Evangeli ra Lukas 5:1-39
5 Otjikando tjimwe indu otjimbumba tjovandu tji tje mu koverere nokupuratena kembo ra Mukuru, eye wa kuramene meṋe yeo romeva ra Genesaret.*
2 Eye wa muna ouyaha uvari mbwa kuramene meṋe yeo romeva, posi ya ovapate vomahundju tjandje va heruka nu aave koho ozonete zawo.
3 Eye wa ronda mokayaha kemwe ku ka ri oka Simon, ne mu ningire kutja e ke undure kaṱiṱi kokure nomukuro. Eye wa haama mu ko, na utu okuhonga otjimbumba tjovandu okuza mokayaha.
4 Indu tja mana okuhungira, eye wa tja ku Simon: “Undura okayaha poruveze pu pe ri opakoto, nu mu yumbe ozonete zeṋu kutja mu pate omahundju.”
5 Posi ya Simon wa zira a tja: “Muhonge, eṱe twa kondjo okupata omahundju ouṱuku auhe, nu katu munine otjiṋa, posi ya otja kembo roye ami me yumbu ozonete.”
6 Indu tji va tjita nao, owo va kambura* omahundju omengi tjinene. Nu ozonete zawo za uta okutauka.
7 Ku nao owo va ṋanga ovakwao mba ri mokayaha inga okarwe kutja ve ye okuvevatera, nu owo ve ya nave urisa ouyaha auyevari ngandu tji wa uta okuṱomwina.
8 Nu Simon Petrus tja muna otjiṋa hi, eye wa wa pehi kozongoro komurungu wa Jesus, na tja: “Za po pwami Muhona, mena rokutja owami omurumendu omunauvi.”
9 Orondu eye na imba mba ri pu na ye va himisirwe tjinene i yotjivarero otjingi tjomahundju tji va kambura,
10 nu Jakobus na Johanes ovanatje va Sebedeus, mba ri pu na Simon, wina va himinwe. Posi ya Jesus wa tja ku Simon: “Isa okutira. Okuza ku nai ove mo pata ovandu mbe nomuinyo.”
11 Owo va kotora ouyaha komukuro nave isa oviṋa avihe nave mu kongorere.
12 Otjikando tjarwe ngunda e ri motjihuro tjimwe, pa ri nomurumendu ngwa verere ongana ndja handjaukire morutu rwe. Indu tja muna Jesus, eye wa wa pehi kozongoro ne riheke kutja: “Muhona, tji mo vanga, mo yenene okundjiverukisa.”
13 Ku nao, Jesus wa roporora okuwoko kwe, e mu ṱunu na tja: “Ami me vanga. Veruka.” Tjimanga omutjise wongana wa pita mu ye.
14 Okuzambo eye wa raera omurumendu kutja a ha raere omundu, posi ya wa tja ku ye: “Twende u keriraise kovapristeri, nu u kayandje otjiyandjewa otja kOmatwako wa Moses, kokutja i rire omahongononeno ku wo kutja wa veruka.”
15 Posi ya ombuze ohunga na ye aa i handjaukire ko, nu ovimbumba ovinene vyovandu aavi worongana pamwe okupuratena ku ye nokuverukisiwa komitjise vyawo.
16 Posi ya, eye povikando ovingi aa i kotuveze tu twa ri kokure novandu okukakumba.
17 Eyuva rimwe ngunda Jesus ama hongo, Ovafarisei na imba mbaave hongo Omatwako mba zire movirongo avihe vya Galilea na Judea na moJerusalem va haamene mbo, nu Jehova* we mu pa omasa okuverukisa.
18 Nu tara, ovarumendu va toorere omurumendu ngwa verere kokambete, nu owo aave kondjo okumuhitisa moukoto nokumutwa komurungu wa Jesus.
19 Indu tji ve hi na va muna omuano wokumuhitisa mondjuwo mena rotjimbumba tjovandu, owo va ronda komututu nave mu hitisire mondovi yomututu e ri kokambete* nokumutwa mokati kaimba mba ri komurungu wa Jesus.
