Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ MARCH 2013

Yesu Shitee lɛ Haa Mɛi Krokomɛi Náa Naanɔ Wala!

Yesu Shitee lɛ Haa Mɛi Krokomɛi Náa Naanɔ Wala!

YESU shitee lɛ ji sane ko ni ale waa ni ba yɛ blema ni he hiaa waa, ni ehe yɛ sɛɛnamɔ kɛha wɔ ŋmɛnɛ hu. Bɔfo Paulo tsɔɔ bɔ ni Yesu shitee lɛ he hiaa beni eŋma akɛ: “Atee Kristo shi kɛjɛ gbohii ateŋ, efee klɛŋklɛŋ mɔ yɛ mɛi ni ewɔ [yɛ gbele mli] lɛ ateŋ. Ejaakɛ bɔ ni gbele tsɔ gbɔmɔ nɔ kɛba lɛ, nakai nɔŋŋ shitee hu tsɔ gbɔmɔ nɔ kɛba. Ejaakɛ taakɛ bɔ ni Adam mli ni mɛi fɛɛ gboiɔ yɛ lɛ, nakai nɔŋŋ kɛ̃ Kristo mli ni amɛ fɛɛ amɛyi aaaná wala yɛ.”—1 Korintobii 15:20-22.

Atee Yesu shi yɛ Nisan 16, afi 33 Ŋ.B. Eji gbi yɛ afi lɛ mli ni Yudafoi lɛ kɛ klɛŋklɛŋ yibii lɛ mli niyenii afɔle lɛ bahaa Yehowa Nyɔŋmɔ yɛ sɔlemɔwe ni yɔɔ Yerusalem lɛ. Paulo tsɛ Yesu akɛ klɛŋklɛŋ yibii, ni ekɛtsɔɔ akɛ mɛi krokomɛi hu yɛ ni abaatee amɛshi kɛjɛ gbohii ateŋ.

Paulo wiemɔ ni nyiɛ sɛɛ lɛ hu tsɔɔ nɔ ni Yesu shitee lɛ etsu. Ekɛɛ akɛ: “Bɔ ni gbele tsɔ gbɔmɔ nɔ kɛba lɛ, nakai nɔŋŋ shitee hu tsɔ gbɔmɔ nɔ kɛba.” Akɛni wɔná esha kɛ emuu ni ayeee lɛ kɛjɛ Adam ŋɔɔ hewɔ lɛ, wɔ fɛɛ wɔgboiɔ. Kɛlɛ, Yesu wala ni eye emuu ni ekɛha akɛ kpɔmɔnɔ lɛ gbele gbɛ kɛha adesai koni amɛye amɛhe kɛjɛ esha kɛ gbele nyɔŋyeli mli kɛtsɔ gbohiiashitee lɛ nɔ. Beni Paulo muaa sane lɛ naa lɛ, eŋma yɛ Romabii 6:23 lɛ akɛ: “Esha dɛŋ nyɔmɔwoo lɛ gbele ni; shi Nyɔŋmɔ duromɔ keenɔ lɛ naanɔ walaŋ yɛ Kristo Yesu, wɔ-Nuŋtsɔ lɛ, mli.”

Yesu diɛŋtsɛ gbala bɔ ni egbele lɛ kɛ eshitee lɛ he hiaa ha, kɛ sɛɛnamɔ ni yɔɔ he kɛha wɔ lɛ mli etsɔɔ. Ewie lɛ diɛŋtsɛ ehe ekɛɛ: “Esa akɛ awó gbɔmɔbi lɛ nɔ. Koni mɔ fɛɛ mɔ ni heɔ enɔ yeɔ lɛ hiɛ akakpata, shi moŋ ená naanɔ wala. Ejaakɛ nɛkɛ Nyɔŋmɔ sumɔ je lɛ, akɛ eŋɔ ebi koome lɛ eha, koni mɔ fɛɛ mɔ ni heɔ enɔ yeɔ lɛ hiɛ akakpata, shi moŋ ená naanɔ wala.”—Yohane 3:14-16.

Feemɔ he mfoniri okwɛ—naanɔ wala ni nɔnaa, piŋmɔ loo ŋkɔmɔyeli ko bɛ mli! (Kpojiemɔ 21:3, 4) Mɛɛ gbɛkpamɔ ni yɔɔ miishɛɛ po nɛ! Nilelɔ ko wie sane nɛɛ he yɛ nɛkɛ gbɛ nɔ akɛ: “Gɔɔ mli haa akaiɔ bɔ ni wala yɔɔ kuku ha, ni gbohiiashitee haa anaa bɔ ni gbele sɛɛ etsɛɛɛ kwraa ha.” Yesu shitee lɛ haa anáa wala lɛɛlɛŋ!