Magdiretso sa kaundan

Magdiretso sa listahan sang kaundan

Tudlui ang Imo Kabataan Samtang Gamay Pa

Tudlui ang Imo Kabataan Samtang Gamay Pa

 Tudlui ang Imo Kabataan Samtang Gamay Pa

SUNO SA MANUNULAT SANG MAGMATA! SA CANADA

▪ “Maayo gid magtudlo ang telebisyon,” report sang The New York Times. Pero, “ang paglantaw sing TV sing pila ka oras may indi maayo nga epekto sa panglawas kag panghunahuna sang kabataan,” nga kuntani ini nga mga oras magamit pa nila sa pagpangusisa, pagtuon, kag pagpakig-abyan.

Sa tapos matun-an ang batasan sa paglantaw sing TV sang 2,500 ka kabataan, nasapwan sang mga researcher sa ospital sang kabataan sa Seattle, Washington, U.S.A., “nga kon mas malawig ang tion nga nagalantaw sing TV ang mga bata nga nagaedad sing isa ukon tatlo ka tuig, mas daku ang posibilidad nga mabudlayan sila sa pagkonsentrar pag-edad nila sing pito ka tuig,” siling sang pamantalaan. Ini nga mga kabataan mga hulagan gid, madali matak-an kag may malip-ot nga konsentrasyon. Si Dr. Jane M. Healy nga nagatuon sa mga problema sang mga estudyante, nagsiling nga “nasapwan sang madamo nga ginikanan nga nag-ayoayo ang ila kabataan nga may attention-deficit disorder sang ginpauntat nila ini sa pagtan-aw sing TV.”

Ano ang himuon sang ginikanan para mabuhinbuhinan ang tion sang ila kabataan sa pagtan-aw sing telebisyon? Ang report naghatag man sing masunod nga suhestyon: Kada adlaw, limitehi kon ano nga oras sia puede maglantaw kag kon daw ano ini kalawig. Indi paghimua ang telebisyon nga yaya sang imo bata. Sa baylo, paentraha ang imo bata sa mga hilikuton sa sulod sang balay. Pilia man ang palaguaon nga tan-awon sang imo bata, kag patya ang TV kon matapos na ini. Kon mahimo, magtan-aw upod sa imo bata kag istoryahi sia sang inyo ginatan-aw. Kag importante gid nga limitehan mo man ang pagtan-aw mo sing TV.

Nagakinahanglan sing tion, determinasyon, kag disiplina sa kaugalingon ang pagtudlo sa mga bata nga mangin maideyahon kag mainabyanon. Pero, may maayo gid ini nga resulta. Ginapamatud-an ini sang isa ka hulubaton sadto nga nagasiling: “Hanasa ang bata sa dalanon nga dapat niya paglaktan, kag bisan tigulang na sia indi na sia magtalikod sa sini.” (Hulubaton 22:6) Ang importante nga bahin sini nga paghanas amo ang pagtudlo sa kabataan sing maayo nga pamatasan.

Nagmadinalag-on ang mga Saksi ni Jehova nga tudluan ang ila kabataan sing maayo nga pamatasan paagi sa paggamit sang libro nga Magtuon Gikan sa Daku nga Manunudlo. Matuod, ang maayo nga komunikasyon kag mahigugmaon nga pag-atipan sang ginikanan sa ila kabataan samtang bata pa sila nagadala sing wala katapusan nga kaayuhan. Wala na sing daku pa nga kalipay para sa ginikanan nga makita ang ila kabataan nga nagdaku subong talahuron kag responsable nga mga tawo.