Magdiretso sa kaundan

Magdiretso sa listahan sang kaundan

Makapaluntad Gid Bala sang Paghidait ang Relihion?

Makapaluntad Gid Bala sang Paghidait ang Relihion?

 Makapaluntad Gid Bala sang Paghidait ang Relihion?

“HIMUON ’ta ang kalibutan nga mas maayo nga lugar. Dulaon ’ta ang relihion.” Amo ini ang ginsiling sang Dutch nga philosopher nga si Floris van den Berg sa iya ginbalhag nga lektyur nga “How to Get Rid of Religion, and Why.” Bisan gani ang lainlain nga mga eksperto sa bilog nga kalibutan gusto man nga dulaon ang relihion.

‘Dapat magbugtaw na ang kalibutan sa ila relihioso nga pagpati nga wala sing pulos,’ siling sang nakakuha sang Nobel Prize kag physicist nga si Steven Weinberg. Sining karon lang, ginakampanya ang ideya nga magahaganhagan gid ang kalautan sa kalibutan kon dulaon ang relihion. Gani nagdamo kag nangin popular ang mga libro nga nagapakalain sa relihion.

Gin-istoryahan sang kilala nga mga sientipiko kon paano dulaon ang relihion. Nagadamo man ang mga ateista nga nagapabutyag sa media sang ila kaugot sa relihion. Husto bala ang ginahimo sining respetado kag maalam nga mga tawo?

Matuod nga Relihion?

Kon wala sing Dios kag ang tanan nga relihion butig, rasonable lang nga dulaon ang relihion. Pero ano abi kon may Dios? Ano abi kon may grupo sang mga tawo ukon matuod nga relihion nga nagatuman gid sa Dios?

Kon tun-an mo sing maayo ang kasaysayan sang mga relihion, may isa nga lain gid sa tanan. Ang mga sumulunod sini diutay lang. Gintukod ini ni Jesucristo kag sang iya mga apostoles. Ang ginahimo sini nga relihion malayo gid sa ginahimo sang Cristiandad halin sang una.

Ano ang kinalain sang Cristiandad kag sang matuod nga relihion nga gintukod ni Jesucristo? Madamo, binagbinagon naton ang isa sa sini.

“Indi Bahin Sini nga Kalibutan”

Ang una nga mga Cristiano wala nagaentra sa pulitika kay ginasunod nila si Jesus nga neutral. Suno sa Biblia, sa duha ka sitwasyon nga gintanyagan si Jesus nga himuon nga manuggahom, ginpangindian niya ini. (Mateo 4:8-10; Juan 6:15) Ginsaway gani niya ang iya mga disipulo kay indi niya gusto nga gamiton nila ang kapintas para pangapinan sia kag indi pag-arestuhon.—Mateo 26:51, 52; Lucas 22:49-51; Juan 18:10, 11.

Sang ginpamangkot si Jesus sang Romanong gobernador sang Judea parte sa alegasyon nga may ambisyon sia sa pulitika, maathag ang iya sabat: “Ang akon ginharian indi bahin sini nga kalibutan. Kon ang akon ginharian bahin sini nga kalibutan, ang akon mga alagad nakig-away kuntani agod indi ako matugyan sa mga Judiyo. Apang, ang matuod, ang akon ginharian indi gikan sa sini.” (Juan 18:36) Gani maathag nga sang panahon ni Jesus, wala gid sia nag-entra sa pulitika kag sa militar.

Amo man sini ang ginasunod sang mga disipulo ni Jesus. Sang gintun-an sang isa ka grupo sang mga researcher nga ginsambit kaina ang papel sang relihion sa inaway, nakasiling sila: “Ang mga Cristiano sang una nagapati nga indi kinahanglan ang kasingki. . . . Ang kalabanan nga Cristiano wala nagasoldado ukon nagaentra sa inaway.” Ginapadaku sang mga panudlo ni Jesus kag sang iya mga apostoles ang gugma sa isigkatawo, pati na sa mga estranghero kag mga tawo nga may lainlain nga ginhalinan kag rasa. (Binuhatan 10:34, 35; Santiago 3:17) Ini nga relihion makapaluntad gid sang paghidait.

Pero sang ulihi, ang orihinal nga panudlo sang Cristianismo naimpluwensiahan sang pilosopiya, tradisyon, kag nasyonalismo nga amo ang ginahalinan sang pagbinahinbahin. Ang  ginsambit kaina nga research parte sa papel sang relihion sa mga inaway, nagsiling: “Sang nakumbertir [ang Romano nga Emperador nga] si Constantine, nag-entra na sa militar ang mga Cristiano. Wala na sila nagsunod sa mga panudlo ni Cristo parte sa pagkamaluluy-on, kundi naimpluwensiahan na sila sang mga handum sa pulitika kag pagpangsakop sang Emperador. Gani ang mga Cristiano pati na ang Emperador napilitan nga mangita sing relihioso nga mga rason para makaentra sa inaway.” Diri nagsugod ang indi matuod nga Cristianismo.

“Lain Gid” sa Iban

Nadula na gid bala ang orihinal nga Cristianismo? Wala. May isa ka grupo nga dapat naton hatagan sing pinasahi nga igtalupangod. Indi pareho sa iban nga relihioso nga tawo, ginasunod gid sang mga Saksi ni Jehova ang una nga mga Cristiano. Indi sila konektado sa bisan ano nga relihion sang Cristiandad. Ginatawag sila sang The Encyclopedia of Religion nga “lain gid” kay ginabase nila ang tanan nila nga pagpati sa “Biblia sa baylo nga sa tradisyon.”

