E BITII MAIUIA AOMATA TE BAIBARA

“I a moanna n iangoia raoi bwa tera aroni maiu”

Ana Rongorongo Allan Hancock

TE RIRIKI ARE E BUNGIAKI IAI: 1941

ABANA: AOTITERIA

RONGORONGONA: E MOMOKO AO NI KAMANENA TE KAMANGING N TE ARO AE RIAO

AROU RIMOA: I ikawairake i Warialda ae te kaawa ae uarereke i New South Wales. Warialda bon te kaawa ae a kaikawaaki ao ni karikirakea iai tiibu ma kaao, ao n unikaki iai uita ma aroka aika a kakanaki. E rangi n itiaki ao e karako te iowawa iai.

Ibukina bwa bon te karimoa ngai mai buakoia tariu aika tengaun ao ngke 13 au ririki, I a moana au mwakuri ibukini boutokaaia au utu. Kioina ngkai I aki reirei n te kuura ae rietata, I a mwakuri n taabo ake a kawakinaki iai maan ao unikani kain amwarake. Ngke ai 15 au ririki, I riki bwa te tia kawakinia aoti ao ni kamananaiia aika moaanti.

Bon iai buakakan ao raoiroin te mwakuri n taabo akanne. N te itera teuana, I rangi ni kukurei ni mwakuri iai n ikotaki naba ma bwaai ni kabane ake iai. N te tairiki, I tekateka i tinaniku i etan te ai ao ni matakuakina namwakaina ao itoi aika bati i karawa ma te ang ae ukukai are uota boin te buakonikai ae kamaiu ae otabwaniniai. I uringnga are I iangoia bwa e bae n iai Temanna ae kariki baika a rangi n tamaroa akanne ni kabane. N te itera are teuana, I a kaaitara ma kariri aika karuanikai tabeua iai. I aki toki naba n ongo taetae n tinaraa ao I a kai kaririaki nakon te moko. N te tai ae waekoa, e a riki te moko ao te tinaraa bwa anuani maiu.

Ngke ai 18 au ririki, I a mwaing nako Sydney. I kabanea korakorau bwa N na kaaina te taanga ni buaka ma I aki butimwaeaki ibukina ngke I aki reirei n te kuura ae rietata. E a reke au mwakuri ao I a tiku i Sydney i nanon teuana te ririki. I a moani kaitiboo ma Ana Tia Kakoaua Iehova n te tai anne. I butimwaea aia kakao nakon aia botaki n taromauri, ao I a ataia naba n te tai anne bwa bon te koaua aia reirei.

Ngaia are n te tai ae waekoa, I a iangoia bwa N na manga okira te buakonikai. Ma n tokina I a aki ma I a boni maeka i Goondiwindi i aon Queensland. E reke au mwakuri, ao I a mare ma e kananokawaki bwa I a moanna naba ni mamanging.

 Bon uoman natira. Imwini bungiakia natiu mwaane, I a moanna n iangoia raoi bwa tera aroni maiu. I uringa te baere I ongoraeia ngkoa n aia botaki taani Kakoaua i Sydney ao I iangoia bwa I a riai ni kanakoraoa maiu.

I kunea n te kaongora teuana n Te Taua-n-Tantani nikawai, ae iai i nanona ana atureti te aobiti n tararua ibukia Ana Tia Kakoaua Iehova i Aotiteria. I kanakoa au reta ni bubutii te ibuobuoki. Ao ni kaekaan au reta, e a kawarai te tia Kakoaua temanna ae akoi ma n tatangira. N te tai ae waekoa, e a reirei ma ngai n te Baibara.

ARONI BITAKINI MAIU MAN TE BAIBARA: Ngke I reiakina te Baibara, I a tabe n noria bwa I riai ni karaoi bitaki aika bubura ni maiu. Te kibu teuana man te Baibara ae e anaaki riki iai nanou bon 2 I-Korinto 7:1. E kaungaira te kibu anne bwa ti na “kaitiakira mani kamwaraan nako te rabwata.”

