Upodexok 12:1-14
12 Tujea tornattponnachea disamnim tujea Vortea Rochnnaracho ugddas kor, niraxiponnache* dis ieunchea poilim ani, “Mhojea jivitant mhaka kainch khuxalkai mellona,” oxem mhunnchim vorsam ieunchea poilim,
2 surian, chondriman ani noketramnim uzvadd diuncho bond korchea poilim, ani kallokh zaunchea poilim, toxench paus poddlea uprant* kupam porot bhoron ieunchea poilim,
3 ghorache rakhonndar halonk* lagchea poilim, bollvont munis bagonchea poilim, ani teo unneo zaleat mhunn dollttaleo teo bailo tem soddun diunchea poilim, toxench zonelantlean bhair polloitolea bailank kallokh dischea poilinch tacho ugddas kor.
4 Rostea voilim daram bond zaunchea poilim, girnnicher dolltta to avaz unno zaunchea poilim, suknneachea avazan eklo zago zaunchea poilim, ani sogleo dhuvo gaitat to avaz unno zaunchea poilim tacho ugddas kor.
5 Toxench, eklo unchaiek lagon bhiunchea poilim ani rosteancher dhoko vaddchea poilim, badamachem zhadd fulchea poilim, toll paim voddit cholchea poilim, ani ruch vaddoita tem foll* funtton piddʼddear zaunchea poilim, ani munis aplea sodanchea ghora vatten voichea poilim ani dukh kortat te rosteancher hanga-thoim bhonvchea poilim,
6 chandichi dori tunttchea poilim, bhangrachea kanxeacho churo zaunchea poilim, zhori lagim aslolo kollso funttchea poilim ani baim-chi* gaddi moddchea poilim tacho ugddas kor.
7 Tednam zomnintli dhulʼl zomnint porot voitoli. Ani khorea Devan ji jivitachi xokti diloli ti porot tachea lagim voitoli.
8 Upodexok mhunntta: “Samkem polkeponn!* Soglem polkem!”
9 Upodexokan zannvai melloun ghetli tem khorem, punn apunn zannam zalo tem to dusrea lokankui xikoit ravlo. Toxench, zaiteo mhunnʼnneo toiar korunk,* tannem khub niall kelo ani kholaien sodh kelo.
10 Upodexokan borim utram sodhun kaddunk ani sotachim utram sarkim borounk khub vavr kelo.
11 Zannvaiechea munxanchim utram eka tonkache boddie* bhaxen asat ani tancheo vinchun kaddloleo mhunnʼnneo ghott marlolea khillea bhaxen asat. Tim ekach gonvllea thaun asat.
12 Mhojea puta, hachea bhair kitem-i aslear hea xittkaunnecher dhean di: Pustokam borovop kednanch sompchem na, ani tim vachun-vachun munis thokta.
13 Atam soglem aikon zalea uprant, tunvem ugddas dovrunk zai ti mhotvachi vost hi: Khorea Devachi bhirant dhor ani tacheo adnea pall, karonn hich munxachi zobabdari zaun asa.
14 Karonn khoro Dev dor ek kam, toxench dor ek liplolem kam pasun, tem borem vo vaitt asa tem tharaitolo.
Footnotes
^ Vo “odruxttache.”
^ Vo ghoddie, “pausa sangata.”
^ Vo “koddkoddonk.”
^ Inglez bhaxent “caper berry.”
^ Mhunnche, udok samballun dovrunk marlolo fondd.
^ Vo “kainch faideachem na.”
^ Vo “mhunnʼnneo manddavollin borounk.”
^ Hea boddiek eke vatten borench tonk astalem ani ti gorvank dhanvddaunk uzar kortale.
