nirgaman 40:1-38
40 fir yahova ne moosa se kaha,
2 “tu pavitra dere ko, jo bheint ka tamboo hai, pehale maheene ke pehale din khada karna.+
3 uske andar gavahi ka sandook rakhna+ aur saamne parda lagana taaki sandook dikhayi na de.+
4 fir mez laakaar dere ke andar rakhna+ aur us par jo cheezen honi chahiye, unhein tarteeb se rakhna. aur deevat laakaar rakhna+ aur uske deeye jalana.+
5 iske baad dhoop jalane ke liye banayi gayi sone ki vedi laana+ aur use gavahi ke sandook ke saamne rakhna aur dere ke dvar par parda lagana.+
6 tu hom-bali ki vedi+ ko dere yaani bheint ke tamboo ke dvar ke saamne rakhna
7 aur haud ko bheint ke tamboo aur vedi ke beech rakhna aur usmein paani bharna.+
8 fir tamboo ke chaaron taraf kanaton se aangan taiyar karna+ aur aangan ke dvar par parda+ lagana.
9 iske baad tu abhishek ka tel+ lena aur dere aur uske andar rakhi saari cheezon ka abhishek karna+ aur unhein seva mein istemal ke liye alag thehrana taaki isse dera pavitra ho jaaye.
10 tu hom-bali ki vedi aur uske saath istemal honevali saari cheezon ka bhi abhishek karke unhein pavitra thehrana taaki isse vedi bahot pavitra ho jaaye.+
11 tu haud aur uski tek ka abhishek karke unhein pavitra thehrana.
12 fir haaroon aur uske beton ko bheint ke tamboo ke dvar ke paas laana aur unhein nahane ki aagya dena.+
13 tu haaroon ko pavitra poshak pehanna+ aur uska abhishek karke+ use pavitra thehrana taaki woh yaajak ke naate meri seva kare.
14 iske baad tu uske beton ko saamne laana aur unhein kurte pehanna.+
15 tu unka bhi abhishek karna jaise tu unke pita ka abhishek karega.+ aur woh yaajkon ke naate meri seva kareinge. unka abhishek hone ke baad se yaajakpad peedhi-dar-peedhi hamesha ke liye unhin ka rahega.”+
16 moosa ne yah saara kaam theek vaisa hi kiya jaise yahova ne use aagya di thi.+ usne theek vaisa hi kiya.
17 doosre saal ke pehale maheene ke pehale din pavitra dera khada kiya gaya.+
18 moosa ne dera is tarah khada kiya: usne zameen par khaanchedar chaukiyaan rakhin,+ un par chaukhatein khadi kin,+ chaukhaton mein dande+ lagaye aur khambhon ko khada kiya.
19 usne dere ko kapde se dhaka+ aur us par chaadrein daalin,+ theek jaise yahova ne use aagya di thi.
20 iske baad usne gavahi ki patiyayen lin+ aur unhein sandook ke andar rakha,+ sandook mein uske dande lagaye+ aur uske oopar dhakna+ rakh diya.+
21 woh gavahi ke sandook ko dere ke andar le gaya aur usne saamne parda lagaya+ taaki sandook dikhayi na de,+ theek jaise yahova ne use aagya di thi.
22 iske baad usne bheint ke tamboo mein, parde ke is paar uttar ki taraf mez rakhi+
23 aur mez par yahova ke saamne rotiyon ka dher tarteeb se rakha,+ theek jaise yahova ne use aagya di thi.
24 moosa ne tamboo ke andar mez ke saamne yaani dakshin ki taraf deevat+ rakha
25 aur uske deeye yahova ke saamne jalaye,+ theek jaise yahova ne use aagya di thi.
26 iske baad usne bheint ke tamboo mein parde ke saamne sone ki vedi rakhi+
27 taaki us par sugandhit dhoop+ jalaya jaaye aur usse dhuaan uthe,+ theek jaise yahova ne use aagya di thi.
28 fir usne dere ke dvar par parda lagaya.+
29 usne dere yaani bheint ke tamboo ke dvar par hom-bali ki vedi rakhi+ taaki us par hom-bali+ aur anaj ka chadhava chadhaye, theek jaise yahova ne use aagya di thi.
30 fir usne bheint ke tamboo aur vedi ke beech haud rakha aur haath-pair dhone ke liye usmein paani bhara.+
31 moosa, haaroon aur uske beton ne haud ke paani se vahaan apne haath-pair dhoye.
32 jab bhi woh bheint ke tamboo ke andar ya vedi ke paas jaate to pehale apne haath-pair dhote,+ theek jaise yahova ne moosa ko aagya di thi.
33 aakhir mein usne dere aur vedi ke chaaron taraf ka aangan taiyar kiya+ aur aangan ke dvar par parda lagaya.+
is tarah moosa ne saara kaam poora kiya.
34 iske baad baadal bheint ke tamboo par chhaane laga aur pavitra dera yahova ki mahima se bhar gaya.+
35 moosa bheint ke tamboo ke andar nahin jaa paaya kyonki baadal us par chhaaya raha aur pavitra dera yahova ki mahima se bhar gaya.+
36 israeliyon ke poore safar mein jab-jab baadal dere se oopar uthta to woh apna padav uthakar aage badhte the.+
37 lekin jab baadal dere ke oopar chhaaya rehta to woh apna padav daale rehte. woh tab tak aage nahin badhte jab tak ki baadal nahin uthta.+
38 din ke vakt yahova ka baadal dere ke oopar chhaaya rehta aur raat ko uske oopar aag rehti thi. yah nazara israel ke saare gharane ko poore safar ke dauran dikhayi deta raha.+
