nirgaman 12:1-51
12 moosa aur haaroon jab misra mein the tab yahova ne unse kaha,
2 “yah maheena tumhare liye pehala maheena hoga. tum ise saal ka pehala maheena maanna.+
3 israel ki poori mandli se kehna, ‘is maheene ke dasvein din, israel ke sab gharane apne liye ek-ek memna+ lein, har parivar ke liye ek memna.
4 lekin agar ek gharane mein poore memne ko khaane ke liye log kam hon, to woh dekhe ki memne ko aur kitne log khaa sakte hain aur us hisab se pados ke kisi parivar ke saath apne ghar mein mil-baantkar khaaye. aur memne ko khaane ke liye kitne log honge uske hisab se yah bhi tay kare ki har koi memne ka kitna gosht khaayega.
5 tum aisa memna chunna jismein koi dosh na ho.+ woh nar ho aur ek saal ka ho. tum ya to bhed ka bachcha le sakte ho ya bakri ka.
6 tum is maheene ke 14vein din tak uski dekhbhal karna.+ aur usi din shaam ke jhutpute ke samay*+ israeliyon ki mandli ka har parivar apna memna halal kare,
7 aur memne ka thoda-saa khoon le aur jis ghar mein woh parivar memne ko khaayega, uske darvaze ke donon baazuon aur chaukhat ke oopri hisse par uska khoon chhidke.+
8 log memne ka maans 14vein din ki raat ko hi khaayen.+ memna halal karne ke baad use aag mein bhoon diya jaaye aur use bin-khameer ki roti+ aur kadve saag ke saath khaaya jaaye.+
9 jaanvar ko kachcha ya paani mein ubaalkar mat khaana balki poore jaanvar ko uske sir, paayon aur androoni angon samet aag mein bhoonkar khaana.
10 agli subah ke liye kuch bachakar mat rakhna, agar kuch bach gaya to use aag mein jala dena.+
11 tum log kamarband baandhkar,* pairon mein jootiyaan pehankar aur haath mein laathi liye poori tarah taiyar hokar yah khaana khaana. aur tum jaldi-jaldi khaana. yah yahova ke liye manaya jaanevala fasah hai.
12 usi raat main misra desh aaunga aur misra ke har pehalauthe ko maar daaloonga, chahe woh insan ka ho ya jaanvar ka.+ main misra ke sab devi-devtaon ko saza doonga.+ main yahova hoon.
13 jin gharon mein tum rahoge, un par laga khoon tumhare liye nishani hoga. woh khoon dekhkar main tumhein chhod doonga aur aage badh jaaunga. aur main misra desh ko maarne ke liye jo kehar laanevala hoon usse tum bach jaaoge.+
14 yah din tumhare liye yaadgar ban jaayega. tum peedhi-dar-peedhi is din yahova ke liye tyohar manaya karna. yah niyam tumhein hamesha ke liye diya jaa raha hai.
15 tumhein saat din tak bin-khameer ki roti khaani hogi.+ is tyohar ke pehale din hi tum apne gharon se khameera aata* nikaal feinkna kyonki in saat dinon mein agar tummein se koi aisi cheez khaayega jismein khameer mila ho, to use israel mein se hamesha ke liye naash kar diya jaaye.
16 pehale din tum ek pavitra sabha rakhna aur saatvein din fir se ek pavitra sabha rakhna. in dinon mein koi bhi kaam na kiya jaaye.+ sirf harek ki zaroorat ke mutabik khaana taiyar kiya jaa sakta hai, iske alava koi aur kaam nahin kiya jaa sakta.
17 tum bin-khameer ki roti ka tyohar zaroor manaya karna,+ kyonki isi din main tum logon ki badi bheed* ko misra se nikaalkar baahar le jaanevala hoon. tum peedhi-dar-peedhi yah din manaya karna. yah niyam tumhein hamesha ke liye diya jaa raha hai.
