Evangeli ra Lukas 22:1-71

  • Ovapristeri mave paha omuano wokuzepa Jesus (1-6)

  • Omarongerisiro wOpaska osenina (7-13)

  • Omazikamisiro wEriro rongurova rOmuhona wetu Jesus (14-20)

  • “Ingwi ngu me ndji horora u ri pu na ami potjitiha” (21-23)

  • Otjiposa otjinene ohunga nokutja ouṋe ngu ri omunanḓengu (24-27)

  • Omerikutiropamwe wa Jesus wokurira ombara youhona (28-30)

  • Jesus ma hunganeke kutja Petrus me mu pataṋa (31-34)

  • Ouhepe wokurirongerisa; omangaruvyo yevari (35-38)

  • Ongumbiro ya Jesus pOndundu yOmiṋinga (39-46)

  • Jesus wa kamburwa (47-53)

  • Petrus ma pataṋa Jesus (54-62)

  • Jesus ma nyekererwa (63-65)

  • Jesus ma pangurwa komurungu wOsanhedrin (66-71)

22  Nambano eyuva enene rozomboroto nḓe hi nosure, ndi isanewa kutja Opaska, ra ri popezu. 2  Nu ovapristeri oviuru novahonge vomatwako aave paha omuano omusemba wokumuzepa, mena rokutja owo aave tira ovandu. 3  Okuzambo Satan wa hita mu Judas ingwi ngwaa isanewa Iskariot, ngwa ri umwe waimba Omurongo na vevari, 4  nu eye wa ya na kahungira ku novapristeri oviuru novanane vovatjevere vondembeli ohunga nokutja me mu horora vi ku wo. 5  Owo va nyanda omitima mena rotjiṋa hi, nu va zuvasana kutja mave mu pe ovimariva ovisilveri. 6  Ku nao eye wa yakura, na utu okupaha oruveze ndu ri rwo okumuhorora ku wo ngunda ape hi notjimbumba tjovandu. 7  Eyuva enene rOmayuva omanene wozomboroto nḓe hi nosure re ya, eyuva ombunguhiro yOpaska maai sokuyandjewa. 8  Ku nao Jesus wa hinda Petrus na Johanes na tja: “Twendeye mu karongerise Opaska tu karye.” 9  Owo va tja ku ye: “Mo vanga kutja tu keirongerise pi?” 10  Eye wa tja ku wo: “Indu tji mwa hiti motjihuro, mamu kahakaena ku nomurumendu ngwa tjindi ehoro romeva. Mu kongorereye ngandu mondjuwo mu ma kahita. 11  Nu karaereye omuini wondjuwo kutja, ‘Omuhonge ma tja: “Etuwo rovayenda ri ri pi kokutja mbi rye Opaska pu novahongewa vandje?”’ 12  Nu omurumendu ngo me mu raisire etuwo enene rokombanda nda ṱunwa nawa. Karongeriseye eriro rOpaska mo.” 13  Ku nao owo va ya nave kavaza avihe otja Jesus tje ve raera, nu owo va karongerisa Opaska. 14  Indu oiri tji ya yenena, eye wa kahaama potjitiha pu novaapostele. 15  Nu eye wa tja ku wo: “Ami tjiri ee zeri okurya Opaska ndji pu na eṋe ngunda ambi hi ya muna omauzeu, 16  orondu ami me mu raere kutja hi nokurya rukwao eriro rOpaska ngandu oviṋa avihe tji vya yenenisiwa mOuhona wa Mukuru.” 17  Nu eye wa pewa ekopi na yandja ondangi ku Mukuru na tja: “Kambureye nu yandjasaneye mokati keṋu, 18  orondu ami me mu raere kutja okuza ku nai ami hi nokunwa omavinu rukwao ngandu Ouhona wa Mukuru tji we ya.” 19  Wina eye wa toora omboroto na tja okuhepa ku Mukuru ne i teya, nu e i yandja ku wo ama tja: “Oyo mai kuramene po orutu rwandje, ndu maru yandjewa mena reṋu. Kayendeye komurungu okutjita nai okuzemburuka ami.” 20  Wina eye wa tjita nao nekopi tji va za nokurya eriro rongurova, ama tja: “Ekopi ndi mari hee omerikutiropamwe omape mena rombinḓu yandje, ndji mai tirahirwa eṋe. 21  “Posi ya tareye, ingwi ngu me ndji horora u ri pu na ami potjitiha. 22  Orondu tjiri, Omuna womundu me mwesa amuhe otja ku imbi mbya hunganekwa, posi yokutja owee komurumendu ngu me mu horora.” 