20 Indu tja muna ongamburiro yawo, eye wa tja: “Murumendu, omauvi woye ya isirwa.”
21 Nu ovahonge vomatwako nOvafarisei va uta okurihungirira oveni kutja: “Omundu waye ngwi ngu ma yamburura Mukuru nai? Ouṋe warwe ngu ma yenene okuisira omauvi pendje na Mukuru erike?”
22 Posi ya Jesus aa tjiwa oviṋa mbi mave ripura nu eye we ve zira a tja: “Ovikwaye mbi mamu ripura momitima vyeṋu?
23 Oupupu okutja, ‘Ami mbe ku isire omauvi woye.’ Posi ya hapo omundu auhe ma yenene okutja nai komurumendu ngwi, ‘Sekama u kawondje,’ nu okuzambo eye a sekama a kawondja?
24 Posi ya ami me vanga kutja mu tjiwe kutja Omuna womundu wa pewa ouvara kombanda yehi okuisira omauvi.” Okuzambo wa tja nai komurumendu omuremane: “Ami me ku raere kutja, sekama, u toore okambete* koye, nu u yende koyoye.”
25 Nu eye wa sekama momurungu wawo, a toora imbi mbyaa ri a rara ko, nu a i koye ama yandja ondjozikiro ku Mukuru.
26 Owo avehe va temenwe nave utu okuyandja ondjozikiro ku Mukuru. Nu owo va urumine nave tja: “Eṱe twa munu oviṋa ovihimise ndinondi!”
27 Nu kombunda yoviṋa mbi, eye wa pita na kamuna omusutise wotjimariva tjouhona wena Levi, a haama pomberoo paape sutirwa otjimariva tjouhona, neye wa tja ku ye: “Ndji kongorera.”
28 Nu eye wa sekama, a isa oviṋa avihe kongotwe na utu okukongorera Jesus.
29 Okuzambo Levi we mu tjitira omukandi omunene mondjuwo ye, nu pa ri otjimbumba otjinene tjovasutise votjimariva tjouhona novandu varwe mbaave ri* pu na ye.
30 Nu Ovafarisei novahonge vawo vomatwako va uta okuunauna kovahongewa ve, amave tja: “Omena raye tji mamu ri nokunwa pu novasutise votjimariva tjouhona novatjite vouvi?”
31 Jesus we ve zira a tja: “Imba ovaveruke kave hepa onganga, posi ya owomba mba vera.
32 Ami mbe era okuisana ovandu ovanauvi kondanaukiro, nungwari kavandu ovasemba.”
33 Owo va tja ku ye: “Ovahongewa va Johanes popengi ve ritjaera kovikurya nokukumba ozongumbiro zomeriyarikaṋeno nu ovahongewa vOvafarisei wina ve tjita nao, posi ya imbo voye ve rya nokunwa.”
34 Jesus we ve zira na tja: “Eṋe kamaamu yenene okutjita kutja omapanga womukupe ye ritjaere kovikurya ngunda omukupe e ri pu na wo.
35 Posi ya omayuva maye ya indu omukupe tjiri tji ma isapewa pu wo, nu momayuva ngo otji mave ritjaere kovikurya.”
36 Eye wina wa yandja omasasanekero ku wo na tja: “Kape nomundu ngu konda erapi okuza kombanda ombe ne ri yatata kombanda onguru. Eye tja tjiti nao, erapi epe mari tauka nu erapi rombanda ombe kari nokuhitasana ku nombanda indji onguru.
37 Wina kape nomundu ngu tirira omavinu omape mondjaṱu* onguru yomavinu. Indu tja tjiti nao, omavinu omape maye pamuna ondjaṱu yomavinu, nu oyo maye tikire pehi nu ondjaṱu yomavinu ai ha ungurisiwa rukwao.
38 Posi ya omavinu omape maye sokutirirwa mozondjaṱu ozombe zomavinu.
39 Kape nomundu ngu nwa omavinu omakuru, okuzambo a vanga inga omape, orondu eye u tja, ‘Inga omakuru omawa.’”
