Magdiretso sa kaundan

Magdiretso sa listahan sang kaundan

Ang Problema sa Relihion

Ang Problema sa Relihion

 Ang Problema sa Relihion

KON silingon naton nga relihion ang panguna nga rason sang tanan nga pag-ilinaway, buot silingon diutay lang ang inaway kon wala sing relihion. Husto ayhan ini? Madula bala naton ang inaway kon dulaon naton ang relihion? Ano man ang imo sabat, amo ini ang matuod: Ang relihion wala makapahiusa sa tawo. Binagbinaga ang pila ka rason kon ngaa.

Ginabahinbahin sang Relihion

Ang mga tawo nabahinbahin sang relihion, kag ang pila ka dalagku nga grupo sang relihion wala untat nga nagainaway. Maabot pa ayhan ang tion nga ang mga Budhista, Cristiano, Hindu, Judiyo, kag Muslim indi na mag-ilinaway?

Isa pa, ining dalagku nga mga relihion nabahinbahin man. Halimbawa suno sa pagbulubanta, ang Cristiandad nabahinbahin sa 30,000 ka denominasyon. Ang mga Islam naman may lainlain nga pagpati. Suno sa isa ka manugbalita sa Middle East, ginbaton sang Muslim nga iskolar nga si Mohsen Hojjat sining karon lang nga “ang panguna nga problema sa Islam amo ang indi pag-intiendihanay sang mga Muslim.” Ang iban pa nga relihion pareho sang Budhismo, Hinduismo, kag Judaismo, nabahinbahin man sa madamo nga sekta.

Relihion kag Pulitika

Ginaimpluwensiahan sang relihion ang halos bisan ano nga bahin sang aton kabuhi. Ang magasin nga The Economist nagsiling nga ‘prangka nga ginapabutyag sang relihioso nga mga tawo ang ila pagpati sa bisan diin, pati na sa negosyo kag ekonomiya.’ Gani, ang mga tawo nagabinahinbahin sa baylo nga mahiusa. Pero ang madugay na nga pagpasilabot sang relihion sa pulitika may mas malain nga epekto.

Suno sa isa ka report sining karon lang, nga ginsambit sang nagligad nga artikulo, ang isa ka grupo sang mga historian nagsiling nga ‘ang relihion mahimo halinan sang inaway kon magpasilabot ini sa pulitika.’ Kag indi naton manigar nga halin sang una asta subong, ang relihion nagapasilabot gid sa pulitika kag militar.

Makamamatay nga Kombinasyon

Sa madamo nga kadutaan, mabal-an mo ang rasa sang isa base sa relihion sang kalabanan sa sina nga lugar. Gani kon mag-ilinaway, indi mo mabal-an kon bala ang ginahalinan sini nasyonalismo, pag-ihig-ihig sa rasa ukon etniko nga grupo, kag relihion. Ining makamamatay nga kombinasyon makaguba sa aton kalibutan.

Pero daw indi mapatihan nga ang kalabanan sa sini nga relihion nagapangangkon nga nagarepresentar sa Manunuga, ang Dios sang Biblia. Rasonable bala nga basulon ang labing gamhanan, maalam, kag mahigugmaon nga Manunuga sa pagbinahinbahin kag pagpinatyanay nga nagakatabo bangod sa relihion?

[Retrato sa pahina 6]

Linibo ka Saksi ni Jehova ang ginpriso bangod neutral sila