Magdiretso sa kaundan

Magdiretso sa listahan sang kaundan

Ang Baliskad nga Retina

Ang Baliskad nga Retina

 May Nagdesinyo Bala Sini?

Ang Baliskad nga Retina

● Ang retina isa ka bahin sang aton mata nga nagaunod sing mga 120 milyones ka selula nga ginatawag photoreceptor. Ining mga photoreceptor amo ang nagakuha sang kasanag kag ginahimo ini nga mga electric signal. Ini nga mga signal ginahimo sang aton utok nga mga laragway. Nagasiling ang mga ebolusyonista nga ang pagplastar sang retina sa mga vertebrate, ukon mga tinuga nga may taludtod, nagapamatuod nga wala sing may nagdesinyo sa mata.

Binagbinaga: Ang retina sang mga vertebrate baliskad kay ang mga photoreceptor ara sa likod sang retina. Para makalab-ot ang kapawa sa photoreceptor, nagaagi pa ini sa pila ka sampaw sang mga selula. Suno sa evolutionary biologist nga si Kenneth Miller, “bangod sini nga plastada, ang kapawa nagalapta amo nga ang aton panan-aw indi gid amo sina ka detalyado.”

Gani suno sa mga ebolusyonista, ang baliskad nga retina ebidensia sang malaw-ay nga desinyo—ang matuod, wala gid sang desinyo. Ginatawag pa gani ini sang isa ka sientipiko nga “mapuslanon pero minango nga plastada.” Pero bangod sa dugang nga research, nahibaluan karon nga eksakto gid ang pagkaplastar sa mga photoreceptor sang baliskad nga retina. Ara ini sa tupad sang pigment epithelium nga isa ka bahin sang selula nga nagahatag sing oksiheno kag sustansia para sa maayo nga panulok. “Kon ang pigment epithelium ginbutang sa atubangan sang retina, maapektuhan gid ang aton panan-aw,” siling sang biologo nga si Jerry Bergman kag ophthalmologist nga si Joseph Calkins.

Ang baliskad nga retina mapuslanon gid para sa mga vertebrate nga magagmay ang mata. Si Ronald Kröger nga propesor sa University of Lund, Sweden nagsiling: “Dapat may eksakto nga distansia sa tunga sang lente sang aton mata kag sang mga photoreceptor para mangin klaro ang aton panulok. Sa sini nga distansia ginbutang ang mga nerve cells. Amo nga daku nga espasyo ang na-save sang mga vertebrate.”

Isa pa, bangod nagainikit-ikit ang mga nerve cell sang retina kag malapit ini sa mga photoreceptor, madasig kag masaligan ang pag-analisar sang mga butang nga makita.

Ano sa banta mo? Indi bala maayo ang plastada sang baliskad nga retina? Natabuan lang bala ini? Ukon may nagdesinyo sini?

[Diagram sa pahina 15]

(Para sa aktual nga pormat, tan-awa ang publikasyon)

Photoreceptor nga mga selula

Kapawa

Pigment epithelium

Kapawa

Retina

Optic nerve