Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ MARCH 2013

 TSI OBƐŊKƐ NYƆŊMƆ

“Te Nɔ ni Ji Kitãi lɛ Ateŋ Klɛŋklɛŋ Nɔŋ?”

“Te Nɔ ni Ji Kitãi lɛ Ateŋ Klɛŋklɛŋ Nɔŋ?”

Mɛni esa akɛ wɔfee koni wɔsa Nyɔŋmɔ hiɛ? Ani mlai ni esa akɛ wɔye nɔ lɛ fa kwraa tsɔ? Miishɛɛ sane ji akɛ, hetoo lɛ ji dabi. Yesu Kristo, Nyɔŋmɔ diɛŋtsɛ Bi lɛ tsɔɔ mli akɛ, abaanyɛ afo nɔ ni Nyɔŋmɔ taoɔ yɛ wɔdɛŋ lɛ kuku awo sane kome mli.—Kanemɔ Marko 12:28-31.

Klɛŋklɛŋ lɛ, susumɔ nɔ ni ba dani Yesu wie sane nɛɛ he lɛ he okwɛ. No mli lɛ, eetsɔɔ nii yɛ sɔlemɔwe lɛ yɛ Nisan 11 lɛ nɔ, ni eshwɛ be fioo ni ebaagbo. Akɛni ehenyɛlɔi lɛ miitao ni enaa atɔ̃ hewɔ lɛ, amɛbibii lɛ naataamɔ saji komɛi. Saji lɛ eko fɛɛ eko hetoo ni eha amɛ lɛ ha amɛnaa kpɛ amɛhe. Kɛkɛ ni abi Yesu sane nɛɛ: “Te nɔ ni ji kitãi lɛ ateŋ klɛŋklɛŋ nɔŋ?”—Kuku 28.

Nakai sanebimɔ lɛ jeee nɔ ko ni kã shi. Yudafoi lɛ ekomɛi taa saji anaa yɛ kitãi ni fa fe 600 ni yɔɔ Mose Mla lɛ mli lɛ ahe; amɛsumɔɔ akɛ amɛbaale emli klɛŋklɛŋ nɔ loo nɔ ni he hiaa fe fɛɛ. Etamɔ nɔ ni mɛi komɛi hu kɛɛ mlai lɛ fɛɛ ahe miihia, no hewɔ lɛ ejaaa kwraa akɛ abaabu ekomɛi fe ekrokomɛi. Te Yesu baaha sane nɛɛ hetoo eha tɛŋŋ?

Hetoohamɔ mli lɛ, Yesu tsĩ kitãi enyɔ atã. Klɛŋklɛŋ lɛ, ekɛɛ: “Suɔmɔ Nuŋtsɔ o-Nyɔŋmɔ lɛ kɛ otsui fɛɛ kɛ osusuma fɛɛ kɛ ojwɛŋmɔ fɛɛ kɛ onyɛmɔ fɛɛ!” (Kuku 30; 5 Mose 6:5) Wiemɔ ni ji “tsui,” “susuma,” “jwɛŋmɔ,” kɛ “nyɛmɔ” lɛ ashishinumɔi lɛ eko nyɛŋ atse ehe kwraa yɛ ekroko lɛ he. * Eshishinumɔ ji: Suɔmɔ kɛha Yehowa biɔ ni akɛ gbɔmɔtso muu lɛ fɛɛ, ni jwɛŋmɔŋ nyɛmɔi kɛ nibii fɛɛ ni ayɔɔ fata he lɛ asɔmɔ lɛ. Biblia niiamlitsɔɔmɔ ko ni afee lɛ tsɔɔ mli akɛ: “Esa akɛ asumɔ Yehowa kɛmɔ shi.” No hewɔ lɛ kɛ́ osumɔɔ Nyɔŋmɔ lɛ, obaabɔ mɔdɛŋ fɛɛ ni obaanyɛ koni gbi fɛɛ gbi lɛ ohi shi bɔ ni baasa ehiɛ.—1 Yohane 5:3.