18 saal ke pehale maheene ke 14vein din ki shaam se lekar us maheene ke 21vein din ki shaam tak tumhein bin-khameer ki roti khaani hogi.+
19 in saat dinon ke dauran tumhare gharon mein khameera aata bilkul bhi na paaya jaaye kyonki koi bhi insan, chahe woh paidaishi israeli ho ya pardesi,+ agar aisi koi cheez khaayega jismein khameer mila ho, to use israel ki mandli mein se naash kar diya jaayega.+
20 tumhein aisi koi bhi cheez nahin khaani chahiye jismein khameer mila ho. tum sabko apne gharon mein sirf bin-khameer ki roti khaani hogi.’”
21 moosa ne fauran israel ke sabhi mukhiyaon ko bulaya+ aur unse kaha, “tum sab jaakaar apne-apne parivar ke liye memne* le aao aur unhein fasah ki bali ke liye halal karo.
22 fir memne ka khoon ek bade katore mein lo aur maruye ka guchha usmein dubokar usse chaukhat ke oopri hisse aur darvaze ke donon baazuon par khoon lagao. agli subah tak tummein se koi bhi apne ghar ke darvaze se baahar kadam na rakhe.
23 fir jab yahova misriyon par kehar dhaane ke liye aayega aur tumhare gharon ki chaukhat ke oopri hisse aur darvaze ke donon baazuon par khoon dekhega, to yahova tumhare darvaze ko chhodkar aage badh jaayega aur maut ke kehar* ko tumhare gharon mein nahin ghusne dega.+
24 tum log is ghatna ki yaadgar zaroor manaya karna. yah niyam tumhein aur tumhare beton ko hamesha ke liye diya jaa raha hai.+
25 jab tum us desh mein daakhil hoge jo yahova apne kahe mutabik tumhein dega, to vahaan tum yah tyohar manaya karna.+
26 agar kabhi tumhare bete tumse poochhein, ‘hum yah tyohar kyon manate hain?’+
27 to tum unhein batana, ‘jab israeli misra mein the, tab parmeshvar ne misriyon par kehar dhaaya tha. magar woh israeliyon ke gharon ko chhodkar aage badh gaya aur is tarah usne hamare gharon ko bakhsh diya. iseeliye hum fasah ki yah bali yahova ke liye chadhate hain.’”
tab israeliyon ne munh ke bal zameen par girkar dandvat kiya.
28 israeliyon ne jaakaar vahi kiya jo yahova ne moosa aur haaroon ko aagya di thi.+ unhonne theek vaisa hi kiya.
29 fir usi din aadhi raat ko yahova ne misra desh ke sabhi pehalauthon ko maar daala.+ raajgaddi par baithnevale firaun ke pehalauthe se lekar jail* mein pade kaidi tak ke pehalauthe ko aur sab jaanvaron ke pehalauthon ko maar daala.+
30 raat mein firaun aur uske sabhi adhikari aur misri log jaag uthe. misriyon ke yahaan bada haahakar mach gaya kyonki ek bhi ghar aisa nahin tha jahaan maut na hui ho.+
31 firaun ne raat mein hi moosa aur haaroon ko bulvaya+ aur unse kaha, “chale jaao tum yahaan se. apne sab israeliyon ko lekar nikaal jaao mere logon ke beech se. tumne kaha tha na, tum yahova ki seva karna chahte ho, to jaao yahaan se.+
32 aur jaisa tumne kaha tha, apni bhed-bakriyaan, gaay-bail sab saath lete jaao.+ magar jaate-jaate mujhe duayen dena mat bhoolo.”
33 fir misri log israeliyon se hadbadi karane lage ki woh jald-se-jald+ unke desh se nikaal jaayen. misri kehne lage, “kahin aisa na ho ki hum sab mar jaayen.”+
34 isliye israeliyon ne gundha hua aata liya aur usmein khameer milaye bagair hi use aata goondhne ke bartanon* mein daalkar kapdon mein lapeta aur apne kandhon par rakh liya.
