Magdiretso sa kaundan

Magdiretso sa listahan sang kaundan

‘Tabok Kamo kag Tabangi Kami’

‘Tabok Kamo kag Tabangi Kami’

 Report sang Mga Manugbantala sang Ginharian

‘Tabok Kamo kag Tabangi Kami’

SANG Hulyo 2000, gin-agda ang nagahambal sing Aleman nga mga Saksi sa Alemanya, Austria, kag Switzerland nga magsaylo sa Bolivia. Ngaa? Bangod sa nabaw-ing nga mga kaumhan sa sulod sang 300 ka kilometro nga kalayuon halin sa sentro sang Santa Cruz, Bolivia, nagpakita sing daku nga interes sa Biblia ang nagahambal sing Aleman nga mga Mennonite.

Mga 140 ka Saksi ang nagsabat sa pangagda. Ang iban nagtener sing pila ka semana, ang iban sa sulod sang isa ka tuig ukon kapin pa. Sa paghimo sini, ginpakita nila ang kaanggid nga espiritu sang unang siglo nga mga misyonero nga nagsabat sa panawagan: “Tabok [kamo] sa Macedonia kag tabangi kami.”—Binuhatan 16:9, 10.

Kamusta ang pagpanaksi sa sini nga teritoryo? Paathag sang isa ka gulang sa kongregasyon didto: “Ang paglakbay pakadto sa isa sang 43 ka kaumhan sang mga Mennonite mahimo maglawig sing walo ka oras sa di-sementado nga mga dalan kon nagasakay sa four-wheel-drive nga salakyan. Agod maduaw ang mas malayo nga mga parte sini, kinahanglan ang pagbiyahe sing apat ka adlaw kag pagtulog sa mga tolda sa pila ka gab-i. Apang takus gid ini sa panikasog, kay ini nga mga tawo wala pa gid anay makabati sang maayong balita.”

Sa primero, madamo nga Mennonite ang indi luyag duawon. Apang sa pagbalikbalik, ginbaton nila sing malipayon ang ginatanyag sang mga Saksi. Halimbawa, ang isa ka mangunguma nagsiling nga isa ka tuig na niya nga ginabasa ang magasin nga Magmata! Nagsiling sia dayon: “Nahibaluan ko nga madamo nga tawo diri ang wala nagapati sa inyo ginasiling, apang nagapati ako nga kamatuoran ini.” Sa isa pa ka uma, ang isa ka tawo nagsiling: “Ang iban sa akon mga kaingod nagsiling nga butig kamo nga mga propeta, ang iban naman nagasiling nga yara sa inyo ang kamatuoran. Luyag ko ini mismo mahibaluan.”

May isa na karon ka nagahambal sing Aleman nga kongregasyon sa Bolivia, nga may 35 ka manugbantala, lakip ang 14 ka bug-os tion nga mga ebanghelisador. Sa karon, 14 ka Mennonite anay ang nangin mga manugbantala sang Ginharian, kag 9 pa ang regular nga nagatambong sa mga miting. Ang isa ka tigulang nga lalaki nga nabawtismuhan sining karon lang nagsiling: “Makita gid namon ang panuytoy ni Jehova. Nagpadala sia sing eksperiensiado nga mga kauturan nga nagahambal sing Aleman agod buligan kami. Nagapasalamat gid kami sa sini.” Ang 17-anyos nga bata nga babayi sini nga lalaki, nga nabawtismuhan man, nagdugang: “Makalalaton ang kakugi sang pamatan-on nga mga kauturan nga nagsaylo diri. Ang kalabanan sa ila mga payunir, nga nagagamit sang ila tion kag kuarta sa pagbulig sa iban. Luyag ko man nga ilugon sila.”

Sa pagkamatuod, ang mga nagpanikasog nga ‘magtabok’ agod magbulig may daku nga kalipay kag kaayawan.