Magdiretso sa kaundan

Magdiretso sa listahan sang kaundan

Kinamatarong sang Pasyente nga Magpili

Kinamatarong sang Pasyente nga Magpili

 Kinamatarong sang Pasyente nga Magpili

SUNO SA MANUNULAT SANG MAGMATA! SA ITALYA

▪ Ang mga Saksi ni Jehova wala nagapatughong sang dugo bangod sa sugo sang Biblia. Ang pinakauna nga pagsambit sini nga sugo nagsiling: “Ang unud nga may kabuhi, nga amo ang iya dugo, dili ninyo pagkaonon.” Maathag man ang sugo sa mga Cristiano nga nagkabuhi sang unang siglo: “Padayon kamo nga maglikaw . . . sa dugo.”—Genesis 9:4; Binuhatan 15:29; Levitico 17:14.

Sa Monterenzio, Italya, ginpasulat sang essay ang mga estudyante sa grade 6 asta grade 8 parte sa importansia sang pagdonar sang dugo. Ang isa sa mga estudyante amo si Benedetta nga isa ka Saksi ni Jehova. Amo ini ang iya ginsulat:

“Kilala gid ang mga Saksi ni Jehova nga wala nagapatughong sing dugo bangod ginatuman nila ang mga prinsipio sa Biblia. Pero, nagabaton man sila sing iban nga pamaagi sang pagbulong. Ang matuod, importante gid sa mga Saksi ni Jehova ang ila ikaayong lawas. Gusto gid nila ang pinakamaayo nga pagbulong para sa ila kaugalingon kag sa ila kabataan. Nagakooperar gid sila sa mga doktor, basta ginarespeto lang ang ila pagpati.”

Nagsiling pa si Benedetta: “Ang kada pasyente may kinamatarong nga magpili kon ano nga sahi sang pagbulong ang pinakamaayo para sa iya, nga respetuhon ang iya desisyon, kag mahibal-an ang mga bentaha kag disbentaha sang pagbulong nga iya pilion.”

Ginpremyuhan sang Monterenzio branch sang AVIS (Association of Italian Blood Donors) ang mga estudyante nga nakasulat sing pinakamaayo nga essay parte sa sini nga topiko. Ang magasin nga Monterenzio Vivace nagsiling: “Gindayaw gid ang essay ni Benedetta Barbi bangod lain gid ini sa opinyon sang kalabanan, bisan pa sa panindugan sang AVIS. Pero, napabutyag gid sang estudyante ang iya pagpati sing balanse kag matinahuron.”

Bisan pa lain gid sa kalabanan ang panindugan sang mga Saksi ni Jehova parte sa dugo, nakita karon sang madamo nga doktor ang kaayuhan sini. Bangod sa panindugan sang mga Saksi, madamo karon sing ginahimo nga pamaagi sa pag-opera nga nagapahaganhagan sang pagkadula sang dugo. Wala lamang ini nakabulig sa mga Saksi kundi pati man sa indi mga Saksi. Pero, ang panguna nga rason kon ngaa wala nagapatughong sing dugo ang mga Saksi ni Jehova amo ang maathag nga sugo sang Biblia, nga ginsambit sa umpisa.

Kon magkadto liwat ang mga Saksi ni Jehova sa inyo balay, pamangkuta sila kon ano ang pagtamod sang Manunuga parte sa dugo. Malipay gid sila nga ipaathag ini sa imo nga may “tudok nga pagtahod.”—1 Pedro 3:15.

[Kahon/Retrato sa pahina 30]

DUGANG PA NGA IMPORMASYON

Sa bulig sang kilala nga mga eksperto, ginapakita sang DVD nga Transfusion Alternatives ang medikal, legal, kag moral nga mga prinsipio sang mga pagbulong nga tal-us sa pagpatughong sing dugo. Matigayon mo ini nga DVD sa mga Saksi ni Jehova.