Sala Bala Maggamit sang Ngalan sang Dios?

SA ORIHINAL nga Hebreong Kasulatan, nga masami ginatawag man nga “Daan nga Katipan,” ang ngalan sang Dios makit-an sing halos 7,000 ka beses sa porma nga יהוה (ginabasa halin sa tuo pakadto sa wala). Buot silingon, ang ngalan sang Dios ginarepresentar sang apat ka Hebreong mga letra nga Yohdh, He, Waw, kag He. Kinaandan ini nga ginabadbad sing letra por letra nga YHWH.

Sang una, nangin disparatis sang mga Judiyo nga sala maggamit sang ngalan sang Dios. Bangod sini, wala na nila ginsambit ini nga ngalan kag naggamit na lang sing tal-us nga mga ekspresyon sa ila mga sinulatan. Apang, madamo nga manugbadbad sang Biblia ang naggamit sang ngalan nga “Yahweh,” ukon “Jehova.” Lakip sa mga badbad nga nagahimo sini amo ang Biblia sang Katilingban sang mga Kristiano, Katoliko Pastoral Edisyon. Suno sa sini nga pagbadbad, sang ginpamangkot ni Moises ang Dios kon ano ang iya isiling sa mga Israelinhon kon mamangkot sila kon sin-o ang nagpadala sa iya, ang Dios nagsiling: “Isiling mo ini sa mga anak sang Israel: ‘Si YAHWEH nga Dios sang inyo mga katigulangan, ang Dios ni Abraham, ang Dios ni Isaac kag ang Dios ni Jacob ang nagpadala sa akon.’ Ini ang akon ngalan sa walay katubtoban, kag sa sini nga ngalan sila magatawag sa akon sa tanan nga mga kaliwatan.”​—Exodo 3:15.

Samtang nagapangamuyo, ginsambit ni Jesus ang iya mismo paggamit sang ngalan sang Dios: “Ginpakilala ko ang imo Ngalan sa ila, kag padayunon ko ang pagpakilala sini.” Kag sa pangamuyo nga nakilal-an nga Amay Namon, nagsiling si Jesus: “Amay namon nga yara sa langit, pakabalaanon ang Ngalan mo.”​—Juan 17:26; Mateo 6:9, Biblia sang Katilingban sang mga Kristiano.

Apang mahimo matingala ka kon mahibaluan mo nga sa bag-o nga libro ni Papa Benedict XVI nga Jesus of Nazareth, amo ini ang iya ginsiling nahanungod sa paggamit sang ngalan sang Dios: “Ang mga Israelinhon . . . husto gid sa paglikaw nga sambiton ang ngalan nga ginagamit sang Dios para sa iya kaugalingon, ang YHWH, agod malikawan nila nga pakanubuon ini kaangay sang mga ngalan sang pagano nga mga diosdios. Sa amo man nga paagi nagsala ang bag-o nga mga manugbadbad sang Biblia nga gamiton ini nga ngalan nga daw pareho lang sang iban nga dinumaan nga mga ngalan, kay ginatamod ini sang mga Israelinhon nga makatalanhaga kag indi mamitlang.”

Ano sa banta mo? Husto bala ukon sala maggamit sang ngalan sang Dios? Kon si Jehova mismo ang nagsiling nga: “Ini ang akon ngalan sa walay katubtoban, kag sa sini nga ngalan sila magatawag sa akon sa tanan nga mga kaliwatan,” sin-o bala ang may kinamatarong nga magsupak sa iya?

[Piktyur sa pahina 30]

Gingamit ni Jesus ang ngalan sang Dios