nirgaman 31:1-18
31 yahova ne moosa se yah bhi kaha,
2 “dekh, mainne yahooda gotra ke baslel ko chuna hai*+ jo oori ka beta aur hoor ka pota hai.+
3 main use apni pavitra shakti se bhar doonga aur har tarah ki kaareegari mein kushal hone ke liye buddhi, samajh aur gyaan doonga
4 taaki woh behtareen namoone taiyar karne mein, sone, chaandi aur tambe ke kaam mein,
5 keemti ratnon ko tarashne aur jadne mein+ aur lakdi ki har tarah ki cheezen taiyar karne mein maahir ho jaaye.+
6 aur baslel ki madad ke liye mainne daan gotra ke oholeeab+ ko thehraya hai jo aheesamak ka beta hai. main sabhi kushal kaareegaron* ka hunar aur bhi nikhaar doonga taaki woh ye saari cheezen banayen jinke baare mein mainne tujhe aagya di hai:+
7 bheint ka tamboo,+ gavahi ka sandook+ aur uska dhakna,+ tamboo ka saara saaman,
8 mez+ aur uski cheezen, shuddh sone ki deevat aur uske saath istemal honevali saari cheezen,+ dhoop ki vedi,+
9 hom-bali ki vedi+ aur uske saath istemal honevali saari cheezen, haud aur uski tek,+
10 badhiya tareeke se buni hui poshakein, haaroon yaajak ke liye pavitra poshak aur uske beton ke liye poshakein jinhein pehankar woh yaajak ka kaam kareinge,+
11 abhishek ka tel aur pavitra-sthan ke liye sugandhit dhoop.+ kaareegar har woh kaam kareinge jiski mainne tujhe aagya di hai.”
12 yahova ne moosa se yah bhi kaha,
13 “tu israeliyon ko yah batana, ‘tum log mere sabton ko maanne ka khaas dhyan rakhna,+ kyonki sabt us karar ki nishani hai jo mainne tumhare saath kiya hai. yah nishani tumhein peedhi-peedhi tak is baat ki yaad dilati rahegi ki mujh yahova ne tum logon ko pavitra thehraya hai.
14 tum sabt ka niyam zaroor maanna kyonki sabt tumhare liye pavitra hai.+ agar koi use apavitra karta hai, to use maut ki saza di jaaye. agar koi sabt ke din kaam karta hai to use maut ki saza dekar apne logon mein se hamesha ke liye mita diya jaaye.+
15 tum chhe din apna kaam-kaaj kar sakte ho, magar saatvaan din sabt hoga, poore vishram ka din.+ yah yahova ke liye pavitra din hai. agar koi sabt ke din kaam kare, to use maar daalna chahiye.
16 israeliyon ko har haal mein sabt ka niyam maanna hoga, unhein peedhi-dar-peedhi is niyam ka paalan karna hoga. yah sada tak kaayam rehnevala karar hai.
17 mere aur israeliyon ke beech sabt hamesha ke liye ek nishani bana rahega,+ kyonki yahova ne chhe dinon mein aakash aur prithvi ko banaya aur kaam poora karne ke baad usne saatvein din vishram kiya.’”+
18 parmeshvar ne seenai pahad par moosa se ye saari baatein kehne ke fauran baad use gavahi ki do patiyayen di.+ ye patthar ki patiyayen thi jin par parmeshvar ne apni ungli se likha tha.+
