Upodexok 5:1-20
5 Tum khorea Devachea ghorant voita tednam tujea panvlancher dhean di. Murkham bhaxen bolidan bhettounk voiche bodlek, thoim aikonk vochop odik borem. Karonn apunn kortat tem vaitt mhunn murkhank khobor asona.
2 Uloupant utavollai korinaka, toxench tujea kallzant asa titlem-i khorea Deva mukhar chintinastana uloinaka. Karonn khoro Dev sorgar asa, punn tum prithumer asa. Taka lagon tujim utram thoddim asonk zai.
3 Karonn zaitea chintnank* lagon sopon poddtta, ani ek murkh boddboddtta tednam tachea zaitea utrank lagon tachem murkhponn dison ieta.
4 Tum Devak ek angvonn korta tednam ti pallunk vell korinaka, karonn murkh lokank lagon Dev khuxal zaina. Tum ji angvonn korta ti pall.
5 Angvonn korun ti pallinastana ravchea bodlek tum angvonn korinastananch ravlear borem.
6 Tujea tonddak lagon tum patkant poddona zaunk kallji ghe, ani tuji chuk zali mhunn devduta* mukhar mhunnonaka. Na tor, tujea utramnim khorea Devak rag ie-it ani to tujea hatanchea kamancho nas korit.
7 Karonn zaitea chintnank lagon sopnam poddttat toxim, zaitea utrancho boddbodd korta tea munxachim utram polkim. Punn tum khorea Devachi bhirant dhor.
8 Tujea jilʼleant konnui goribacher zulum korta, toxench onʼneai ani onitivontponn korta tem tunvem polloilem zalear ojap zainaka. Karonn tea vhodd odhikareacher tachea poros ek vhodd odhikari nodor dovrun asa, ani tanchea poros anik chodd odhikar aslole zaite odhikari asat.
9 Toxench, zomni thaun melltta ti zodd tankam sogleank vanttʼttat, razacheo gorzo pasun tea xetachea pike vorvim purnn zatat.
10 Zo chandicho mog korta to chandik lagon kednanch dhadoxi zaunchona, toxench zo girestkaiecho mog korta to aple girestkaiek lagon kednanch dhadoxi zaunchona. Hem pasun polkeponn.
11 Boreo vostu vaddttat tednam, teo khaupi vaddttat. Ani tanchea dhoniak teo fokot pollounk mellttat, tachea bhair taka anik tancho kitem faido asa?
12 Ek sevok unnem khaum vo chodd khaum tachi nhid kitli bori, punn girest munxa koddem asloli bhorpur girestkai taka nhidonk dina.
13 Suria ponda hanvem ek dukhest ghoddnni polloilea ti hi:* girestkai ektthaim korun munis apleacheruch tras haddtta.
14 Tachea dhondeant luksonn zalolean to apli girestkai hogddaita, ani to bapui zata tednam tachea putak daiz diunk kainch urona.
15 Zoso ek munis aplea avoichea kusveantlean vingllo aila, tosoch to voitolo. Jivitbhor koxtti vavr korunui to aplea sangata kainch vhoronk xokona.
16 Hi pasun ek dukhest ghoddnni:* Eklo zoso aila, tosoch to voitolo, tor koxtti vavr korun ani varea fattlean dhanvon kitem faido?
17 Tea bhair, to dor disa kallkhant jevta, ani bejesanvan, duensan ani ragan bhorlolo asta.
18 Hem borem ani sarkem mhunn hanvem polloilam: khavop, pievop ani aplea koxtti vavrant khuxalkai melloun ghevop. Karonn khorea Devan taka dilolea thoddeach disanchea jivitant to suria ponda zo vavr korta tacho ho inam* zaun asa.
19 Toxench, khoro Dev eka munxak girestkaie borabor khuxalkai melloun gheunchi tank dita tednam, tannem to inam* gheunk zai ani aplea koxtti vavra pasot khuxal zaunk zai. Hem Devachem dennem zaun asa.
20 Karonn tannem aple jivitache dis koxe sarle tem taka kollchem pasun na,* karonn tachem kalliz khuxal korta toslea kamamnim khoro Dev taka buddoun dovorta.
