“SALAMAT.” Indi bala nga nanamian kita mamati sini nga tinaga bilang pasalamat sa aton maayo nga hinimuan ukon sa regalo nga aton ginhatag? Gusto naton tanan nga apresyahon ang aton mga ginahimo, ilabi na sang aton mga hinigugma. Siempre, ginahigugma naton si Jehova nga Dios labaw sa tanan. Ginaapresyar bala niya ang aton pag-alagad sa iya? Usisaon naton ang iya pagpakig-angot kay Ebed-melec, ang tawo nga nagrisgo sang iya kabuhi para luwason ang isa ka propeta sang Dios.—Basaha ang Jeremias 38:7-13 kag 39:16-18.

Sin-o si Ebed-melec? Mahimo nga isa sia ka opisyal sa korte ni Hari Sedequias sang Juda. * Kadungan sia ni Jeremias, ang ginpadala sang Dios para paandaman ang indi matutom nga Juda nga lapit na lang ini laglagon. Bisan pa napalibutan sia sang indi diosnon nga mga prinsipe, mahinadlukon sia sa Dios kag nagarespeto gid kay Jeremias. Natilawan ang diosnon niya nga mga kinaiya sang butig nga gin-akusahan si Jeremias sang sedisyon kag ginhulog sa lunangon nga bubon para mapatay. (Jeremias 38:4-6) Ano ang himuon ni Ebed-melec?

Maisog kag malig-on sia, kag wala sia nahadlok nga balusan sang mga prinsipe. Ginpalapitan niya si Sedequias sa publiko kag nagreklamo sa indi makatarunganon nga pagtratar kay Jeremias. Mahimo nga samtang ginatudlo niya ang mga naghimo sadto, ginsilingan niya ang hari: “Ini nga mga tawo naghimo sing malaut . . . kay Jeremias.” (Jeremias 38:9) Nagmadinalag-on sia kag, sa sugo ni Sedequias, gin-upod niya ang 30 ka lalaki para luwason si Jeremias.

Ang isa pa ka kinaiya nga ginpakita ni Ebed-melec amo ang kaayo. Nagkuha sia sang “mga lapat kag mga panapton nga gision, kag gintonton sila sa mga lubid kay Jeremias.” Ngaa mga lapat kag panapton ang iya gingamit? Para indi masakitan ang ilok ni Jeremias samtang ginabatak sia halin sa lunangon nga bubon.—Jeremias 38:11-13.

Nakita ni Jehova ang ginhimo ni Ebed-melec. Gin-apresyar bala Niya ini? Paagi kay Jeremias, ginsilingan sia sang Dios nga malapit na lang laglagon ang Juda. Dayon ginhatagan sia sang Dios sang lima ka garantiya sang kaluwasan. Si Jehova nagsiling: “Luwason ko ikaw . . . Indi ikaw itugyan sa kamut sang mga tawo . . . Sa pagkamatuud luwason ko ikaw . . . Indi ka mapukan sa espada . . . Ang imo kabuhi mangin-inagaw sa imo.” Ngaa nagpromisa si Jehova nga luwason niya si Ebed-melec? Si Jehova nagsiling sa iya: “Bangud nga nagsalig ka sa akon.” (Jeremias 39:16-18) Nahibaluan ni Jehova nga ginhimo niya yadto indi lamang bangod nabalaka sia kay Jeremias kundi bangod nagasalig sia kag nagatuo sa Dios.

Maathag ang leksion: Ginaapresyar ni Jehova ang aton mga ginahimo sa pag-alagad sa iya. Ginapasalig kita sang Biblia nga ginadumdom niya bisan ang pinakagamay nga nahimo naton sa pagsimba sa iya nga may daku nga pagtuo. (Marcos 12:41-44) Gusto mo bala mangin suod sa Dios nga nagaapresyar sa imo mga hinimuan? Kon amo, makasalig ka nga tumanon niya ang ginasiling sang iya Pulong: “Ginapadyaan niya ang mga nagapangita sa iya sing hanuot.”—Hebreo 11:6.

Bahin sang Biblia nga Mahimo Basahon sa Mayo:

▪ Jeremias 32-50

[Nota]