Magdiretso sa kaundan

Magdiretso sa listahan sang kaundan

Mga Leksion nga Natun-an sa Paglakbay ni Loida

Mga Leksion nga Natun-an sa Paglakbay ni Loida

 Mga Leksion nga Natun-an sa Paglakbay ni Loida

ANG artikulo nga “Loida’s Journey out of Silence” sang (May 8, 2000, Awake!) nakabaton sing daku nga reaksion gikan sa amon mga bumalasa. Madamong tagipusuon ang natandog sing daku sining matuod nga sugilanon sang isa ka bata nga babayi nga may balatian nga cerebral palsy nga nakapaalinton lamang sang 18 anyos na sia. Ang masunod amo ang pila sang mga komento nga nabaton.

“Indi ko mapunggan nga maghibi sang mabasa ko ang mga mensahe ni Loida sa iya pamilya sang ulihi nga nakapaalinton na sia. Ang iya kaisog kag kabakod walay sapayan sang iya mabudlay nga mga kahimtangan amo ang mga kinaiya nga dapat ko panikasugan nga ilugon.”​​—⁠K. G.

“May maayo gid ako nga panglawas, apang kon kaisa nangin palareklamo ako sa nagkalainlain nga mga butang. Sang mabasa ang tuhoy kay Loida, nangamuyo ako kay Jehova, nga nagapangayo sing kapatawaran bangod sang indi pagpasalamat sa kon ano ang akon ginapanag-iyahan.”​​—⁠R. H.

“Sang 1980 natawo ang akon manghod nga lalaki nga may madamo nga balatian, lakip ang cerebral palsy, kag indi sia makahambal. Ini nga eksperiensia nagpalig-on sa akon pamilya nga indi gid magpangampo, bisan daw ano man kabudlay ang kahimtangan.”​​—⁠L. W.

“Katorse anyos ako nga bata nga babayi, kag pirme ako anay naghunahuna nga ako lang ang may mga problema. Luyag ko makita si Loida nga maayo na kag masugilanon sia sa Paraiso. Isa sia sang mga tawo sa akon listahan nga luyag ko makita kag mangin abyan sing dayon.”​—⁠R. K.

“Ang akon tagipusuon natandog sining artikulo. Dapat ko batason ang tanan nga sahi sang problema sa hunahuna kag balatyagon. Nagadugang pa gid ang kaluyag ko nga mangin didto sa bag-ong kalibutan sang Dios sang mabasa ang tuhoy sa malangkagon nga paghulat ni Loida sa sini.”​—⁠P. B.

“May cerebral palsy man ako, apang wala ako sing problema sa paghambal. Nahisayran ko sa sining artikulo nga nakita ni Jehova ang tanan naton nga naeksperiensiahan kag ginaapresyar ang kada isa sa aton tungod sa kon ano ang sarang naton maamot subong indibiduwal sa pag-alagad sa iya.”​—⁠D. J.

“Ang labi nga nagpahulag sa akon amo ang mabasa kon paano gindedikar ni Loida ang iya kabuhi kay Jehova sa lamharon nga edad kag kon paano man sia nagapakigbahin sa pagbantala nga hilikuton. Kita nga may mas maayo nga panglawas makatuon kay Loida sa madamo nga paagi.”​—⁠A. R.

“Ang eksperiensia ni Loida nagtiklod sa akon nga panikasugan nga hunahunaon sing labi ang iban kag kon ano ang sarang ko mahimo para sa ila. Indi ko luyag pasapayanan ang akon pribilehiyo nga mahambal ang iban tuhoy kay Jehova nga Dios.”​—⁠B. M.

“Daw ano ka tumalagsahon nga artikulo! May kilala kami nga isa ka mag-asawa sa kaingod nga kongregasyon nga may anak nga babayi nga may cerebral palsy. Padalhan ko sila sing kard karon nga adlaw agod mahisayran nila nga ginaapresyar ko gid sila kag ang tanan nga ginahimo nila para sa iya.”​—⁠T. G.

“Kon ginapung-aw ako, kon kaisa nangin makagod ako, apang si Loida nagapakita sing pinasahi nga interes sa iban. Amo sina ang ginatinguhaan ko sing lakas nga himuon. Kinahanglan ko man tinguhaan sing lakas pa nga mangin kaangay ni Loida kag mangamuyo kay Jehova kon ginapung-aw gid ako.”​—⁠N. D.

“Katorse anyos ako kag may hapo. Kon kaisa pagdumdom ko ang akon masakit amo ang pinakamalubha sa tanan, apang sang mabasa ko ining eksperiensia, nahibaluan ko nga indi gali. Salamat tungod sining masubo apang makapahalipay man nga eksperiensia nga nagahatag sa aton sing paglaum.”​—⁠M. C.