Nɔ ni ji enyɔ lɛ, Yesu kɛɛ akɛ: “Suɔmɔ onaanyo tamɔ bɔ ni osumɔɔ bo diɛŋtsɛ ohe.” (Kuku 31; 3 Mose 19:18) Suɔmɔ kɛha Nyɔŋmɔ kɛ suɔmɔ kɛha naanyo gbɔmɔ lɛ yɛ tsakpaa diɛŋtsɛ. Kɛ́ osumɔ onaanyo gbɔmɔ lɛ no baaha osumɔ Nyɔŋmɔ. (1 Yohane 4:20, 21) Kɛ́ wɔsumɔɔ mɛi krokomɛi tamɔ bɔ ni wɔsumɔɔ wɔhe lɛ, wɔkɛ amɛ baaye bɔ ni wɔbaasumɔ ni amɛkɛ wɔ aye. (Mateo 7:12) Kɛ́ wɔfee nakai lɛ, wɔtsɔɔ akɛ wɔsumɔɔ Nyɔŋmɔ ni fee wɔ—kɛ amɛ—yɛ esubaŋ nɔ lɛ.—1 Mose 1:26.

Abaanyɛ amua nibii fɛɛ ni Yehowa taoɔ yɛ mɛi fɛɛ ni jáa lɛ lɛ adɛŋ lɛ naa awo wiemɔ kome mli: suɔmɔ

Te kitã ni tsɔɔ akɛ asumɔ Nyɔŋmɔ kɛ naanyo gbɔmɔ lɛ he hiaa ha tɛŋŋ? Yesu kɛɛ akɛ: “Kitã ko bɛ ni fe enɛɛmɛi.” (Kuku 31) Yɛ sane nɛɛ nɔŋŋ eko mli lɛ, Yesu wie akɛ kitãi krokomɛi lɛ fɛɛ damɔ kitãi enyɔ nɛɛ anɔ.—Mateo 22:40.

Ewaaa kwraa akɛ abaasa Nyɔŋmɔ hiɛ. Abaanyɛ amua nibii fɛɛ ni Nyɔŋmɔ taoɔ yɛ wɔdɛŋ lɛ naa awo wiemɔ kome mli: suɔmɔ. Nyɔŋmɔ ekpa gbɛ be fɛɛ be akɛ etsuji lɛ asumɔ lɛ, ni ebaaya nɔ ekpa enɛ gbɛ yɛ amɛdɛŋ. Shi jeee wiemɔi loo henumɔi kɛkɛ tsɔɔ akɛ ayɛ suɔmɔ; ajieɔ lɛ kpo yɛ nifeemɔi amli. (1 Yohane 3:18) Mɛni hewɔ okaseee bɔ ni obaafee ni oná suɔmɔ kɛ bɔ ni obaafee ojie lɛ kpo otsɔɔ Yehowa, Nyɔŋmɔ ni ‘ji suɔmɔ lɛ’?—1 Yohane 4:8.

Biblia kanemɔ kɛha March

Marko 9Luka 6

^ kk. 6 Yɛ Biblia lɛ mli lɛ, wiemɔ ni ji “susuma” lɛ kɔɔ gbɔmɔ muu lɛ fɛɛ he. No hewɔ lɛ, “tsui,” “jwɛŋmɔ,” kɛ “nyɛmɔ” baanyɛ adamɔ shi kɛha “susuma” lɛ.

 

 

Ekrokromɛi Hu Nɛ

Ani Ofeɔ Nɔ ni Nyɔŋmɔ Taoɔ ni Ofee?

Kɛ́ wɔmiitao ni wɔkɛ Nyɔŋmɔ abɔ naanyo lɛ, esa akɛ wɔbo lɛ toi, kɛ̃lɛ nɔ kroko yɛ ni he hiaa waa ni esa akɛ wɔfee.