Upodexok 2:1-26
2 Uprant hanvem mhojea kallzant mhunnttlem: “Chol, atam hanv mouza marun* polloitam, ani kitem borem zatolem tem polloitam.” Punn polloi! tem pasun polkeponn.
2 Hanvem mhunnttlem, “Hansop mhunnttlear pixeponn!”
Ani hanvem vicharlem, “Mouza korun* kitem faido?”
3 Hanv drakxancho soro pieun polloitolom mhunn hanvem chintlem, punn hanvem ttaitt zaun mhoji zannvai hogddaunk na. Mollba sokol thoddeach disanchem jivit jieupi munxan, kitem kelear sogleant borem tem hanv zannam zaunk sodhtalom dekhun hanvem murkhponn pasun apnnailem.
4 Hanvem vhoddlim-vhoddlim kamam hatant ghetlim. Hanvem mhojea pasot ghoram bandlim, mhojea pasot drakxanche molle roile.
5 Hanvem mhojea pasot vhodd ani lhan bago laileo, ani tantunt sogle torechim follam diupi zhaddam lailim.
6 Thoim vaddttolea zhaddank* udok ghalunk, hanvem mhojea pasot udkachim tollim bandun kaddlim.
7 Hanvem chakor ani chakorneo dovorleo, ani mhojea lagim oslim-i chakram aslim jim mhojea ghorant zolmolʼlim. Toxench, mhojea lagim bhorpur hindd asle, zaitim gorvam ani menddram aslim. Jeruzalemant mhojea poilim aslolea khoincheach razam kodden mhojea lagim asat title hindd nasle.
8 Hanvem mhojea pasot chandi ani bhangar ektthaim kelem, razanche ani prantantle theve ektthaim kele. Hanvem mhojea pasot gaupi dadle ani bailo ektthaim keleo, toxench munxachea putank khuxalkai haddtta tosle bailecho, hoi, toslea zaitea bailancho sangat hanvem melloun ghetlo.
9 Hea toren hanv vorto zalom, ani mhojea lagim jem aslem tem Jeruzalemant mhojea poilim konnancheach lagim naslem. Torui hanvem mhoji zannvai samballʼlli.
10 Mhoji dor ek itsa* hanvem purnn keli. Mhoje khoinchech anvdde* purnn korunk hanvem mhojea kallzak addaunk na. Mhojea soglea koxtti vavrak lagon mhojem kalliz khuxal aslem. Ho soglo mhojea koxtti vavracho inam* aslo.
11 Punn hanvem mhojea hatamnim kelʼlea kamancher, ani hem soglem melloun gheunk kelʼlea koxtti vavracher niall kelo tednam, hem soglem polkem, fokot varea fattlean dhanvlolea sarkem mhunn hanv zannam zalom. Suria ponda khorea valorachem* kainch naslem.
12 Tednam hanvem zannvai, pixeponn ani murkhponnacher mhojem dhean dilem. (Karonn raza uprant ieta tea munxachean kitem korunk zata? Fokot tench jem poilim kelʼlem asa.)
13 Ani kallkha poros uzvadd boro asta toso, murkhponna poros zannvai bori mhunn hanvem polloilem.
14 Zannvaiechea munxak soglem spoxttponnim dista,* punn murkh munis kallkhant cholta. Tancho sogleancho porinnam ekuch asa, hem pasun hanv zannam zaunk pavlom.
15 Uprant hanvem mhojea kallzant mhunnttlem: “Murkham sovem ghoddtta tem mhojea-i sovem ghoddttolem.” Toxem zalear, itlo zannvaiecho zaun mhaka kitem faido zalo? Tor hanvem mhojea kallzant mhunnttlem: “Hem pasun polkeponn.”
16 Karonn zannvaiechea munxacho vo murkhacho konnankuch ugddas urona. Ieunche asat tea disamnim, lok sogleank visortole. Ani zannvaiecho munis koso mortolo? Murkh morta toso to-ui mortolo.
17 Tor hanv jivitacho dves korunk laglom, karonn suria ponda zatat tim soglim kamam polloun mhaka khub niraxiponn bhoglem, karonn soglem polkem, fokot varea fattlean dhanvlolea sarkem.
18 Suria ponda hanvem kelolea soglea koxtti vavracho hanv dves korunk laglom, karonn mhojea fattlean ieta tea munxa pasot hanvem tem soddun vochonk poddttolem.
19 Ani to zannvaiecho vo murkh astolo tem konnank khobor? Tori astana, hanvem suria ponda itlo vavr korun ani zannvai uzar korun melloun ghetleat teo vostu to aplea tabeant ghetolo. Hem pasun polkeponn.
20 Tor suria ponda hanvem bhorpur koxtt korun zo vavr kelʼlo, tea vixim chintun mhojem kalliz niraxi zaunk laglem.
21 Karonn ek munis zannvai, ginean ani kola uzar korun khub vavr korit, punn tannem aplo vantto* eka oslea munxachea hatant diunk poddtta zannem tea pasot vavr korunk na. Hem pasun polkeponn ani khubuch dukhachem.
22 Suria ponda khub koxtti vavr kelolean ani ies melloun gheunk bhar ghetlolean* eka munxak khorem mhunnttlear kitem melltta?
23 Karonn tache jivitache sogle dis, tachem kam taka dukh ani bejesanv haddtta ani ratik pasun tachea kallzak suseg mellona. Hem pasun polkeponn.
24 Khavop, pievop ani aplea koxtti vavrant khuxalkai melloun ghevop hachea poros borem anik kainch na. Hem pasun mhaka kollon ailam ki tem khorea Devachea hatantlean asa,
25 karonn mhojea poros odik borem konn khata ani pieta?
26 Apleak manvota tea munxak to zannvai, ginean ani khuxalkai dita, punn patkeak to ektthaim korchem kam dita, ani tannem ektthaim kelam tem to oslea munxak favo korta zo khorea Devak manvota. Hem pasun polkeponn, fokot varea fattlean dhanvlolea sarkem.
Footnotes
^ Vo “hanv khuxal zaun.”
^ Vo “Khuxal zaun.”
^ Vo “ranak.”
^ Utran utor, “Mhojea dolleamnim maglem tem soglem.”
^ Vo “Mhaka khuxalkai dita ti dor ek vost.”
^ Vo “vantto.”
^ Vo “ponda faideachem.”
^ Vo “munxache dolle ukte astat.” Utran utor, “Zannvaiechea munxachea toklent dolle astat.”
^ Vo “punn taka soglem.”
^ Utran utor, “ani purnn kallzan vavurlolean.”