I a motinnanoia bwa N na kaaki te moko ao ni katoka kamanenaan te manging n te aro ae riao. A bon aki bebete karaoani bitaki akanne ngkai a a tia n riki bwa anuani maiu i nanon te tai ae maan. Ma I motinnanoia bwa N na maiuakina ae kakukureia te Atua. I bon rangi ni buokaki mani maiuakinan te boto n reirei ae n I-Rom 12:2 ae kangai: “Katoka katotongan aron te waaki ae ngkai i aon te aba, ma kam na onikaki n aromi ni kabooui ami iango.” I a ataia ae ngkana N na bitii anuau, I riai ni bita naba arou n iaiango ao n taraia raoi n aron taraakia iroun te Atua bwa a karuanikai. Man ana ibuobuoki I a tokanikai ni kaaki te moko ao kamanenaan te manging n te aro ae riao.

Ma ae rangi ni kangaanga riki bon au kabokorakora ni katoka te tinaraa. I ataa te reirei ni kairiri man te Baibara n I-Ebeto 4:29 ae kangai: “E na tai otinako te taeka ae buakaka mai wimi.” Ma e ngae n anne, I bon aki tokanikai n te tai ae waekoa ni karaoiroa au taetaenikawai. I karekea buokau mani kananoan au iango n taeka ake n Itaia 40:28 (BG). E taekinaki ae kangai n te kibu anne ni kaineti ma itoi aika bati i karawa: “Kam na kaeka matami nako karawa, ao tara Ae karaoi baikai, Ae kairiia nako aia taanga ni warekiia: E kabaneia ni weteiia n araia; ngkae e bati mwakana, ngkae E korakora, ao e aki bua temanna mai buakoia.” I iangoia bwa ngkai iai mwaakan te Atua ni karika te iuniweeti ae moan te buburakaei are I rangi ni kan tarataraia, I a kakoauaa raoi bwa e kona ni kakorakoraai ni karaoi bitaki bwa I aonga ni kakukureia. Teutana imwin teutana, I a kona n taubaang mani kamanenaan taetae aika buakaka man au tataro ae bati ao au kakorakora.

AROU NI KAKABWAIAAKI: E bon aki reke au tai ae bati ni mamaroro ma aomata ngke te tia kawakinia aoti ngai, ngkai bon tii tabeman aomata n taabo ake I mwakuri iai. Ma e ngae n anne, e reke reireiau ibukin arou ni maroro ma aomata rinanon te kataneiai are e katauraoaki n aia bobotaki Ana Tia Kakoaua Iehova. Mai buakoni bwaai riki tabeua ake I reiakin n te kataneiai arei, I a kona n tataekina te rongorongo ae raoiroi ibukin Ana Tautaeka n Uea te Atua nakoia aomata nako.​—Mataio 6:​9, 10; 24:14.

Tabeua te ririki n nako, I kukurei ni beku bwa unimwaanen te ekaretia. I bon iangoia bwa te kakabwaia nakoiu karaoan ae I kona ibukini buokaia raou n te onimaki. Ma kakabwaiaau ae rangi ni kakawaki riki, boni katiteuanaakira ngai ma buu ae kakaonimaki ma n tangiraki irou ao natira aika anainano aroaroia ni beku ibukin Iehova.

I kaitaua Iehova ngkai e kariaia bwa N na kona n reiakinaki irouna, e ngae ngke I aki reirei n te kuura ae rietata. (Itaia 54:13) I kakoauai raoi taeka aika n Taeka N Rabakau 10:22 (BG) ae kangai: “Kakabaian te aba iroun Iehova, e kabatia kaubwain te aba.” Ti kariariaa ma te ingaingannano ma au utu reiakinan riki taekan Iehova ao n toro irouna n aki toki.

[Taamnei n iteraniba 8]

[Taamnei n iteraniba 8]

[Kabwarabwaraan n iteraniba 9]

“I a ataia ae ngkana N na bitii anuau, I riai ni bita naba aroarou n iaiango”

[Taamnei n iteraniba 8]