May Rason Bala Agod Maglaum?

“Ang isa ka problema sa nahul-an nga mga pag-asawahay amo ang mabakod nga pagpati nga indi na magaayo pa ang kahimtangan. Ini nga pagpati nagaupang sang pagbalhin bangod ginakuha sini sa imo ang pangpapagsik nga tinguhaan ang bisan ano man nga positibo.”—DR. AARON T. BECK.

HANDURAWA nga ginasakitan ka kag nagkadto ka sa doktor agod magpatan-aw. Nabalaka ka​—⁠kag halangpunon ina. Ti, ang imo kapagros​—⁠ang imo pa gani mismo kabuhi​—⁠mahimo mabutang sa katalagman. Apang ano abi kon pagkatapos sang pag-eksamin, ang doktor nagsugid sa imo sing maayong balita nga bisan pa ang imo problema malubha, mahimo ini mabulong. Sa katunayan, ang doktor nagsiling sa imo nga kon sundon mo sing maayo ang isa ka makatarunganon nga programa sang pagkaon kag pag-ehersisyo, mahimo ikaw magaayo sing bug-os. Pat-od gid nga magahaganhagan ang imo pamatyag kag malipayon mo nga sundon ang iya laygay!

Ipaanggid ini nga danyag sa topiko nga ginabinagbinag. Ginasakitan ka bala sa imo pag-asawahay? Sa pagkamatuod, ang tagsa ka pag-asawahay may kaugalingon nga mga problema kag mga di-paghangpanay. Gani ang pila lamang ka mabudlay nga mga tion sa imo relasyon wala nagakahulugan nga walay gugma ang imo pag-asawahay. Apang kamusta naman kon ang masakit nga kahimtangan nagalawig sing senemana, binulan, ukon tinuig pa gani? Kon amo, nagakaigo nga magkabalaka ka, kay indi ini diutay lamang nga butang. Sa pagkamatuod, ang kalidad sang imo pag-asawahay mahimo makaapektar sa halos tanan nga aspekto sang imo kabuhi​—⁠kag sang imo mga kabataan. Halimbawa, ginapatihan nga ang kalisdanan sa pag-asawahay mahimo mangin isa ka daku nga kabangdanan sang mga problema subong sang kapung-aw, mapigaw nga pagtrabaho, kag indi pagkapasar sang mga kabataan sa eskwelahan. Apang indi lang ina. Ginakilala sang mga Cristiano nga ang ila relasyon sa ila tiayon makaapektar sa ila mismo relasyon sa Dios.​—⁠1 Pedro 3:⁠7.

Ang katunayan nga may mga problema kamo nga mag-asawa wala nagakahulugan nga wala na ini sing paglaum. Ang pag-atubang sa katunayan sang pag-asawahay​—⁠nga may yara mga kabudlayan​—⁠makabulig sa mag-asawa nga tamdon sing nagakaigo ang ila mga problema kag tinguhaan nga makakita sing mga solusyon. Si Isaac, nga isa ka bana, nagsiling: “Wala ako sing ideya nga normal lang gali para sa mga mag-asawa nga may mga tion sang kalipay kag kasubo sa pag-asawahay. Abi ko may problema kami!”

Bisan pa ang inyo pag-asawahay nangin wala sing gugma nga relasyon, mahimo ini masalbar. Ibutang ta, ang mga pilas nga bunga sang may problema nga relasyon mahimo madalom, ilabi na kon ang mga problema naglawig sing tinuig. Apang, may mabaskog nga rason gihapon agod maglaum. Ang motibo amo ang  importante nga rason. Bisan ang duha nga may mabug-at nga mga problema sa pag-asawahay makahimo sing mga pag-uswag kon importante gid ini sa ila nga duha.⁠ *

Gani pamangkuta ang imo kaugalingon, ‘Daw ano ka daku ang akon handum nga matigayon ang isa ka makaalayaw nga relasyon?’ Handa bala kamo nga mag-asawa sa pagpanikasog agod pauswagon ang inyo pag-asawahay? Si Dr. Beck, nga ginbalikwat kaina, nagsiling: “Masunson ako nagakakibot kon paano ang daw malain nga relasyon mahimo mabuligan kon ang mag-asawa magbuligay agod matadlong ang mga negatibo nga mga kinaiya kag mapabakod ang positibo nga mga kinaiya sang ila pag-asawahay.” Apang ano abi kon ang imo tiayon nagaalang-alang sa pagbulig? Ukon ano abi kon daw wala sia sing hinalung-ong sa kamatuoran nga may yara gali problema? Walay pulos bala nga ikaw lamang ang magapanikasog agod malubad ang problema? Indi! “Kon maghimo ka sing mga pagbalhin,” siling ni Dr. Beck, “ini mismo magapahulag sing mga pagbalhin sa imo tiayon​—⁠sa masami amo gid sini ang nagakatabo.”

Indi maghinakop sing padasudaso nga indi ini matabo sa imo kahimtangan. Ining nagapangampo nga panghunahuna mahimo nga amo mismo ang labing daku nga katalagman sa imo pag-asawahay! Ang isa sa inyo dapat maghimo sang nahauna nga tikang. Mahimo bala nga ikaw ini? Sa tion nga masugdan na ini, mahimo makita sang imo tiayon ang kapuslanan sang pagpangabudlay upod sa imo agod matukod ang mas malipayon nga pag-asawahay.

Busa, ano ang sarang mo himuon​—⁠ayhan subong indibiduwal ukon subong mag-asawa​—⁠agod masalbar ang imo pag-asawahay? Ang Biblia isa ka daku nga bulig sa pagsabat sini nga pamangkot. Tan-awon naton kon paano.

[Nota]