23  Ku nao owo va uta okuhungira mokati kawo oveni kutja ouṋe pu wo ngu ri pokutjita otjiṋa hi. 24  Posi yokutja, wina pa sekama otjiposa otjinene mokati kawo ohunga nokutja ouṋe pu wo ngu varwa otjomunanḓengu povakwao. 25  Posi ya eye wa tja ku wo: “Ozombara zoviwaṋa ze honaparera ovandu otja pu mave vanga nu imba mbe ve honaparera po ve pewa omana wapeke.* 26  Eṋe amu kara nao. Posi ya ingwi ngu ri omunanḓengu mokati keṋu nga rire otja ngu ri omuṱiṱiṱiṱi, nu ingwi ngu ma hongorere po nga rire otja ngu ri omukarere. 27  Ouṋe ngu ri omunanḓengu pomukwao? Eye ngwi ngu ma ri* poo eye ngwi ngu ma yandja ovikurya?* Hapo ka eengwi ngu ma ri?* Posi ya ami mbi ri otja ingwi ngu ma yandja ovikurya* mokati keṋu. 28  “Nungwari, eṋe oweṋe mbu mwa panḓera pwami momarorero wandje, 29  nu ami me tjiti omerikutiropamwe pu na eṋe, tjimuna Tate tja tjita omerikutiropamwe pu na ami kutja mbi rire ombara youhona, 30  kokutja eṋe mu yenene okurya nokunwa potjitiha tjandje mOuhona wandje, nokuhaama kombanda yovihavero vyouhona okupangura omihoko 12 vyOvaisrael. 31  “Simon, Simon, Satan ma vanga okumurora amuhe kotjomasa tjimuna omundu tje sisa ovikokotwa. 32  Posi ya ami mbe riyarikaṋa ku Mukuru mena roye kokutja ongamburiro yoye ai ha ngundipara. Nu indu tji wa kotoka, yanḓiparisa omarumbi novangu voye.” 33  Okuzambo eye wa tja ku ye: “Muhona, ami mbe rirongere okuyenda pu na ove konḓorongo na konḓiro.” 34  Posi ya Jesus wa tja: “Ami me ku raere Petrus, ohunguriva ondwezu kai nokuvandara ndino ngandu tji wa pataṋa povikando vitatu kutja ko nokundjitjiwa.” 35  Eye wina wa tja ku wo: “Indu ami tji mbe mu hinda nokuhinondjaṱu yovimariva novikurya nozongaku, eṋe kamu hepere otjiṋa, katjiperi?” Owo va tja: “Ii, otjiperi.” 36  Okuzambo eye wa tja ku wo: “Posi ya nambano ingwi ngu nondjaṱu yovimariva nga toore. Momuano tjingewo ingwi ngu nondjaṱu yovikurya nga twaerere nu ingwi ngu hi nengaruvyo nga randise ombanda ye yokombanda, nu ma rande engaruvyo. 37  Orondu ami me mu raere kutja imbi mbya tjangwa mavi sokuyenenisiwa mwami, kutja, ‘Eye wa varwa pu novatjite vouvi.’* Mena rokutja omambo nga tjangwa ohunga na ami, maye yenenisiwa.” 38  Okuzambo owo va tja: “Muhona, tara, omangaruvyo yevari owo nga.” Eye wa tja ku wo: “Ya yenene.” 39  Eye wa ya kOndundu yOmiṋinga otja tjaa tjiti, nu ovahongewa wina ve mu kongorera. 40  Indu tja vaza poruveze ndwo, eye wa tja ku wo: “Kareye pokukumba kokutja amu ha hiti momarorero.” 41  Nu eye wa za po pu wo na i kokure kaṱiṱi ape omukato wewe nda yumbwa, nu eye wa kawora ozongoro ze na utu okukumba, 42  ama tja: “Tate, indu tji mo vanga, isa po ekopi ndi pwami. Posi yokutja a rire ombango yandje ndji mai tjitwa, nungwari ngai rire indjo yoye.” 43  Okuzambo omuengeli okuza keyuru we rimunikisa ku ye ne mu pe omasa. 44  Posi ya eye wa ri mongaro ongendise tjinene nu eye wa kayenda komurungu okukumba nomasa, nu orukutu rwe rwa rira otja omata wombinḓu ngu maye wire pehi. 45  Indu tja za nokukumba, eye wa ya kovahongewa ne ve vaza ava rara nu ava urwa, mena rokutja va ri moruhoze. 46  Eye wa tja ku wo: “Ongwaye tji mwa rara? Sekameye nu kayendeye komurungu okukumba kokutja amu ha hiti momarorero.” 47  Ngunda ama hungire, otjimbumba tjovandu tje ya nu omurumendu ngu isanewa Judas, umwe waimba Omurongo na vevari, ee tji hongorere po, nu eye we ya ku Jesus kokutja me mu hupite. 