Magdiretso sa kaundan

Magdiretso sa listahan sang kaundan

Mga Pamangkot Gikan sa mga Bumalasa

Mga Pamangkot Gikan sa mga Bumalasa

 Mga Pamangkot Gikan sa mga Bumalasa

Ngaa gintugutan sang matutom nga alagad ni Jehova nga si David ang iya asawa nga si Mical nga maghupot sing isa ka terapim nga imahen, ukon idolo, subong sang ginpakita sa 1 Samuel 19:12, 13?

Una, usisaon anay naton sing malip-ot ang konteksto. Sang nabalitaan sang asawa ni David ang plano ni Hari Saul nga patyon si David, naghulag sia gilayon. Ang Biblia nagasiling: “Gintunton ni Mical si David sa talambuan; kag naglakat sia kag nagpalagyo kag naglikaw. Si Mical nagkuha sang terapim [mahimo nga daw tawo kadaku] kag ginpahigda ini sa higdaan kag ginpaulon sa ulunan nga bulbol sang mga kanding, kag gintabunan niya ini sang mga panapton.” Sang nag-abot ang mga mensahero ni Saul agod dakpon si David, ginsugiran sila ni Mical: “Nagabalatian sia.” Ining pahito naghatag sing tion kay David agod makapalagyo.​—1 Samuel 19:11-​16.

Ginapakita sang arkeolohiko nga mga tukib nga sang dumaan nga mga tion, ang terapim nga mga imahen wala lamang ginagamit para sa relihioso nga katuyuan kundi pati man sa legal nga mga katuyuan. Kon sa karon nagagamit kita sing mga titulo kag nasulat nga mga testamento subong pamatuod sang aton kinamatarong sa mga palanublion, amo man anay sini ang gamit sang terapim nga mga imahen sang dumaan nga mga tion. Mahimo nga ang pagpanag-iya sang terapim, sa pila ka kahimtangan, nagahatag sa umagad nga lalaki sing kinamatarong nga panublion ang mga ginapanag-iyahan sang iya napatay nga ugangan nga lalaki. Mahimo nga ginapaathag sini kon ngaa ginkuha anay ni Raquel ang terapim nga mga imahen sang iya amay kag kon ngaa ginhimud-usan gid sang iya amay nga mabawi ini. Sadto nga sitwasyon, wala nakahibalo ang bana ni Raquel nga si Jacob sa ginhimo sang iya asawa.​—Genesis 31:14-​34.

Sang nangin isa na ka pungsod ang mga Israelinhon, nabaton nila ang Napulo ka Sugo, diin ang ikaduha sa sini espesipiko nga nagdumili sa paghimo sing mga idolo. (Exodo 20:​4, 5) Sang ulihi, ginpatuhuyan ni manalagna Samuel ini nga kasuguan sang nagpamulong sia kay Hari Saul. Sia nagsiling: “Kay ang pagbato [“pagrebelde,” NW] subong sang sala sang pagkababaylan, kag ang pagkabatinggilan subong sang pagkadiwatahan kag mga terapim.” (1 Samuel 15:23) Amo sini ang rason kon ngaa ang terapim wala sadto gingamit sa Israel may kahilabtanan sa mga palanublion. Walay sapayan, ining sahi sang Judiyong disparatis maathag nga nagpadayon sa pila ka panimalay sa Israel. (Hukom 17:​5, 6; 2 Hari 23:24) Ang paghupot ni Mical sang terapim nga imahen nagapakita nga ang iya tagipusuon indi bug-os kay Jehova. Mahimo nga wala nakahibalo si David tuhoy sa terapim nga imahen ukon mahimo nga gintugutan niya ini bangod si Mical anak nga babayi ni Hari Saul.

Ang pagtamod ni David sa eksklusibo nga debosyon kay Jehova ginpahayag sa sining mga pulong: “Kay si Jehova daku kag takus gid nga dayawon, kag sia takus kahadlukan labaw sa tanan iban nga mga dios. Kay ang tanan nga dios sang mga katawhan wala-balor nga mga dios. Kon tuhoy kay Jehova, ginhimo niya ang mga langit.”—1 Cronica 16:25, 26, NW.

[Retrato sa pahina 29]

Ang ikaduha sa Napulo ka Sugo nagdumili sa paghimo sing mga idolo, subong sang terapim nga ginapakita diri

[Credit Line]

From the book The Holy Land, Vol. II, 1859