Pareho sa una nga mga Cristiano, ang mga Saksi ni Jehova wala nagaentra sa inaway sa pulitika. Suno sa isa ka pamantalaan sang National Academy of Sciences sang Ukraine, ginatinguhaan sang mga Saksi ni Jehova nga dulaon ang pagbinahinbahin bangod sa “rasa, pungsod, relihion, kag estado sa kabuhi.” Suno pa sa sini nga pagtuon, ang mga Saksi ni Jehova wala nagaentra sa mga “hublag batok sa gobierno” kag “matinumanon sila sa kasuguan sang ila pungsod.”

Sa libro nga Pacifism and Vicinity ni Propesor Wojciech Modzelewski, sang Warsaw University sa Poland, sia nagsulat: “Ang mga Saksi ni Jehova amo ang pinakadaku nga grupo subong sa kalibutan nga wala nagasuporta sa mga inaway.” Bangod ginasunod gid nila ang mga Cristiano sang unang siglo, masiling naton nga nabalik sang mga Saksi ni Jehova ang porma sang pagsimba nga gintukod ni Cristo kag sang iya mga apostoles. Ini nga sahi sang pagka-Cristiano amo ang makapaluntad sang paghidait.—Tan-awa ang kahon sa masunod nga pahina.

Matahom nga Palaabuton

Madamo man sang sinsero nga mga tawo kag relihioso nga mga lider ang naakig sa pagkaipokrito sang ila mismo relihion. Gani takus dayawon ang relihioso nga mga tawo nga nagatinguha nga paluntaron ang paghidait kag paghiusa sa kalibutan.

Pero bisan pa nagatinguha sila, limitado lang ang ikasarang sang tawo para solusyonan ang problema sang kalibutan. Ang propeta sang una nga si Jeremias nagsulat: “Ang dalanon sang tawo wala sa iya kaugalingon, wala sa tawo nga nagalakat sa pagmando sang iya mga tikang.”—Jeremias 10:23.

Pero may matahom pa nga palaabuton para sa aton. Ang Pulong sang Dios nagasiling nga magaluntad ang malinong nga kahimtangan sa duta nga pagaistaran sang mga tawo nga nagahigugmaanay. Ang tanan nga rasa may kalinong na kag wala na sila nabahinbahin sang  teritoryo, etniko nga grupo, kag relihion. Mahiusa sila bangod sa ila putli nga pagsimba kay Jehova nga Dios.

Gintagna man sang Biblia ang madangatan sang relihion nga nagapakahuya sa Dios. Nagsiling si Jesus: “Ang tagsa ka ginharian nga nabahinbahin mahapay, kag ang tagsa ka siudad ukon panimalay nga nabahinbahin indi magtindog.” (Mateo 12:25) Maabot ang tion nga tumanon sang Dios ang ginasiling diri nga madangatan sang tanan nga butig nga relihion.

Madugay na nga gintagna sang Biblia nga ang Dios “magahukom sa tunga sang mga pungsud, kag magahusay” sang mga kasuayon. Ini nga tagna nagsiling man nga ang “mga espada salsalon [sang mga tawo] nga mga punta sang arado, kag ang ila mga bangkaw nga mga galab nga inughagbas; ang pungsud indi magbayaw sing espada batok sa pungsud, kag indi na sila magtoon sing inaway.” (Isaias 2:4) Ini nga tagna nagakatabo na subong. Ang matuod nga relihion nga amo ang ginasunod sang mga Saksi ni Jehova, nagapaluntad na sang paghidait.

[Blurb sa pahina 8]

Nahiusa sa gugma ang mga Saksi ni Jehova

[Kahon sa pahina 9]

Ngaa Lain Gid ang mga Saksi niJehova?

Madamo ang natingala sang nabal-an nila nga lain gid ang mga Saksi ni Jehova sa iban nga relihion nga nagapangangkon nga nagasunod kay Cristo. Ari ang pila ka butang nga nagahimo sa mga Saksi ni Jehova nga lain sa iban:

ORGANISASYON

● Wala sing may mataas sa ila.

● Wala sing sueldo ang ila mga manunudlo, nagadumala sa kongregasyon, kag mga misyonero.

● Wala sila sing tithing kag wala man sang may nagapangolekta sing kuarta sa ila simbahan nga ginatawag Kingdom Hall.

● Ang tanan nila nga hilikuton ginasuportahan sing mga donasyon kag wala ginapahibalo kon sin-o ang nagahatag.

● Wala sila nagaentra sa pulitika.

● Wala sila nagaentra sa inaway kay ginatinguhaan nila nga makighidait sa tanan.

● Sa bilog nga kalibutan, nahiusa ang ila pagtuo kag palareho ang ila pagpati nga nabase sa Biblia.

● Nahiusa sila bisan lainlain ang ila ginhalinan, rasa, ukon tindog sa kabuhi.

● Indi sila konektado sa bisan ano nga relihion, Katoliko man, Ortodokso, ukon Protestante.

DOKTRINA

● Nagapati sila nga may isa lang ka matuod nga Dios, nga ang ngalan amo si Jehova.

● Wala sila nagapati nga si Jesucristo amo ang Labing Gamhanan nga Dios; wala man sila nagapati sa Trinidad.

● Ginasunod nila ang mga panudlo ni Jesus kag ginakilala sia subong Anak sang Dios.

● Wala sila nagagamit sang krus kag mga idolo sa pagsimba.

● Wala sila nagapati nga kon mapatay ang malain nga tawo ginapaantos ini sa kalayuhon nga impierno.

● Nagapati sila nga hatagan sang Dios ang matinumanon nga mga tawo sing perpekto kag walay katapusan nga kabuhi sa paraiso sa duta.

Nagapati ang mga Saksi ni Jehova nga napasag-uli nila ang Cristianismo sang unang siglo, nga gintukod ni Jesus kag sang mga apostoles.

[Retrato sa pahina 8]

Serb, Bosnian, kag Croatian