48  Posi ya, Jesus wa tja ku ye: “Judas, hapo ove mo horora Omuna womundu noruhupito?” 49  Indu imba mba ri ongondoroka na ye tji va muna kutja mape tjitwa tjike, owo va tja: “Muhona, hapo ngatu ungurise engaruvyo?” 50  Umwe wawo nandarire wa konda okutwi kokunene komukarere womupristeri omunene. 51  Posi ya Jesus wa tja: “Opuwo, yandereye mbo.” Nu eye wa ṱuna kokutwi ne mu verukisa. 52  Okuzambo Jesus wa tja kovapristeri oviuru novatjevere vondembeli novarumendu ovanene mbe ya mbo mena re: “Hapo eṋe mwe ya nomangaruvyo nozongunya tjimuna mamu ya komuteye woveta?* 53  Ami tji mba ri pu na eṋe mondembeli eyuva arihe, eṋe kamu twakere omake yeṋu kombanda yandje okundjikambura. Posi ya oiri ndji oyeṋu nonḓorera okuhonapara.” 54  Okuzambo owo ve mu kambura nave mu twara, nu owo ve mu eta mondjuwo yomupristeri omunene, posi ya Petrus aa kongorere okuza kokure. 55  Indu tji va yakisa omuriro mondivitivi yorumbo nave haama pamwe, Petrus wa haamene mokati kawo. 56  Posi ya omuatje omukazona ngwa ri omukarere, tje mu muna aa haama pomuriro, we mu tara nawa na tja: “Omurumendu ngwi wina wa ri pu na ye.” 57  Posi ya eye wa pataṋa na tja: “Mukazendu, ami hi nokumutjiwa.” 58  Kombunda yokaruveze okasupi omundu warwe we mu muna na tja: “Ove wina oove umwe wawo.” Posi ya Petrus wa tja: “Murumendu, ami kawami umwe wawo.” 59  Nu kombunda yoiri, omurumendu warwe aa ṋiṋikiza nomasa kutja: “Tjiri omurumendu ngwi wina wa ri pu na ye, orondu eye tjinga e ri Omugalilea.” 60  Posi ya Petrus wa tja: “Murumendu, ami hi nokutjiwa kutja mo hungire ovikwaye.” Nu tjimanga, ngunda ama hungire, ohunguriva ondwezu ya vandara. 61  Ku nao Muhona wa tanauka na tara ongarate ku Petrus, nu Petrus wa zemburuka omambo Muhona nge mu raera indu tja tja ku ye: “Ngunda ohunguriva ondwezu ai hi ya vandara ndino, ove mo ndji pataṋa povikando vitatu.” 62  Nu eye wa ya pendje na karira tjinene. 63  Ovarumendu mba kamburire Jesus va uta okumunyekerera, nokumutona, 64  nu tji va za nokukutjira omurungu we, owo aave mu pura kutja: “Ndoovazu oove omuprofete, tu raera kutja ouṋe ngwe ku tono.” 65  Nu owo va hungira oviṋa ovingi ovivi ku Jesus mbyaavi yamburura Mukuru. 66  Nu meyuva ependukirwa, ovarumendu ovanene votjiwaṋa, pamwe novapristeri oviuru, novahonge vomatwako va worongana pamwe nave mu twara ketuwo rOsanhedrin* nave tja: 67  “Ndoovazu oove Kristus, tu raera.” Posi ya eye wa tja ku wo: “Nandarire kutja mbe mu raere, eṋe kamaamu kambura ko. 68  Nu wina indu tji mbe mu pura, eṋe kamaamu ziri. 69  Posi ya okuza ku nai, Omuna womundu ma kahaama meṋe keke rokunene kwa Mukuru omunamasa.” 70  Owo avehe va tja: “Pu mape hee kutja, oove Omuna wa Mukuru? Eye wa tja ku wo: “Eṋe oveni mwa tja owami Omuna wa Mukuru.” 71  Owo va tja: “Omahongononeno wokomurungu ngu matu hepa owaye? Orondu eṱe twe rizuvire oveni okuza motjinyo tje omuini.”

Omambo wokehi

^ Omana wapeke nga omana wondjozikiro nge yandjewa kovandu mbe tjitira varwe oviṋa, tjimuna okuvepa ovimariva.
^ Poo “ngwa haama potjitiha.”
^ Poo “ngu ma karere?”
^ Poo “ngwa haama potjitiha?”
^ Poo “ngu ma karere.”
^ Poo “na imba mbe hi noveta.”
^ Poo “komupunde?”
^ OSanhedrin ya ri otjombanguriro otjinene tjOvajuda.

Ousemba wokuherengurura embo ndi