Kadalag-an sa Korte sang Tawhanon nga Kinamatarong sa Europa

SANG Enero 11, 2007 ang Korte sang Tawhanon nga Kinamatarong sa Europa sa Strasbourg, Pransia, hilisugot nga nagdesisyon pabor sa mga Saksi ni Jehova sa Rusya tuhoy sa ila kaso batok sa Pederasyon sang Rusya. Ginsakdag sini nga desisyon ang kahilwayan sa relihion para sa mga Saksi ni Jehova kag sa ila kinamatarong para sa walay ginadampigan nga bista. Binagbinagon naton kon ngaa nakadangat ini sa korte.

Ang kalabanan nga katapo sang isa ka kongregasyon sang mga Saksi ni Jehova sa siudad sang Chelyabinsk, Rusya, mga apa. Ang ila duog tilipunan isa ka pasilidad nga gin-arkilahan sa isa ka eskwelahan. Sang Domingo, Abril 16, 2000, gintublag sang babayi nga Komisyoner sang Human Rights Commission sang rehiyon upod sang duha ka mataas nga opisyal sang pulisiya kag sang isa pa ka nakasibilyan ang ila miting. Bangod indi nila luyag ang mga Saksi, ilabi na sang Komisyoner, ginpauntat nila ang miting sa sayop nga mga panumbungon nga supak ini sa kasuguan. Sang Mayo 1, 2000, ginkanselar ang kontrata sa paggamit sa awditoryum.

Ginpasaka sang mga Saksi ni Jehova ang kaso sa piskal sang Chelyabinsk, apang wala ini sing resulta. Ang Konstitusyon sang Rusya kag ang Convention for the Protection of Human Rights and Fundamental Freedoms nagagarantiya sing kahilwayan sa relihion kag kahilwayan sa pagtipon. Gani gindangop nila ang kaso sa korte sang distrito, dayon gin-apelar ini sa korte sang rehiyon. Antes sini, sang Hulyo 30, 1999, ang korte suprema nagdesisyon sa isa pa ka kaso nga “suno sa Kasuguan sang Rusya tuhoy sa kahilwayan sa konsiensia kag relihioso nga mga pagtipon, ang dinalan nga ‘wala sing upang’ nagakahulugan nga indi na kinahanglan ang permiso, ukon pahanugot, sang mga awtoridad sa paghiwat sing relihioso nga mga seremonya sa mga duog-tilipunan [para sa sina nga katuyuan].” (Ila ang mga braket.) Bisan pa sa sini, gindismis gihapon sang korte sang distrito kag rehiyon ang kaso.

Sang Disiembre 17, 2001, ginpasaka ang kaso sa Korte sang Tawhanon nga Kinamatarong sa Europa. Ginhiwat ang bista sang Septiembre 9, 2004. Ang masunod amo ang pila ka bahin sang pamatbat sang Korte:

“Nasapwan sang Korte nga gintapakan ang kinamatarong sang aplikante sa kahilwayan sa relihion kay sang Abril 16, 2000, ginpauntat sang mga opisyal sang Estado ang ila relihioso nga pagtilipon bisan nga wala pa ini matapos sa gintalana nga tion.”

“Wala sing legal nga basihan ang pagpauntat sa relihioso nga pagtilipon sa pasilidad nga legal nga gin-arkilahan para sa sini nga katuyuan.”

“Nakita [sang Korte] nga suno sa mga nadesisyunan na nga mga kaso sa Korte Suprema sang Rusya, indi na kinahanglan nga mangayo pa sing pahanugot ukon pahibaluon ang mga awtoridad kon maghiwat sing relihioso nga mga pagtinipon.”

“Gani ginlapas nila ang Artikulo 9 [kahilwayan sa relihion] sang Convention bangod gintublag sang Komisyoner kag sang iya mga kaupod ang relihioso nga miting sang aplikante sang Abril 16, 2000.”

“Nasapwan sang Korte nga ang mga korte sa distrito kag rehiyon wala naghimo sang ila katungdanan . . . nga pamatian ang duha ka partido sa walay nadampigan nga paagi. Nalapas . . . ang Artikulo 6 [kinamatarong sa walay nadampigan nga bista] sang Convention.”

Nagapasalamat gid ang mga Saksi ni Jehova sa Dios sa paghatag sa ila sing kadalag-an sa Korte sang Tawhanon nga Kinamatarong sa Europa. (Salmo 98:1) Ano ang epekto sining desisyon sang Korte? Si Joseph K. Grieboski, presidente sang Institute on Religion and Public Policy, nagsiling: “Isa naman ini ka importante nga desisyon nga nagaapektar sa kahilwayan sa relihion sa bug-os nga Europa, kay ini nga desisyon may daku nga epekto sa mga kinamatarong sang mga relihion sa tanan nga estado nga sakop sang Korte sang Tawhanon nga Kinamatarong sa Europa.”