Upodexok 10:1-20
10 Melʼlea musak lagon tel* piddʼddear zata ani taka ghann marta, teach bhaxen ilʼlem-xem murkhponn, zannvai ani mhoima piddʼddear korun uddoita.
2 Zannvaiechea munxachem kalliz taka sarke vatten vhorta,* punn pixeachem kalliz taka chukichea vatten vhorta.*
3 Murkh khoinchea-i vatten cholom, taka okʼkol asona, ani apunn murkh mhunn to sogleank dakhoun dita.
4 Raz choloupeacho rag* tujer choddlo zalear, tuzo zago soddinaka, karonn xant ravlolean vhoddlim patkam addaunk zatat.
5 Suria ponda hanvem anik ek dukhachi vost polloilea, ti ek osli chuk je odhikar aslole munis kortat:
6 Murkhank* zaiteo vhoddleo-vhoddleo podveo ditat, punn girest* sokoilea podvencheruch urtat.
7 Hanvem sevokank ghoddeacher boslole polloileat, ani kunvor sevokam bhaxen cholon voitat tem polloilam.
8 Zo fondd marta, toch tea fonddant poddonk xokta, ani fatranchi vonott moddun uddoita taka sorop chabunk xokta.
9 Zo khonnint fator foddun kaddtta taka tancho mar lagonk xokta, ani zo konn lakddam foddtta, tacho jiv dhokeant poddonk xokta.*
10 Dhar gelʼlea kuraddek* dhar kaddina zalear, ti uzar kortoleak chodd vavr korunk poddttolo. Punn zannvaien kam kelolean ies melltta.
11 Sorpak nachoupean* tacher tabo gheunchea poilinch, tea sorpan taka chablear koslo faido?
12 Zannvaiechea munxachea tonddantlim utram maniotai haddttat, murkhanche vontt takach nisonttonak pavoitat.
13 Tachea tonddantlean bhair sortat tim poilim utram murkhponnachim astat, ani xevottachim utram pixeponnachim, jim odruxtt voddun haddttat.
14 Punn murkh uloit ravta.
Fuddem kitem zatolem tem ek munis nokllo. Tachea fattlean kitem zatolem tem konn taka sangonk xokta?
15 Murkhacho koxtti vavr taka samko thokoita, karonn xarant khoinche vatten voichem tem pasun taka khoborna.
16 Ek lhan bhurgo desacho raza zalear ani tache kunvor sokallinch mouza marunk lagle zalear, tea desachem kitem zatolem!
17 Punn ek unch ghoranneantlo put raza zalo zalear ani tache kunvor ghottaiek lagon sarkea vellar khatat-pietat ani bebdikai korinant zalear, tea desant kitli khuxalkai astoli!
18 Chodduch allxiponnam kelʼlean ghorache vanxe sokol poddttat ani bekar boslolean* ghor ponvta.
19 Unddo* tonddar hanso haddtta, ani drakxancho soro jivitant khuxalkai haddtta, punn poixeamnim dor ek goroz purnn zata.
20 Tujea chintnamnim* pasun razak xirap ghalinaka, ani tujea nhidpachea rumant eka girest munxacher xirap ghalinaka, karonn ek suknnem to avaz* tanchea poriant pavoit, vo ek uddpi pranni* tim utram tanchea mukhar porot sangot.
Footnotes
^ Utran utor, “cher toiar kortat tachem tel.”
^ Utran utor, “tachea uzvea hata vatten asta.”
^ Utran utor, “tachea davea hata vatten asta.”
^ Utran utor, “svas.”
^ Vo “Murkhponnak.”
^ Vo “purte aslole.”
^ Vo ghoddie, “tannem tanchea thaun samballun ravonk zai.”
^ Vo “lokhnnachea vostuk.”
^ Utran utor, “Montr mhunnpean.”
^ Vo “bekar hatank lagon.”
^ Vo “Jevonn.”
^ Vo ghoddie, “khattir.”
^ Vo “sondex.”
^ Utran utor, “vo pakhotte aslolo ek pranni.”
