Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ AUGUST 2013

 TSI OBƐŊKƐ NYƆŊMƆ

‘Ayɔseɔ Ehe Nii ni Anaaa lɛ Faŋŋ’

‘Ayɔseɔ Ehe Nii ni Anaaa lɛ Faŋŋ’

Ani oheɔ Nyɔŋmɔ nɔ oyeɔ? Kɛ́ nakai ni lɛ, ani obaanyɛ okɛ nɔ ko atsɔɔ akɛ eyɛ? Anɔkwa sane ji akɛ, nibii babaoo bɔle wɔ ni yeɔ odase akɛ Bɔlɔ ko ni yɔɔ nilee, hewalɛ, kɛ suɔmɔ yɛ. Mɛni ji odaseyeli nɛɛ, ni mɛɛ nɔmimaa ekɛhaa? Kɛha hetoo lɛ, susumɔ bɔfo Paulo wiemɔi ni aŋma yɛ wolo ni ekɛha Kristofoi ni yɔɔ Roma lɛ mli lɛ he okwɛ.

Paulo wie akɛ: “[Nyɔŋmɔ] he nii ni anaaa ni ji enaanɔ hewalɛ kɛ nyɔŋmɔyeli lɛ fɛɛ lɛ, kɛjɛ jeŋbɔɔ mli beebe lɛ atsɔɔ enii ni efee lɛ anɔ ayɔseɔ ni anaa faŋŋ, no hewɔ lɛ amɛbɛ naajiemɔ ko.” (Romabii 1:20) Taakɛ Paulo tsɔɔ mli lɛ, Bɔlɔ lɛ kadimɔnii kpɛtɛ eninenaa nitsumɔi lɛ ahe. Ha wɔpɛi Paulo wiemɔi lɛ amli jogbaŋŋ wɔkwɛ.

Paulo tsɔɔ akɛ, anaa Nyɔŋmɔ sui lɛ “kɛjɛ jeŋbɔɔ mli beebe.” Hela wiemɔ ni atsɔɔ shishi akɛ “jeŋ” yɛ sane nɛɛ mli lɛ kɔɔɔ Shikpɔŋ lɛ diɛŋtsɛ he. Moŋ lɛ, ekɔɔ adesai ahe. * No hewɔ lɛ, Paulo miitsɔɔ akɛ kɛjɛ be mli ni abɔ adesai nɔŋŋ lɛ, amɛna Bɔlɔ lɛ sui ahe odaseyelii yɛ nibii ni ebɔ lɛ amli.

Nakai odaseyelii lɛ ebɔle wɔhe kɛkpe. Aŋɔteko bɔɔnii amli, shi moŋ lɛ “anaa lɛ faŋŋ.” Kɛjɛ adebɔɔ nii wulu fe fɛɛ lɛ nɔ kɛyashi bibioo kwraa nɔ lɛ, anaa faŋŋ akɛ Bɔlɔ ko yɛ, ni ákɛ eyɛ sui kpakpai ni nɔ bɛ hu. Aso bɔ ni akɛ ŋaa fee nibii ni wɔnaa yɛ adebɔɔ nii ahe lɛ haaa wɔna Nyɔŋmɔ nilee lɛ? Aso ŋulamii ni yɔɔ ŋwɛiniiaŋ lɛ kɛ ŋshɔkei ni kumɔɔ lɛ haaa ana ehewalɛ lɛ? Aso niyenii srɔtoi ni ŋɔɔŋɔi kɛ hulu shitee kɛ eshinyɔɔ lɛ etsɔɔɔ suɔmɔ ni eyɔɔ kɛha adesai?Lala 104:24; Yesaia 40:26.

Ani odaseyelii lɛ bɛ faŋŋ? Eyɛ faŋŋ aahu akɛ mɛi ni enaaa ni no hewɔ lɛ amɛkpoɔ akɛ amɛbaahe Nyɔŋmɔ nɔ amɛye lɛ “bɛ naajiemɔ ko.” Woloŋlelɔ ko tsɔɔ mli yɛ nɛkɛ gbɛ nɔ akɛ: Susumɔ draiva ko ni ku ehiɛ eshwie gbɛjegbɛ nɔ okadi ko ni tsɔɔ akɛ “Tsɔ Abɛkugbɛ” lɛ nɔ lɛ he okwɛ. Polisifonyo ko wa lɛ edamɔ shi, ni ebu lɛ shika gbele. Draiva lɛ kɛ polisifonyo lɛ bɔi sane naataamɔ akɛ enaaa okadi lɛ. Shi polisifonyo lɛ haaa eye ehe, ejaakɛ okadi lɛ yɛ faŋŋ, ni draiva lɛ hiŋmɛi hu miina nii jogbaŋŋ. Kɛfata he hu lɛ, akɛ draivafonyo lɛ, eji esɔ̃ akɛ eyɔse gbɛjegbɛi anɔ okadii nɛɛ koni ekɛtsu nii. Nakai pɛpɛɛpɛ eji yɛ odaseyelii ni tsɔɔ akɛ Nyɔŋmɔ yɛ lɛ he. Nakai “odaseyelii” lɛ yɛ faŋŋ ni mɔ fɛɛ mɔ baanyɛ ana. Ákɛ bɔɔnii ni yɔɔ jwɛŋmɔ lɛ, esa akɛ wɔnyɛ wɔna. Kɛ́ mɔ ko ku ehiɛ eshwie nɔ lɛ, enaŋ naajiemɔ ko.

Bɔlɔ lɛ kadimɔnii kpɛtɛ eninenaa nitsumɔi ahe

Anɔkwa, adebɔɔ wolo lɛ haa anaa nibii babaoo yɛ wɔ-Bɔlɔ lɛ he. Shi wolo kroko hu yɛ ni haa anaa Bɔlɔ lɛ he nibii ni fa fe nakai po—no ji Biblia lɛ. Kɛtsɔ ebaafai lɛ anɔ lɛ, wɔbaanyɛ wɔná hetoo wɔha sanebimɔ nɛɛ: Mɛni ji Nyɔŋmɔ yiŋtoo kɛha wɔshikpɔŋ nɛɛ kɛ adesai ni yɔɔ nɔ lɛ? Sanebimɔ nɛɛ hetoo ni obaale lɛ baaye abua bo ni otsi obɛŋkɛ Nyɔŋmɔ, mɔ ni ‘ayɔseɔ ehe nii ni anaaa lɛ faŋŋ’ yɛ jeŋ ni bɔle wɔ nɛɛ mli lɛ kpaakpa.

Biblia kanemɔ kɛha August

Romabii 1-16

^ kk. 5 Biblia lɛ wieɔ “je lɛ” hu he akɛ efee esha ni ehe ebahia koni akpɔ̃ lɛ, ni enɛ tsɔɔ faŋŋ ákɛ yɛ saji ni tamɔ nɛkɛ amli lɛ, akɛ wiemɔ lɛ damɔɔ shi ahaa adesai aweku lɛ, shi jeee shikpɔŋ lɛ.Yohane 1:29; 4:42; 12:47.