Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ NOVEMBER 2013

 TSI OBƐŊKƐ NYƆŊMƆ

“Eji Mɛi ni Taoɔ Esɛɛgbɛ lɛ Anyɔmɔwolɔ”

“Eji Mɛi ni Taoɔ Esɛɛgbɛ lɛ Anyɔmɔwolɔ”

Ani Yehowa hiɛ sɔɔ mɔdɛŋ ni mɛi ni jáa lɛ lɛ bɔɔ koni amɛsa ehiɛ lɛ? Mɛi komɛi baakɛɛ dabi, kɛ naajiemɔ akɛ Nyɔŋmɔ susuuu wɔhe. Shi naajiemɔ ni tamɔ nɛkɛ haa mɛi naa Nyɔŋmɔ yɛ gbɛ ni ejaaa kwraa nɔ. Ewiemɔ ni ji Biblia lɛ haa anaa bɔ ni sane lɛ ji faŋŋ. Biblia lɛ maa nɔ mi ehaa wɔ akɛ, Yehowa hiɛ sɔɔ mɔdɛŋ ni mɛi ni kɛ amɛnifeemɔ tsɔɔ akɛ amɛyɛ hemɔkɛyeli yɛ emli lɛ bɔɔ lɛ. Susumɔ bɔfo Paulo wiemɔi ni yɔɔ Hebribii 11:6 lɛ he okwɛ.

Mɛni ebiɔ ni afee koni asa Yehowa hiɛ? Paulo ŋma akɛ: “Kɛ́ hemɔkɛyeli bɛ lɛ, anyɛŋ Nyɔŋmɔ hiɛ asa.” Kadimɔ akɛ Paulo ekɛɛɛ akɛ kɛ́ abɛ hemɔkɛyeli lɛ, ewa akɛ abaasa Nyɔŋmɔ hiɛ. Moŋ lɛ, ewie akɛ anyɛŋ asa Nyɔŋmɔ hiɛ. Belɛ, nɔ ni etsɔɔ ji akɛ ehe miihia ni aná hemɔkɛyeli dani anyɛ asa Nyɔŋmɔ hiɛ.

Mɛɛ hemɔkɛyeli nɛkɛ saa Yehowa hiɛ? Ebiɔ ni wɔfee nibii enyɔ komɛi dani wɔbaaná Nyɔŋmɔ mli hemɔkɛyeli. Klɛŋklɛŋ lɛ, ebiɔ ni ‘wɔhe wɔye akɛ eyɛ.’ Biblia shishitsɔɔmɔi komɛi kɛbaa lɛ akɛ “hemɔ oye akɛ eji mɔ ko ni yɔɔ diɛŋtsɛ.” Te wɔbaafee tɛŋŋ wɔsa Nyɔŋmɔ hiɛ kɛ́ wɔheee wɔyeee akɛ eyɛ lɛ? Kɛlɛ, anɔkwa hemɔkɛyeli biɔ babaoo fe nakai, ejaakɛ daimonioi po heɔ amɛyeɔ akɛ Yehowa yɛ. (Yakobo 2:19) Esa akɛ wɔkɛ wɔnifeemɔ atsɔɔ akɛ wɔheɔ wɔyeɔ akɛ Nyɔŋmɔ yɛ, ni tsɔɔ akɛ esa akɛ wɔhi shi bɔ ni saa Nyɔŋmɔ hiɛ kɛtsɔɔ akɛ wɔyɛ hemɔkɛyeli.Yakobo 2:20, 26.

