nirgaman 35:1-35
35 baad mein moosa ne israeliyon ki poori mandli ko ikattha kiya aur unse kaha, “yahova ne hamein ye saari aagyayen di hain jinka hamein paalan karna hai:+
2 tum chhe din tak apna kaam-kaaj kar sakte ho, magar saatvein din ko tum pavitra maanna. yah yahova ko samarpit sabt ka din hoga, poore vishram ka din.+ agar koi sabt ke din kaam kare, to use maar daala jaaye.+
3 sabt ke din tum apne rehne ki jagah par aag tak mat jalana.”
4 fir moosa ne israeliyon ki poori mandli se kaha, “yahova ne yah aagya di hai,
5 ‘yahova ke liye logon se daan ikattha karna.+ har koi jo dil se dena chahta hai+ woh yahova ke liye daan mein ye cheezen laakaar de: sona, chaandi, taamba,
6 neela dhaaga, bainjni oon, surkh laal dhaaga, badhiya malmal, bakri ke baal,+
7 laal rang se rangi hui medhe ki khaal, seel machhli ki khaal, babool ki lakdi,
8 deeyon ke liye tel, abhishek ke tel aur sugandhit dhoop ke liye balsan,+
9 epod aur seeneband mein jadne ke liye sulemani patthar aur doosre ratna.+
10 tumhare beech jitne bhi kushal kaareegar hain,*+ woh sab aayen aur yahova ne jo-jo cheezen banane ki aagya di hai, woh sab banayen,
11 yaani pavitra dera, uska saara saaman, use dhakne ke liye kapde, uski chimtiyaan aur chaukhatein, chaukhaton ke dande, tamboo ke khambhe aur khaanchedar chaukiyaan,
12 sandook,+ uska dhakna+ aur uske dande,+ sandook ke saamne lagaya jaanevala parda,+
13 mez,+ uske dande, uski saari cheezen aur nazrane ki roti,+
14 raushni ke liye deevat,+ uske saath istemal honevali saari cheezen, uske deeye aur unhein jalane ke liye tel,+
15 dhoop ki vedi+ aur uske dande, abhishek ka tel aur sugandhit dhoop,+ dere ke dvar ke liye parda,
16 hom-bali ki vedi,+ uske liye tambe ki jaali, vedi ke dande aur vedi ke saath istemal honevali saari cheezen, haud aur uski tek,+
17 aangan ke ghere ke liye kanatein,+ aangan ke liye khambhe, khaanchedar chaukiyaan aur aangan ke dvar ke liye parda,
18 pavitra dere ke liye khoontiyaan aur aangan ke liye khoontiyaan aur rassiyaan,+
19 pavitra-sthan mein seva karnevalon ke liye badhiya tareeke se buni hui poshakein,+ haaroon yaajak ke liye pavitra poshak+ aur uske beton ke liye poshakein jinhein pehankar woh yaajak ka kaam kareinge.’”
20 fir israeliyon ki poori mandli moosa ke saamne se laut gayi.
21 fir jis-jiske dil ne use udhaara,+ jiske man* ne use udhaara, woh yahova ke liye daan le aaya. logon ne woh saari cheezen daan kin jo bheint ka tamboo banane, pavitra poshakein taiyar karne aur tamboo ki seva mein istemal hotin.
22 daan denevalon ka taanta lag gaya, aadmi-aurat sab khushi-khushi apni cheezen laakaar dete rahe. unhonne apne jadaoo pin, kaan ki baaliyaan, chhalle, doosre gehne aur sone ki tarah-tarah ki cheezen laakaar di. un sabne apne sone ke chadhave* yahova ko arpit kiye.+
23 jinke paas neela dhaaga, bainjni oon, surkh laal dhaaga, badhiya malmal, bakri ke baal, laal rang se rangi hui medhe ki khaal aur seel machhli ki khaal thi, un sabne ye cheezen laakaar di.
24 jitnon ke paas chaandi aur taamba tha un sabne woh laakaar yahova ke liye daan mein diya aur jitnon ke paas babool ki lakdi thi unhonne bhi laakaar pavitra dere ke liye de di.
25 aur jin aurton ke haath mein hunar tha,+ woh sab soot kaatkar neela dhaaga, bainjni oon, surkh laal dhaaga aur badhiya malmal taiyar karke le aayin.
26 aur jin hunarmand aurton ke dil ne unhein udhaara, woh sab bakri ke baalon se dhaage banakar le aayin.
27 israeliyon ke pradhan, epod aur seeneband mein jadne ke liye sulemani patthar aur doosre ratna le aaye+
28 aur balsan aur tel bhi le aaye, jo deeye jalane aur abhishek ka tel+ aur sugandhit dhoop taiyar karne mein istemal hote.+
29 sabhi aadmi-aurat jinke dil ne unhein udhaara, us kaam ke liye kuch-na-kuch le aaye jise karne ki aagya yahova ne moosa ke zariye di thi. israeliyon ne apni khushi se ye saari cheezen laakaar yahova ke liye arpit kin.+
30 fir moosa ne israeliyon se kaha, “suno, yahova ne yahooda gotra ke baslel ko chuna hai, jo oori ka beta aur hoor ka pota hai.+
31 parmeshvar ne baslel ko apni pavitra shakti se bhar diya hai aur use har tarah ki kaareegari mein kushal hone ke liye buddhi, samajh aur gyaan diya hai
32 taaki woh behtareen namoone taiyar karne mein, sone, chaandi aur tambe ke kaam mein,
33 keemti ratnon ko tarashne aur jadne mein aur lakdi ki har tarah ki khoobsoorat cheezen taiyar karne mein maahir ho jaaye.
34 aur parmeshvar ne baslel ko aur daan gotra ke oholeeab ko,+ jo aheesamak ka beta hai, doosron ko kaam sikhane ki bhi kaabilyat di hai.
35 parmeshvar ne in donon aadmiyon ko aisi kaabilyat di hai*+ taaki woh har tarah ki kaareegari mein, kadhai ke kaam mein, neele dhaage, bainjni oon aur surkh laal dhaage aur badhiya malmal se bunai karne mein aur julahe ke kaam mein kushal ban jaayen. ye aadmi parmeshvar ka bataya har tarah ka namoona taiyar kareinge aur har tarah ka kaam kareinge.”