35 aur jaise moosa ne unhein bataya tha, unhonne misriyon se sone-chaandi ki cheezen aur kapde maange.+
36 yahova ne misriyon ko israeliyon par aisa meharban kiya ki unhonne israeliyon ko munh maangi cheezen de di. israeliyon ne ek tarah se misriyon ko loot liya.+
37 iske baad israeli raamses+ se sukkot+ ke liye nikaal pade. unmein aadmiyon ki ginti kareeb 6,00,000 thi jo paidal chalkar gaye aur unke alava bachche bhi the.+
38 unke saath logon ki ek mili-juli bheed*+ bhi nikli. woh sab apne saath bhed-bakriyon aur gaay-bailon ka ek bada jhund bhi le gaye.
39 raaste mein unhonne us gundhe huye aate se, jo woh misra se laaye the, bin-khameer ki gol-gol rotiyaan banayin. aate mein khameer nahin milaya gaya tha, kyonki unhein itni jaldi misra chhodna pada tha ki woh khaane ki cheezen taiyar nahin kar paaye.+
40 israeliyon ne, jo misra mein reh rahe the,+ 430 saal+ pardesiyon ki zindagi guzari thi.
41 jis din 430 saal khatm huye usi din yahova ke logon ki badi bheed* misra desh se baahar nikli.
42 har saal is raat woh is baat ki khushiyaan manayenge ki yahova unhein misra se nikaal laaya tha. sabhi israeliyon ko peedhi-dar-peedhi yahova ke samman mein is raat ki yaadgar manani hai.+
43 yahova ne moosa aur haaroon se kaha, “fasah ke tyohar ke niyam ye hain: koi bhi pardesi fasah ka khaana nahin khaa sakta.+
44 lekin agar kisi israeli ke paas daam dekar khareeda hua daas ho to uska khatna kiya jaana chahiye,+ tabhi woh fasah ka khaana khaa sakta hai.
45 koi bhi pravasi ya dihadi par kaam karnevala fasah ka khaana nahin khaa sakta.
46 fasah ka memna ek hi ghar ke andar khaaya jaaye. uska maans tum ghar ke baahar mat le jaana aur uski ek bhi haddi na todna.+
47 israel ki poori mandli ko yah tyohar manana chahiye.
48 tumhare beech rehnevala koi pardesi agar yahova ke liye fasah manana chahta hai, to use apne gharane ke sabhi ladkon aur aadmiyon ka khatna karana hoga. aisa karne par woh paidaishi israeliyon ke barbar samjha jaayega aur tabhi woh fasah ka tyohar mana sakega. magar koi bhi khatnarahit aadmi fasah ka khaana nahin khaa sakta.+
49 paidaishi israeliyon aur tumhare beech rehnevale pardesiyon, donon par ek hi kaanoon laagoo hoga.”+
50 sab israeliyon ne vahi kiya jo yahova ne moosa aur haaroon ko aagya di thi. unhonne theek vaisa hi kiya.
51 isi din yahova israeliyon ki poori bheed* ko misra se baahar nikaal laaya.
kai footnote
^ shaa., “do shaamon ke beech.” zahir hai, sooraj dhalne aur andhera hone ke beech ka vakt.
^ shaa., “apni kamar kaskar.”
^ purane aate ki bachi hui loi jo khameeri hoti hai. naya aata goondhte vakt use khameera banane ke liye aisi loi milayi jaati thi.
^ shaa., “senaon.”
^ yaani bhed ya bakri ke bachche.
^ shaa., “naash.”
^ shaa., “ kund-ghar.”
^ ya “katoron.”
^ yaani gair-israeliyon ki ek mili-juli bheed jismein misri bhi the.
^ shaa., “senayen.”
^ shaa., “senaon.”