Nɔ ni ji enyɔ lɛ, esa akɛ ‘wɔhe wɔye akɛ Nyɔŋmɔ ji nyɔmɔwolɔ lɛ.’ Kɛ́ mɔ ko yɛ hemɔkɛyeli diɛŋtsɛ lɛ, enáa hekɛnɔfɔ̃ɔ kwraa akɛ mɔdɛŋ ni ebɔɔ koni esa Nyɔŋmɔ hiɛ lɛ efeŋ yaka kɔkɔɔkɔ. (1 Korintobii 15:58) Kɛ́ wɔyiŋ etɛɛɛ wɔ akɛ Yehowa baanyɛ ajuro wɔ loo ewo wɔ nyɔmɔ lɛ, te wɔbaafee tɛŋŋ wɔsa ehiɛ lɛ? (Yakobo 1:17; 1 Petro 5:7) Kɛ́ mɔ ko mu sane naa akɛ Nyɔŋmɔ susuuu mɔ he, ehiɛ esɔɔɔ nii, ni ehaaa mɔ nɔ lɛ, belɛ eleee Nyɔŋmɔ ni Biblia lɛ wieɔ ehe lɛ.

Namɛi Yehowa juroɔ loo ewoɔ amɛ nyɔmɔ? Paulo kɛɛ akɛ: “Mɛi ni taoɔ esɛɛgbɛ lɛ.” Biblia shishitsɔɔlɔi awolo ko tsɔɔ mli akɛ, Hela wiemɔ ni akɛtsu nii akɛ “taoɔ esɛɛgbɛ lɛ” etsɔɔɔ akɛ “aya ayatao,” moŋ lɛ etsɔɔ mɔdɛŋ ni abɔɔ “kɛjáa Nyɔŋmɔ.” Wolo kroko hu tsɔɔ mli akɛ, nɛkɛ hela feemɔ wiemɔ nɛɛ etsɔɔɔ hiɛaŋhiɛaŋ mɔdɛŋbɔɔ ko kɛkɛ. Hɛɛ, Yehowa juroɔ mɛi ni amɛhemɔkɛyeli tsirɛɔ amɛ koni amɛjɛ amɛtsui muu fɛɛ mli amɛkɛ suɔmɔ kɛ ekãa ajá lɛ lɛ.Mateo 22:37.

Kɛ́ wɔyiŋ etɛɛɛ wɔ akɛ Yehowa baanyɛ ajuro wɔ loo ewo wɔ nyɔmɔ lɛ, te wɔbaafee tɛŋŋ wɔsa ehiɛ lɛ?

Mɛɛ gbɛ nɔ Yehowa tsɔɔ ejuroɔ mɛi ni kɛ anɔkwayeli jáa lɛ lɛ? Ekɛ juromɔnɔ ko ni nɔ bɛ kwraa ewo amɛ shi, no ji naanɔ wala yɛ Paradeiso yɛ shikpɔŋ lɛ nɔ, ni no haa anaa mlihilɛ kɛ suɔmɔ kpele ni eyɔɔ. (Kpojiemɔ 21:3, 4) Amrɔ nɛɛ po lɛ, mɛi ni kɛ mɔdɛŋbɔɔ taoɔ Yehowa sɛɛgbɛ lɛ náa jɔɔmɔi babaoo. Kɛtsɔ Yehowa mumɔ krɔŋkrɔŋ lɛ kɛ nilee ni yɔɔ e-Wiemɔ lɛ mli lɛ nɔ lɛ, amɛnáa shihilɛ ni haa amɛtsui nyɔɔ amɛmli.Lala 144:15; Mateo 5:3.

Eji anɔkwale akɛ, Yehowa ji Nyɔŋmɔ ni hiɛ sɔɔ nii, ní náa anɔkwayeli mli ni etsuji lɛ jɛɔ amɛsɔmɔɔ lɛ lɛ he miishɛɛ. Aso enɛ ni oná ole lɛ tsirɛɔ bo koni otsi obɛŋkɛ lɛ kpaakpa? Kɛ́ nakai lɛ, mɛni hewɔ okaseee gbɛi krokomɛi anɔ ni obaatsɔ oná hemɔkɛyeli ni baaha Yehowa ajuro bo babaoo lɛ he nii, ni okɛ onifeemɔ atsɔɔ akɛ oyɛ nakai hemɔkɛyeli lɛ?

Biblia kanemɔ kɛha November

Tito 1-3; Filemon 1-25; Hebribii 1-13Yakobo 1-5