Upodexok 8:1-17
8 Zannvaiechea munxa bhaxen konn asa? Ek kotthin poristhiti suttavi korunk* konn zannam? Eka munxachi zannvai tachea tonddar uzvadd haddtta ani tachem ragixtt mukhamoll khuxal korta.
2 Hanv mhunnttam: “Devak dilolea soputak man diun razacho hukum pall.
3 Tachea mukhavoilo koddsoronk utavollai korinaka. Khoincheach vaitt kama pasot ubo ravonaka, karonn apleak zai tem to korunk xokta.
4 Tachem utor pallunkuch poddtta. ‘Tum kitem korta,’ mhunn taka konn vicharunk xokta?”
5 Adnea palltta taka kainch vaitt zaunchem na, ani umkench* korunk sarko vell ani sarki rit khoinchi tem eka zannvaiechea munxak khobor asta.
6 Karonn munxakullak zaite tras astat, punn soglem korunk sarko vell ani ek rit asta.
7 Kitem ghoddttolem tem konnuch nokllo zalear tem koxem ghoddttolem tem konn sangonk xokta?
8 Eka munxak aplea jivitachea svasacher kainch tabo na vo to aplem jivit addaun dovrunk xokona, teach toren mornnachea disacher konnachoch tabo na. Zhuz chalu astana, tem soddun porot vochonk porvangi mellona, teach bhaxen noxtteponn korta to tachea porinnama thaun vanchonk xokona.*
9 Hem soglem hanvem polloilem ani suria ponda kortat tea dor eka kamacher hanvem mhojem kalliz lailem, hea soglea vellar munxan-munxancher hukum choloun aplench luksonn kelam.*
10 Ani hanvem noxttea munxank purtat tem polloilem, je povitr zagear bhair-bhitor sortale. Punn jea xarant tannim noxtteponn kelʼlem tea xarantle lok tankam rokddech visorle. Hem pasun polkeponn.
11 Vaitt kamam pasot rokddich khast mellona tednam munxachem kalliz anikui vaitt korunk fuddem sorta.
12 Ek patki xembor pavtti vaitt korun lamb kall jieta zalear pasun, zankam khorea Devachi bhirant asa tanchem borem zatolem mhunn hanv zannam, karonn te khorench tachi bhirant dhortat.
13 Punn noxtteachem borem zaunchem na, toxench savlle bhaxen aslole tache dis to vaddounk xokchona, karonn to Devachi bhirant dhorina.
14 Prithumer oxem kitem tori ghoddtta jem polkem asa:* Nitivont munxamnim noxttim kamam kelʼlea bhaxen dusrim tanchea sangata vagtat, ani noxttea munxamnim nitivont kamam kelʼlea bhaxen dusrim tanchea sangata vagtat. Hem pasun polkeponn oxem mhaka dista.
15 Tor khuxalkai monoi mhunn hanv sangtam, karonn khavop, pievop ani khuxal zavop hachea bhair suria ponda munxa pasot anik kainch borem na. Suria ponda khorea Devan dilolea jivitant koxtti vavr korchea sangata tannem hem-ui korunk zai.
16 Zannvai melloun gheunk ani prithumer zatat tim soglim kamam pollounk hanvem mhojea kallzant tharailem. Hem korunk hanv dis-rat nhidonk pasun na.*
17 Uprant hanvem khorea Devachea soglea kamam vixim chintlem, ani suria ponda jem kitem ghoddtta tem munis somzon gheunk xokona mhunn mhaka kollʼllem. Tem somzon gheunk te xanne asat, oxem tannim mhunnttlem zalear pasun te purnn toren tem somzon gheunk xokonant.
