Upodexok 6:1-12
6 Suria ponda hanvem anik ek dukhest ghoddnni polloilea* ji munxam modem chalti asa:
2 Munis jem anvddeta tantuntlem taka kainch unnem zaunchem nhoi mhunn khoro Dev taka girestkai, zaiteo vostu ani mhoima dita. Tori astana khoro Dev taka tantunt khuxalkai bhogunk favo korina, dusroch tanchea vorvim khuxalkai melloun gheta. Hem polkeponn ani khubuch dukhachem zaun asa.
3 Ek munxak xembor bhurgim zatat, ani to zaitim vorsam jieun zanntto zata. Tori astana, to fonddant pavchea poilim borea vostunchi khuxalkai bhogunk pavona zalear, kusveantuch melolo ballok tachea poros odik boro oxem mhaka dista.
4 Karonn to ballok bexttoch sonvsarant ailo ani kallkhant na zalo, tachem nanv pasun kallkhant urlem.
5 Tannem suriacho uzvadd pollounk na ani taka kainch kollonkui na, tori astana to tea munxa poros odik boro.*
6 Zor eka munxan don hozar vorsam jieun pasun, jivitant khuxalkai bhogunk na zalear kitem faido? Sogle ekuch zagear vochonant kai?
7 Ek munis soglo koxtti vavr aplem pott bhorunk korta, tori astana tachi as kednanch bhagona.
8 Toxem zalear, zannvaiecho munis murkha poros khoinchea vatten odik boro, vo eka gorib munxak koxem jieunchem* tem khobor ason kitem faido?
9 Taka lagon, jem dolleam mukhar asa tantunt khuxalkai melloun ghe, svotachea itsam fattlean dhanvonaka. Karonn hem pasun polkeponn, varea fattlean dhanvlolea sarkem.
10 Jem kitem ostitvant asa, taka poilinch nanv dilʼlem asa, ani munis koslo tem poilinch ugddapem zalam. Tachea poros chodd xoktivont asa tachea lagim to vad-vivad korunk* xokona.
11 Jitlim chodd utram,* titlem chodd polkeponn. Xevottak tanchea thaun munxak kitem faido zata?
12 Munxan aplea jivitant kitem korop chodd borem tem konn zannam? Karonn tache jivitache polke dis bhov thodde, soron voitolea savlle sarke. To gelea uprant suria ponda kitem ghoddttolem tem taka konn sangonk xokta?
