Magdiretso sa kaundan

Magdiretso sa listahan sang kaundan

Ang Makatilingala nga Proseso sang Pagbata

Ang Makatilingala nga Proseso sang Pagbata

 Ang Makatilingala nga Proseso sang Pagbata

AMO na ini ang ginahulat naton! Pagkatapos sang siam ka bulan, magua na gid man ang bata. * Sa sulod sang malawig nga tion, ang cervix ukon puerta sang iloy sirado para indi mahulog ang bata. Pero subong, ang iya puerta naganipis, nagahumok, kag nagarelaks. Masugod na ang milagro sa pagbata.

Ano ang nagakatabo antes maggua ang bata? Madamo, pero duha sa sini ang makatilingala gid. Una, mapagua ang utok sang hormone nga oxytocin. Ang mga lalaki kag babayi may ara sini nga hormone. Pero mas madamo sini ang ginapagua sang nagabusong kon magpasakit na sia. Bangod sini, nagahitad ang puerta kag nagapamuersa ang matris.

 Indi mapaathag kon paano mahibaluan sang pituitary gland sang iloy nga tion na para ipagua ini nga hormone. Ang libro nga Incredible Voyage—Exploring the Human Body nagsiling: “Daw nahibaluan lang sang iya utok nga tapos na ang iya pagbusong kag kinahanglan na sang makusog nga mga maskulo sang matris . . . nga sugdan ang iya importante nga hilimuon.”

Ikaduha, ang inunlan mauntat na sa pagpagua sang progesterone. Sa tion sang pagbusong, ginapunggan sang progesterone nga magpamuersa ang matris. Pero bangod wala na sing progesterone, ang matris amat-amat naman nga nagapamuersa. Pagkatapos sang 8 asta 13 ka oras nga pagpasakit, ang bata ginatulod paggua sa naghitad nga puerta. Paggua sang bata, nagagua man ang inunlan.

Ang bag-o bun-ag nga bata kinahanglan nga maka-adjust dayon sa bag-o niya nga palibot, nga lain gid sangsa tiyan sang iya iloy. Halimbawa, sang ara pa sia sa tiyan, ang baga niya puno sing amniotic fluid. Ginapagua ini samtang nagagua ang bata sa birth canal. Kon ara na sia sa gua, dapat mapuno sang hangin ang iya baga para makaginhawa, masami nga mabal-an ini sa una niya nga paghibi. May pagbag-o man dayon nga nagakatabo sa iya tagipusuon kag circulatory system. Ang buho nga nagakonektar sa duha ka atria sang tagipusuon kag ang blood vessel nga indi konektado sa baga nagasira, para ang dugo makakadto na sa baga. Paagi sini, makakuha sing oksiheno ang dugo. Ini nga mga pagbag-o madasig lang nga nagakatabo.

Ang bilog nga proseso sang pagpasakit kag pagbata nagapahanumdom sa aton sa ginasiling sang Biblia: “May tagsa ka tion ang tanan nga buluhaton diri sa kalibutan.” Lakip na sa sini ang “tion sa pagkatawo.” (Manugwali 3:1, 2, Ang Pulong sang Dios, APD) Sigurado nga magaugyon ka nga ining mga pagbag-o sa hormones kag sa aton lawas, nga nagakatabo sa sulod lang sang pila ka oras, nagapakita sang matahom nga desinyo sang aton Manunuga nga ginatawag sang Biblia nga “tuburan sang kabuhi.”—Salmo 36:9; Manugwali 11:5.

[Nota]

^ par. 2 Ang pagbusong masami nga nagadugay sing 37 asta 42 ka semana.

[Diagram/Mga Retrato sa pahina 16, 17]

Proseso sang Pagbata

1 Posisyon sang bata antes sang pagpasakit

2 Ang bata nagapalapit sa birth canal

3 Nagahitad ang puerta

4 Paggua sang bata

[Diagram]

(Para sa aktual nga pormat, tan-awa ang publikasyon)

1

inunlan

kinatawo

puerta

2

3

4