Upodexok 7:1-29
7 Borea tela poros ek borem nanv chodd borem, ani zolmachea disa poros mornnacho dis chodd boro.
2 Fest aslolea ghorant gelʼlea poros mornnachea ghorant gelear chodd borem. Karonn dor eka munxacho xevott hoch zaun asa ani jivim asat tannim tem ugddas dovrunk zai.
3 Hanschea poros dukhi asop chodd borem. Karonn tondda voilem dukh munxachem kalliz borem korta.
4 Zannvaiechea munxachem kalliz dukh kortoleanchea ghorant asta, punn murkhanchem kalliz khuxalkai monoitoleanchea ghorant asta.
5 Murkhanchem git aikolea poros, zannvaiechea munxacho dhengso aikop chodd borem.
6 Karonn murkhancho hanso aidona ponda kantte zollon kittkittʼttolea avaza sarko asa. Ani hem pasun polkeponn.
7 Punn zulum eka zannvaiechea munxak piso korun uddoita ani lonch ekleachem kalliz broxtt korta.
8 Eka vostucho xevott tachea survate poros boro. Gorvixtt zaunchea poros pasiens dakhovop borem.
9 Rokddoch ragar zainaka, karonn murkh asat te sompeponnim ragar zatat.*
10 Oxem mhunnonaka, “Atam poros, adle dis bore kiteak asle?” karonn tumcho ho prosn zannvaiecho nhoi.
11 Zannvai ani tachea sangata daiz mellop borem zaun asa, hi zannvai disacho uzvadd polloitat* tanchea pasot faideachi.
12 Karonn poixe rakhonn kortat toxe, zannvai pasun rakhonn korta. Punn gineanacho faido oso asa: Zannvai aplea dhoniachea jivachi rakhonn korta.
13 Khorea Devachea kamancher dhean di, karonn tannem vankddem kelam tem konn nitt korunk xokta?
14 Borea disa boreponn dakhoi, punn sonkoxttachea* disa Devan bore toxench vaitt dis dovorleat mhunn somzon ghe, hea pasot apnnak fuddarak kitem ghoddttolem tem munis zannam zaunk xokona.
15 Mhojea hea polkea jivitant hanvem soglem polloilam. Nitivontponnan cholon nitivont munxacho nas zata, punn noxtteponn korun pasun noxtto munis lamb jivit jieta.
16 Chodduch nitivont zainaka, toxench tum chodduch xanno mhunn dakhoinaka. Tunvem tujeruch nisontton kiteak haddchem?
17 Chodduch noxtto zainaka, toxench chodduch murkh zainaka. Tuzo vell ieunchea poilim tunvem kiteak morchem?
18 Hea donui xittkaunnenk tunvem kan dilear odik borem zatolem. Tanchea modli ek pasun nakarinaka, karonn Devachi bhirant dhorta to heo donui xittkaunneo pallttolo.
19 Zannvai eka xannea munxak, xarantlea dha bollixtt munxam poros odik xoktivont korta.
20 Karonn sodanch borem tem korta ani kednanch patok korina toslo ekui munis prithumer na.
21 Toxench, lok mhunnttat tem soglem tujea kallzak lavun ghenaka. Na zalear, tuzo sevok tujea vixim vaitt uloita* tem tum aikotolo.
22 Karonn tum pasun dusream vixim vaitt uloila mhunn tum bore bhaxen zannam.
23 Hanvem heo sogleo vostu zannvaien topasleo ani mhunnttlem, “Hanv zannvaiecho zatolom,” Punn tem mhojea hata bhair aslem.
24 Jem kitem ghoddlam tem zannam zaun ghevop mhojea somzonne bhair asa ani tem khub khol asa. Tem konn somzonk xokta?
25 Zannvaiechea vostum vixim zannam zaunk ani jem ghoddtta tem kiteak ghoddtta tem somzonk, topasunk ani sodhunk hanvem mon lailem. Toxench, murkh lokanchi noxtti vagnnuk ani pixeponn kortoleanchi murkh vagnnuk somzon gheunk hanvem tharailem.
26 Tednam mhaka hem kollon ailem: Ji bail xikareachea zalli bhaxen asa, jichem kalliz rampnne bhaxen ani paim bondkhonnintlea sanklleam bhaxen asat, ti bail mornna poros odik koddu. Khorea Devak manvota to tichea thaun vanchtolo, punn patki tichea fasant poddttolo.
27 Upodexok mhunntta, “Polloi, mhaka hem mellʼllem. Hanvem eka-fattlean-ek vostuchi choukoxi keli ani mhaka hem kollon ailam,
28 punn hanv jem sodhit ravlom tem mhaka mellonk na. Hozar munxam modem mhaka ek nitivont munis mellʼllo, punn tanchea modem ek nitivont bail mhaka mellonk na.
29 Mhaka hem ekuch mellʼllem: Khorea Devan munxak promannik rochlo, punn munxamnim apleach manddnneam pormonnem vagonk tharailem.”
