Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ MARCH 2013

 TSƆƆMƆ OBII LƐ ANII

Petro kɛ Anania Male—Mɛni Wɔbaanyɛ Wɔkase Kɛjɛ Mli?

Petro kɛ Anania Male—Mɛni Wɔbaanyɛ Wɔkase Kɛjɛ Mli?

Taakɛ ole lɛ, amale ji nɔ ko ni owie ni ole akɛ ebɛ mli. Ani omale pɛŋ? * Onukpai komɛi ni sumɔɔ Nyɔŋmɔ lɛ po emale pɛŋ. Ekolɛ ole mɔ ko yɛ Biblia lɛ mli ni male. Atsɛɔ lɛ Petro, eji Yesu kaselɔi 12 lɛ ateŋ mɔ kome. Ha wɔbo nɔ hewɔ ni emale lɛ toi.

Beni amɔ Yesu sɛɛ lɛ, akɛ lɛ tee osɔfonukpa lɛ shĩa. No mli lɛ, je ena waa diɛŋtsɛ. Petro bote osɔfonukpa lɛ shĩa lɛ mli shi anaaa ehiɛ akɛ Petro ni. Beni la ko kpɛ lɛ, osɔfonukpa lɛ tsulɔ yoo ni ha Petro ba shĩa lɛ mli lɛ na ehiɛ ni eyoo lɛ. Tsulɔ yoo lɛ kɛɛ lɛ akɛ: ‘Bo hu té okɛ Yesu, nyiɛɔ.’ Akɛni Petro she gbeyei hewɔ lɛ, ekɛɛ dabi.

Biblia lɛ kɛɛ akɛ, sɛɛ mli lɛ ‘yoo kroko hu na lɛ.’ Ekɛɛ akɛ: ‘Mɔ nɛ hu kɛ Yesu yɔɔ.’ Petro kɛɛ dabi ekoŋŋ. Be fioo sɛɛ lɛ, mɛi krokomɛi hu tee Petro ŋɔɔ amɛyakɛɛ lɛ akɛ: “Anɔkwale ji akɛ, amɛteŋ mɔ kome ji bo.”

Petro she gbeyei. No hewɔ lɛ, emale nɔ ni ji shii etɛ nɔ akɛ: ‘Mileee nuu nɛɛ!’ Wuɔ gbɛɛ. Yesu kwɛ Petro hiɛ, kɛkɛ ni Petro kai Yesu wiemɔ ni ekɛɛ lɛ ŋmɛlɛtswai fioo ni tsɔ hiɛ lɛ, Yesu kɛɛ lɛ akɛ: “Dani wuɔ aaagbɛɛ lɛ, oookpa yɛ misɛɛ shii etɛ.’ Kɛkɛ ni Petro bɔi yaafo. Sane lɛ dɔ lɛ waa!

Ani nɔ ko tamɔ nakai baanyɛ aba onɔ?Ekolɛ oyɛ skul, ni onu ni skulbii lɛ ekomɛi miiwie Yehowa Odasefoi lɛ ahe. Amɛteŋ mɔ kome kɛɛ: “Amɛŋaaa aflaŋaa lɛ.” Mɔ ko hu bakɛɛ akɛ: “Amɛnɔɔɔ amɛhaa amɛmaŋ.” Kɛkɛ ni mɔ kroko hu bakɛɛ akɛ: “Jeee Kristofoi ji amɛ lɛɛlɛŋ, ejaakɛ amɛyeee Blonya.” Nɔŋŋ kɛkɛ ni mɔ kome tsɔ ehiɛ eha bo ni ebi bo akɛ: “Bɛ Yehowa Odasefoi lɛ ateŋ mɔ kome ji bo?” Mɛni obaakɛɛ?

Ja okase nii kɛsaa ohe momo dani obaanyɛ oha nakai sanebimɔ lɛ hetoo jogbaŋŋ. No mli lɛ, Petro esako  ehe etoko. Beni abibii lɛ saji ni eshe gbeyei lɛ, emale! Shi edɔ lɛ waa akɛ efee nakai, ni Nyɔŋmɔ kɛ ehe esha lɛ ke lɛ.

