nirgaman 1:1-22
1 israel yaani yakub ke jo bete uske saath apne-apne parivar ko lekar misra aaye, woh ye hain:+
2 rooben, shimon, levi aur yahooda,+
3 issakar, jabooloon aur binyameen,
4 daan aur naptali, gaad aur aasher.+
5 yoosuf pehale se misra mein tha. yakub ke gharane mein jitne log paida huye the* unki ginti 70 thi.+
6 kuch vakt baad yoosuf ki maut ho gayi+ aur uske sabhi bhaai aur uski peedhi ke sab log mar gaye.
7 israeliyon* ki kai santanein huin aur unki ginti bahot badhne lagi. woh dinon-din taakatvar hote gaye aur unki aabadi itni tezee se badhne lagi ki woh poore misra mein bhar gaye.+
8 kuch samay baad misra mein ek naya raja gaddi par baitha jo yoosuf ko nahin jaanta tha.
9 us raja ne apne logon se kaha, “dekho, in israeliyon ki ginti hamse zyada ho gayi hai aur ye hamse zyada taakatvar ho gaye hain!+
10 isliye aao hum inki aabadi rokne ki koi tarkeeb sochein, varna inki taadad isi tarah badhti jaayegi. aur agar hamare dushmanon ne hamare khilaf jang chhedi to ye israeli unke saath mil jaayenge aur hamse ladeinge aur yah desh chhodkar bhaag jaayenge.”
11 isliye misriyon ne israeliyon ko satane ke liye un par aise adhikari* thehraye jo unse kadi mazdoori karvate the.+ israeliyon ne isi tarah mazdoori karke firaun ke liye pitom aur raamses+ naam ke godamvale shehar banaye.
12 misriyon ne israeliyon ko bahot sataya, fir bhi israeliyon ki taadad badhti gayi aur woh misra mein door-door tak failte gaye. isse misriyon ke dil mein israeliyon ka khauf baith gaya aur woh unse nafrat karne lage.+
13 ab misri israeliyon se aur bhi kadi gulami karvane lage.+
14 unhonne unka jeena mushkil kar diya. unhonne unse mitti ka gaara aur int banane ka kaam karvaya aur maidanon mein bhi unse har tarah ki gulami karvayi. is tarah misriyon ne unse bure-se-bure haalaat mein kadi mazdoori karayi.+
15 baad mein misra ke raja ne shipra aur pooa naam ki do ibri dhaaiyon se kaha,
16 “jab tum ibri aurton ka prasav karao+ to ek kaam karna. agar ladka paida hua to use maar daalna, ladki hui to chhod dena.”
17 lekin un dhaaiyon ne vaisa nahin kiya jaisa raja ne unse kaha tha, kyonki woh sachche parmeshvar ka dar maanti thi. woh ladkon ko zinda chhod deti thi.+
18 kuch vakt baad misra ke raja ne un dhaaiyon ko bulakar unse poochha, “tum ladkon ko zinda kyon chhod deti ho?”
19 dhaaiyon ne firaun se kaha, “ibri aurtein misri aurton ki tarah nahin hain. woh badi furteeli hain, dhaai ke aane se pehale hi bachcha jan leti hain.”
20 un dhaaiyon ne jo kiya, uski vajah se parmeshvar ne unke saath bhalai ki. israeliyon ki ginti badhti gayi, woh bahot taakatvar hote gaye.
21 un dhaaiyon ne sachche parmeshvar ka dar maana tha, isliye aage chalkar parmeshvar ne unhein aulad ka sukh diya.
22 ab firaun ne apne sabhi logon ko aagya di, “ibriyon ke ghar jo bhi ladka hoga use tum neel nadi mein feink dena. agar ladki hui to use zinda chhod dena.”+
