Upodexok 9:1-18
9 Tor hanvem hea soglea vostuncher niall kelo, ani nitivont munis toxench zannvaieche munis ani tanchim kamam khorea Devachea hatant asat mhunn mhaka kollʼllem. Aplea poilim aslolea lokam modem kitlo mog ani kitlo dves aslo tem munxank khoborna.
2 Nitivont ani noxtto, boro, xudʼdh ani oxudʼdh, bolidanam bhettoita to ani bolidanam bhettoina to, hancho sogleancho xevott* ekuch. Boro asta to patkea sarkoch asta. Soput gheta to, soput gheunchea vixim chotur asta tachea bhaxenuch asta.
3 Suria ponda zata ti hi ek dukhachi vost: Sogleancho ekuch xevott* zata dekhun munxachem kalliz vaittan bhorlam, ani jivitbhor tanchea kallzant pixeponn asa, ani uprant te mortat!*
4 Ek munis jivo asta tea meren taka bhorvonso asta, karonn melolea xinva poros ek jivem sunnem odik borem.
5 Jivim aslolim apunn mortolim mhunn zannant, punn meleant tankam kainch khobor asona, toxench tanchea pasot anik kainch inam* na, karonn tancho soglo ugddas kabar zaun gela.
6 Toxench, tancho mog, tancho dves, ani tanchi nattkai pasun kabar zaun gelea, ani suria ponda zata tea khoincheach kamant tankam anik vantto na.
7 Voch ani khuxalkaien tujem jevonn jev, ani sontosbhorit kallzant tuzo drakxancho soro pie, karonn khorea Devak tujea kamant khuxalkai mellʼllea.
8 Tuje kopdde sodanch dhove* asum, ani tuje tokler tel ghalunk visornaka.
9 Devan tuka suria ponda dilolea hea lhanxea* jivitache sogle dis tuje mogache baile sangata khuxalkaien jie. Karonn tum suria ponda korta tea soglea koxtti vavracho ani tujea jivitacho ho vantto zaun asa.
10 Tum* jem kitem korunk xokta, tem tujea purnn bollan kor. Karonn tum voita tea Fonddant,* koslench kam, ievzonn, ginean ani zannvai na.
11 Suria ponda zata ti anik ek vost hanvem polloilea, eke dhanvddent fastt* dhanvtat te sodanch jikhtat oxem nhoi, xoktivont asloleank zhuzant sodanch ies melltta oxem nhoi, zannvaieche asat tankam sodanch jevonn asta oxem nhoi, xanneam lagim sodanch girestkai asta oxem nhoi, toxench ginean asloleank sodanch ies melltta oxem nhoi, karonn okosmat ghoddttat teo ghoddnneo chintunk na tea vellar tanchea sovem ghoddttat.
12 Karonn munxak aplo vell khobor asona. Nustem okosmat zallant fosta toxem ani suknnim okosmat fasant sampoddttat toxim, munxanche put okosmat ieupi odruxttak* sampoddttat.
13 Suria ponda hanvem zannvaie vixim anik ek vost polloili, ji polloun hanv ojap zalom:
14 Ek lhan xar aslem zantunt thoddech lok ravtale. Ek xoktivont raza tea xarachea add ailo, ani tannem charui vatten vhoddlim durgam bandun taka gherav ghatlo.
15 Tantunt ek gorib punn zannvaiecho munis aslo, ani tannem tem xar aplea zannvaien salvar kelem. Punn tea gorib munxacho konnankuch ugddas uronk na.
16 Ani hanvem mhakach mhunnttlem: ‘Xokte poros zannvai chodd bori, tori astana eka gorib munxachi zannvai kainch valor naslolea bhaxen lekhtat ani konnuch tachea utrancher dhean dinant.’
17 Murkhancher raz choloitoleacho bovall aikonchea poros zannvaiechea munxan xantponnim sanglolim utram aikop odik borem.
18 Zhuzachea hotʼtearam poros zannvai chodd bori, punn zaitim borim kamam padd korun uddounk ekuch patki munis puro.