Anania ji mra beaŋ Kristo kaselɔ ko hu ni male. Shi Nyɔŋmɔ kɛ Anania kɛ eŋa Safira fɛɛ ahe eshai ekeee amɛ. Safira kɛ ewu Anania fee ekome ni amɛmale. Ha wɔkwɛ nɔ hewɔ ni Nyɔŋmɔ kɛ Anania kɛ Safira ahe ekeee amɛ lɛ.

Gbii nyɔŋma sɛɛ beni Yesu eshi ekaselɔi ni eku esɛɛ kɛtee Nyɔŋmɔ ŋɔɔ yɛ ŋwɛi lɛ, abaptisi mɛi aaafee 3,000 sɔŋŋ yɛ Yerusalem. Mɛi nɛɛ ateŋ babaoo jɛ maji ni yɔɔ shɔŋŋ lɛ amli amɛba amɛbaye Pentekoste Gbi Jurɔ lɛ, ni beni amɛtsɔmɔ Yesu kaselɔi lɛ sɛɛ lɛ, amɛsumɔ akɛ amɛbaahi shi be fioo koni amɛkase amɛhemɔkɛyeli hee lɛ he nii. No hewɔ lɛ, Yesu kaselɔi lɛ ateŋ mɛi komɛi kɛ amɛ diɛŋtsɛ amɛshika kwɛ mɛi nɛɛ.

Anania kɛ eŋa Safira hu hɔɔ amɛnibii komɛi koni amɛná shika ni amɛkɛye amɛbua mɛi ni abaptisi etsɛko nɛɛ. Beni Anania ba ni ekɛ shika lɛ baaha Yesu kaselɔi lɛ, ekɛɛ amɛ akɛ nibii ni ehɔɔ lɛ shika lɛ fɛɛ ekɛba lɛ. Shi jeee nakai kwraa! Ekɔ shika lɛ eko! Nyɔŋmɔ ha Petro le sane nɛɛ, no hewɔ lɛ Petro kɛɛ Anania akɛ: “Jeee gbɔmɛi omale otsɔɔ nɛɛ, shi Nyɔŋmɔ moŋ ni.” Kɛkɛ ni Anania gbee shi ni egbo! Aaafee ŋmɛlɛtswai etɛ sɛɛ lɛ, eŋa Safira ba jɛmɛ. Akɛni eleee nɔ ni eba ewu nɔ hewɔ lɛ, lɛ hu emale ni egbee shi ni egbo.

Mɛɛ nikasemɔ po enɛ ji nɛkɛ: Ehe miihia ni wɔwie anɔkwale! Lɛɛlɛŋ, esa akɛ wɔ fɛɛ wɔkase nii kɛjɛ enɛ mli. Kɛlɛ, wɔteŋ mɔ fɛɛ mɔ tɔ̃ɔ, titri lɛ kɛ́ gbekɛbii ji wɔ. Ani eŋɔɔɔ onaa akɛ Yehowa sumɔɔ osane ni ekɛ ohe esha baake bo tamɔ bɔ ni ekɛ Petro he esha ke lɛ lɛ?— Shi kaimɔ akɛ, esa akɛ wɔwie anɔkwale. Ni kɛ́ wɔmale lɛ, eyɛ hiɛdɔɔ waa, ni esa akɛ wɔkpa Nyɔŋmɔ fai koni ekɛ wɔhe eshai ake wɔ. Ekolɛ nakai ji bɔ ni Petro fee, ni Nyɔŋmɔ kɛ ehe esha ke lɛ. Kɛ́ wɔbɔ mɔdɛŋ waa koni wɔkamale dɔŋŋ lɛ, Nyɔŋmɔ kɛ wɔ hu wɔhe eshai baake wɔ!

^ kk. 3 Kɛ́ okɛ gbekɛ fioo ko miikane sane nɛɛ, ni oshɛ okadi ni ji (—) he lɛ, esa akɛ omɛ fioo, ní owo gbekɛ lɛ hewalɛ ni etsɔɔ ejwɛŋmɔ.