nirgaman 17:1-16
17 israeliyon ki poori mandli yahova ke aadesh ke mutabik seen veerane se aage badhi.+ woh jagah-jagah se hote huye rapeedeem+ pahunche aur vahaan unhonne dera daala.+ magar logon ke peene ke liye kahin paani nahin tha.
2 isliye log moosa se jhagadne lage+ aur kehne lage, “hamein peene ke liye paani de.” moosa ne unse kaha, “tum log kyon mujhse jhagad rahe ho? kyon baar-baar yahova ki pareeksha lete ho?”+
3 fir bhi woh moosa ke khilaf kudkudate rahe kyonki unhein bahot pyas lagi thi.+ woh moosa se kehte rahe, “tu kyon hamein misra se yahaan le aaya? kyon hamein aur hamare bachchon aur jaanvaron ko pyasa maar raha hai?”
4 aakhirkar moosa ne yahova ko pukara, “main in logon ka kya karoon? kuch hi der mein ye log mujhe pattharon se maar daaleinge!”
5 yahova ne moosa se kaha, “tu apne haath mein woh chhadi le, jise toone neel nadi par maara tha+ aur israel ke kuch mukhiyaon ko lekar logon ke aage-aage chal
6 aur horeb jaa. dekh! main vahaan horeb mein chattan ke paas tere saamne khada rahoonga. tujhe us chattan par chhadi maarni hogi, tab usmein se paani niklega aur log peeyenge.”+ moosa ne israel ke mukhiyaon ke dekhte aisa hi kiya.
7 usne us jagah ka naam massa*+ aur mareeba*+ rakha, kyonki vahin par israeliyon ne usse jhagda kiya tha aur yah kehte huye yahova ki pareeksha li thi,+ “yahova hamare beech hai bhi ya nahin?”
8 jab israeli rapeedeem mein the, tab amaleki+ logon ne aakaar un par hamla bol diya.+
9 is par moosa ne yahoshoo+ se kaha, “tu hamare kuch aadmiyon ko chun aur unhein saath lekar kal amalekiyon se ladne jaa. main apne haath mein sachche parmeshvar ki chhadi liye pahadi ki choti par khada rahoonga.”
10 yahoshoo ne theek vaisa hi kiya jaisa moosa ne use bataya tha.+ usne jaakaar amalekiyon se ladai ki. moosa, haaroon aur hoor+ pahadi ki choti par gaye.
11 is ladai ke dauran jab moosa apne haath oopar uthaye rehta to israeli jeetne lagte, magar jaise hi woh apne haath neeche karta amaleki jeetne lagte.
12 kuch samay baad jab moosa ke haath thakne lage to woh uske baithne ke liye ek patthar le aaye aur moosa us par baith gaya. fir haaroon aur hoor ne moosa ke haathon ko sahara diya, ek ne baayin taraf se aur doosre ne daayin taraf se. isliye sooraj dhalne tak moosa apne haath oopar uthaye raha.
13 is tarah yahoshoo ne apni talvar se amalekiyon aur unke saathiyon ko hara diya.+
14 fir yahova ne moosa se kaha, “main amalekiyon ko dharti* se is tarah mita doonga ki koi unhein yaad tak nahin karega. meri yah baat kitab mein likhkar rakh taaki yah kabhi bhulayi na jaaye* aur yahoshoo ko bhi suna.”+
15 iske baad moosa ne ek vedi banayi aur uska naam yahova-nissi* rakha.
16 usne kaha, “amalek ne yaah ki raajgaddi ke khilaf haath uthaya hai,+ isliye yahova peedhi-peedhi tak usse yuddh karta rahega.”+
