EKSPERIENSIA NI DAMI

Sang primero, daw ordinaryo lang yadto nga sakit sang ulo. Pero sang naglala ang ginabatyag ni Tatay, nagtawag si Nanay sing ambulansia. Nadumduman ko pa sang ginsakay sia sa ambulansia. Amo na gali yadto ang katapusan nga tion nga makita ko sia nga buhi. Pagligad sang tatlo ka adlaw, napatay si Tatay bangod sa aneurysm. Anom ka tuig pa lang ako sadto.

Sa sulod sang mga tinuig, ginabasol ko ang akon kaugalingon sa pagkapatay ni Tatay. Ginaimadyin ko pirme ang natabo sadto sang ginasakay sia sa ambulansia, kag ginapamangkot ko ang akon kaugalingon: ‘Ngaa nagtindog lang ako? Ngaa wala ako sing may ginhimo?’ Ginatan-aw ko ang mga tigulang nga may balatian kag nagahunahuna ako, ‘Ngaa buhi sila pero si Tatay ’ya patay na?’ Sang ulihi, ginbuligan ako ni Nanay nga isugid ang akon ginabatyag. Kag bilang mga Saksi ni Jehova, ginbuligan gid kami sang kongregasyon.

Ang pila ka tawo nagasiling nga mahimo ka mangasubo sa tapos mismo sang trahedya kag dayon maumpawan ka na. Pero indi amo sina ang natabo sa akon, kay tin-edyer na ako sang nabatyagan ko ang grabe nga kasubo.

Amo ini ang akon masiling sa mga pamatan-on nga napatyan sing ginikanan: “Isugid sa iban ang inyo ginabatyag. Kon mapabutyag ninyo ini sing temprano, mas maayo ini para sa inyo.”

Mabudlay gid kay wala si Tatay sa importante nga mga hitabo sa akon kabuhi. Pero naumpawan ako sa promisa sang Biblia nga mabasa sa Bugna 21:4, nga nagasiling nga sa indi madugay “pahiran [sang Dios] ang tagsa ka luha sa [aton] mga mata, kag wala na sing kamatayon, ukon paglalaw ukon paghibi ukon kasakit pa.”

EKSPERIENSIA NI DERRICK

Ang pila sa masadya namon nga pag-updanay ni Tatay amo ang pagpamunit kag pagkamping sa bukid. Nanamian gid sia magkadto sa bukid.

May sakit sa tagipusuon si Tatay, kag nadumduman ko pa nga ginbisitahan ko sia sa ospital sing makaisa ukon makaduha ka beses sang bata pa ako. Pero wala ko sadto maintiendihan kon daw ano kalala ang iya balatian. Napatay si Tatay sa sakit sa tagipusuon sang siam ka tuig ako.

Sang napatay sia, grabe gid ang akon hibi. Daw indi ako makaginhawa, kag indi ko gusto mag-istorya bisan kay sin-o. Wala ko pa gid yadto nabatyagan, kag daw gusto ko na lang magpakuribong. Sang primero, ginbuligan ako sang grupo sang mga pamatan-on sa amon simbahan nga gin-entrahan ko, pero wala man yadto nagdugay. Ang mga tawo  didto nagasiling, “Tiempo na ina ni Tatay mo,” ukon “Gintawag na sia sang Dios,” ukon “Didto na sia sa langit subong.” Wala gid ako naumpawan sa ila ginsiling, kag wala man ako sing hinalung-ong sa ginatudlo sang Biblia parte sa sini.

Dayon nagtuon sang Biblia si Nanay sa mga Saksi ni Jehova, kag sang ulihi ako kag ang akon magulang nagtuon man. Natun-an namon ang kahimtangan sang mga patay kag ang makapaumpaw nga promisa sang Dios nga pagkabanhaw. (Juan 5:28, 29) Pero ang teksto nga nakabulig gid sa akon amo ang Isaias 41:10, diin ang Dios nagsiling: “Indi ka mahadlok, kay kaupod mo ako. Indi ka magkabalaka, kay ako imo Dios. Pabaskugon ko ikaw, huo, buligan ko ikaw.” Naumpawan gid ako sa paghibalo nga sa tion sang akon grabe nga kasubo kag asta subong, kaupod ko si Jehova.

EKSPERIENSIA NI JEANNIE

Sang pito ka tuig ako, napatay si Nanay sa kanser. Daw indi mapatihan ang natabo sadto nga adlaw. Nadumduman ko nga napatay sia sa balay kag ara si Lolo kag si Lola. Kalmado lang ang tanan. Nadumduman ko pa nga pinirito nga itlog ang amon sud-an sa panihapon. Pamatyag ko daw nagadamgo lang ako nga nagbag-o na ang akon kabuhi.

Sadto nga tion, kag sa mga tinuig pagkatapos sadto, abi ko kon kinahanglan ko nga magpakabakod para sa akon manghod, gani dapat ko taguon ang akon kasubo. Asta subong, amo gihapon ang akon ginahimo kon may masubo ako nga maeksperiensiahan, kag indi ina maayo.

Nadumduman ko ang gugma kag bulig sang kongregasyon sang mga Saksi ni Jehova sa amon lugar. Bisan pa bag-o lang kami nagatambong sa mga miting sa Kingdom Hall, ginbuligan nila kami nga daw madugay na kami nga miembro sang ila pamilya. Daw wala na gani si Tatay nakaluto sa bilog nga tuig kay pirme kami ginadul-ungan sang pagkaon.

Nadumduman ko gid ang teksto sa Salmo 25:16, 17, diin ang salmista nangabay sa Dios: “Talupangda ako kag kaluy-i, kay nagaisahanon lamang ako kag wala sing mahimo. Nagdamo ang mga kasakit sang akon tagipusuon; luwasa ako sa akon mga kalisdanan.” Naumpawan gid ako sa paghibalo nga kon nagakasubo ka, wala ka nagaisahanon. Kaupod mo ang Dios. Sa bulig sang Biblia, nalampuwasan ko ang kasubo kag nagpokus sa positibo nga mga butang, pareho sang makapaumpaw nga promisa sang Biblia nga pagkabanhaw. Nagalaum ako nga makita liwat si Nanay kag makilala pa gid sia nga wala na sing balatian sa paraiso nga duta.—2 Pedro 3:13.

Gusto mo bala makatuon sing dugang pa parte sa makapaumpaw nga mensahe sang Biblia para sa mga nagapangasubo? Mag-download sing libre nga kopya sang publikasyon nga “Kon ang Isa nga Ginahigugma Mo Mapatay.” Kadtui ang www.jw.org/hil, kag buksi ang PUBLIKASYON > LIBRO KAG BROSYUR.