Ang Pagtuluuhan Bala Dapat Napasad sa Pangatarungan?

“Madamo katama sing ‘relihioso’ nga mga tawo ang nangin debotado bangod indi na nila luyag magpalibog,” sulat sang dekano sang isa ka seminaryo sang teolohiya sa Estados Unidos. “Basta na lang nila ginapatihan ang tanan ‘bisan wala na sing pamatuod,’ ” siling pa niya.

ANG punto amo nga kalabanan sang mga tawo nga nagapangangkon nga may relihion wala na nagahunahuna sang mga rason kon ngaa ginapatihan nila ang ila ginatuuhan ukon kon may makatarunganon gid bala nga sadsaran ang ila pagtuo. Indi katingalahan nga madamo ang wala na sing gana makigsugilanon tuhoy sa relihion.

Sing makapasubo, ang mga buhat kaangay sang paggamit sing relihioso nga mga imahen kag pagsulitsulit sang saulado nga mga pangamuyo nagasikway man sang pagpangatarungan. Ining mga buhat, upod ang matahom nga mga arkitektura, de-kolor kag kristal nga mga bintana, kag makatalandog nga mga musika, daw amo ang nalakip sa mga relihion sang minilyon. Bisan pa ginapangangkon sang mga simbahan nga ang ila pagtuo napasad sa Biblia, ang ila mensahe nga ‘magpati kay Jesus kag sa amo luwas ka na’ wala nagapalig-on sang serioso nga pagtuon sing Biblia. Ang iban nagliso sa pagbantala sing isa ka sosyal ukon politikal nga ebanghelyo. Ano ang resulta sining tanan?

Tuhoy sa sitwasyon sa Aminhan nga Amerika, isa ka manunulat tuhoy sa relihion ang nagsiling: “Ang Cristianismo . . . labi nga nangin pakitakita na lamang, [kag] ang mga sumulunod sini wala matudluan sing maayo sa pagtuo.” Isa pa gani ka manugsurbe ang naglaragway sa Estados Unidos subong “pungsod sang mga wala namang-an sa Biblia.” Agod mangin wala sing ginadampigan, ini nga obserbasyon naaplikar man sa iban nga pungsod diin nagapanguna ang ginatawag nga Cristianismo. Madamo sang di-Cristiano nga mga relihion ang nagasikway man sa pagpangatarungan kag sa baylo nagapadaku sa pagkanta, rituwalistiko nga mga pangamuyo, kag nanuhaytuhay nga porma sang pagpamalandong nga nagadalahig sing mistisismo, sa baylo sang makatarunganon kag makapalig-on nga panghunahuna.

Apang, sa ila adlaw-adlaw nga pagkabuhi, ang amo man nga mga tawo nga wala nagausisa sing maayo sa pagkasibu ukon sa pagkamatuod sang ila relihiosong pagtuluuhan masami nagausisa gid sing mahalungon sang iban nga mga butang. Indi ka bala matingala sa tawo nga nagahimo sing masangkad nga pagpanalawsaw agod lamang sa pagbakal sing isa ka awto​—nga sa ulihi makadto lamang sa eskrapan​—magasiling tuhoy sa iya relihion, ‘Kon maayo ini para sa akon ginikanan, maayo man ini para sa akon’?

Kon interesado gid kita nga pahamut-an ang Dios, indi bala naton binagbinagon sing serioso ang pagkasibu sang aton ginapatihan tuhoy sa iya? Si Pablo nagsiling tuhoy sa relihioso nga mga tawo sang iya adlaw nga may “kakugi sila sa Dios; apang indi suno sa sibu nga ihibalo.” (Roma 10:2) Ini nga mga tawo mahimo mapaanggid sa isa ka ginasuhulan nga pintor nga nagapangabudlay gid sing lakas  sa pagpinta sa isa ka balay apang nagagamit sing indi amo nga mga kolor bangod wala sia namati sa instruksion sang tag-iya. Ang pintor mahimo manamian sa iya obra, apang manamian ayhan sa sini ang tag-iya?

Ano bala ang kalahamut-an sa Dios tuhoy sa matuod nga pagsimba? Ang Biblia nagasabat: “Ini maayo kag kalahamut-an sa itululok sang aton Manluluwas, ang Dios, nga ang iya kabubut-on amo nga ang tanan nga sahi sang tawo maluwas kag makadangat sa sibu nga ihibalo sang kamatuoran.” (1 Timoteo 2:​3, 4) Ang iban mahimo magbatyag nga imposible makita ini nga ihibalo sa kadamo sang relihion karon. Apang hunahunaa​—kon kabubut-on sang Dios nga ang mga tawo makadangat sa sibu nga ihibalo sang kamatuoran, taguon bala niya ini sa ila? Indi suno sa Biblia, kay ini nagasiling: “Kon pangitaon mo [ang Dios], tugutan niya nga makita mo sia.”​—1 Cronica 28:​9.

Paano ginapakilala sang Dios ang iya kaugalingon sa mga sinsero nga nagapangita sa iya? Ang masunod nga artikulo magahatag sing sabat.