Upodexok 3:1-22

  • Soglea vostunk ek nemlolo vell asa (1-8)

  • Jivitant khuxalkai melloun ghevop Deva thaun ek dennem (9-15)

    • Munxachea kallzant sasnak jieunchi itsa asa (11)

  • Dev neai-an sogleanchi zhoddtti korta (16, 17)

  • Xevottak munxam toxench zonvaram soglim mortat (18-22)

    • Soglim porot dhulʼlint voitolim (20)

3  Soglea vostunk ek nemlolo vell asa,Mollba khala zatolea dor eka kamak ek vell asa:  2  Zolmonk ek vell ani moronk ek vell,Rovunk ek vell ani roilolem umttun kaddunk ek vell,  3  Marun uddounk ek vell ani boro korunk* ek vell,Moddun uddounk ek vell ani bandun kaddunk ek vell,  4  Roddonk ek vell ani hansonk ek vell,Dukh korunk ek vell ani nachonk* ek vell,  5  Fator bhair marunk ek vell ani fator ektthaim korunk ek vell,Veng marunk ek vell ani veng marinastana ravonk ek vell,  6  Sodhunk ek vell ani sanddlam mhunn somzon, tem soddun diunk ek vell,Dovrunk ek vell ani bhair marunk ek vell,  7  Pinzun uddounk ek vell ani xinvonk ek vell,Vogi ravonk ek vell ani ulounk ek vell,  8  Mog korunk ek vell ani dves korunk ek vell,Zhuz korunk ek vell ani xanti korunk ek vell. 9  Aplea soglea vavrantlean eka kamdarak kitem melltta? 10  Munxanchea putamnim korunk Devan tankam koslem kam dilam tem hanvem polloilam, zantunt te buddon urtat. 11  Tannem sogleo vostu sarkea vellar keleat ani teo khorench sobit* asat. Tannem tanchea kallzant sasnak jieunchi itsa ghatlea, tori astana khorea Devan survatek thaun xevottak poriant jem kitem kelam tem munis kednanch sodhun kaddunk pavchona. 12  Mhaka somzon ailam ki tannim jivitbhor khuxal asop ani borem tem korop, hachea poros borem anik kainch na, 13  toxench sogleamnim khavop ani pievop ani aplea koxtti vavrak lagon khuxalkai melloun ghevop hachea poros borem anik kainch na. Hem Devachem dennem zaun asa. 14  Mhaka kollon ailem ki khoro Dev korta tem soglem sasnachea-sasnak togtolem. Tantunt kainch ghalunk zaina, toxench tantuntlean kainch kaddunk zaina. Lokamnim apli bhirant dhorchi mhunn khorea Devan tem oxem kelam. 15  Jem ghoddtta tem poilinch ghoddlam, ani jem zaunchem asa tem poilinch zalam, punn munxamnim jem melloun gheuncho proitn kela* tem khoro Dev sodhta.* 16  Suria ponda hanvem hem-ui polloilam: Neai-a bodlek noxtteponn aslem, ani nitivontponna bodlek noxtteponn aslem. 17  Tor hanvem mhojea kallzant mhunnttlem: “Khoro Dev nitivontacho ani noxtteacho, dogaincho-i neai kortolo, karonn dor eka vostuk ani dor eka kamak ek vell asa.” 18  Munxanchea putam vixim hanvem mhojea kallzant oxem-i mhunnttlem, khoro Dev tanchi porikxa kortolo ani te zonvaram sarke asat mhunn tankam dakhoun ditolo, 19  karonn munxancho xevott zata ani zonvarancho-i xevott zata, tancho sogleancho ekuch xevott zata. Eklo morta toso dusro-i morta, ani tankam sogleank ekuch torecho jiv asa. Tor munis zonvaram poros vorto nhoi, soglem polkem. 20  Sogle ekuch zagear voitat. Te sogle dhulʼlintlean aileat ani te sogle porot dhulʼlint voitat. 21  Munxancho jivitacho svas voir voita, ani zonvarancho jivitacho svas prithumechea sokol voita mhunn konn khatren sangonk xokta? 22  Ani eka munxan apnnem kelʼlea kamant khuxalkai melloun ghevop hachea poros borem anik kainch na, karonn to tacho inam.* Xevottak to gelea uprant, kitem ghoddttolem tem konn taka dakhounk xokta?

Footnotes

^ Vo “ani pekounni diunk.”
^ Utran utor, “uddio marunk.”
^ Vo “teo manddavollin; teo purteo.”
^ Vo ghoddie, “punn jem ghoddon gelam.”
^ Vo “ghoddoun haddttolo.”
^ Vo “vantto.”

Copyrights for this publication