, rutenga ndji yandjera kutja mbi yende, mbi kapake tate.” 60  Posi ya eye wa tja ku ye: “Isa ovaṱi ve pakasane, posi ya ove twende u katjivise Ouhona wa Mukuru koṋa akuhe.” 61  Nu ingwi owarwe wina wa tja: “Ami me ku kongorere, Muhona, posi ya rutenga ndji yandjera kutja mbi kavirikize ku imba vonganda yandje.” 62  Jesus wa tja ku ye: “Kape nomurumendu ngu ma ungura motjikunino nu ngu ma tara koviṋa vyokongotwe ngwa pwira Ouhona wa Mukuru.”

Omambo wokehi

^ MOtjigrike, “osilveri.”
^ Poo “ombanda yarwe.”
^ Ingwi oHerodes Antipas. Tara Omakahururiro womambo.
^ MOtjigrike, “omutetrarki.”
^ Poo “ne ze sere ondaya.”
^ Tara Omakahururiro womambo.
^ MOtjigrike, “u tare.”
^ MOtjigrike, “tjaaye ya okuura.”
^ MOtjigrike, “omurungu we wa tandere.”

Ousemba wokuherengurura embo ndi