Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ DECEMBER 2013

 TSI OBƐŊKƐ NYƆŊMƆ

‘Naa! Miifee Nii Fɛɛ Ehee’

‘Naa! Miifee Nii Fɛɛ Ehee’

Ani oshweɔ ni okɛ oweku lɛ aná gbɔmɔtsoŋ hewalɛ kpakpa ni nyɛwala sɛɛ atsɛ? Ani oosumɔ ni ohi jeŋ ko ni nɔnaa, piŋmɔ, kɛ gbele baafee nibii ni eho etee lɛ mli? Jeŋ ni tamɔ nɛkɛ lɛ jeee yiŋshwiemɔ ko kɛkɛ. Nɔ ni tamɔɔɔ nakai lɛ, etsɛŋ ni jalɛ jeŋ hee ko baaba, ejaakɛ Yehowa Nyɔŋmɔ ekpɛ eyiŋ yɛ he. Kwɛmɔ bɔ ni atsɔɔ eyiŋkpɛɛ lɛ mlibaa aha yɛ Kpojiemɔ 21:3-5.—Kanemɔ.

“Nyɔŋmɔ aaatsumɔ amɛhiɛaŋ yaafonui fɛɛ.” (Kpojiemɔ 21:4) Mɛɛ yaafonui nɛkɛ ebaatsumɔ lɛ? Jeee yaafonui ni miishɛɛ kɛbaa loo yaafonui ni buɔ wɔhiŋmɛi lɛ ahe lɛ he ewieɔ lɛ. Nyɔŋmɔ shiwoo lɛ kɔɔ yaafonui ni nɔnaa kɛ awerɛhoyeli kɛbaa lɛ he. Jeee akɛ Nyɔŋmɔ baatsumɔ nakai yaafonui lɛ kɛkɛ; ebaajie nibii ni kɛ yaafonui ni wɔtaooo baa—nɔnaa kɛ awerɛhoyeli—hu kɛjɛ shihilɛ mli kwraa.

“Gbele bɛ dɔŋŋ.” (Kpojiemɔ 21:4) Mɛni po eye awui waa ni eha akɛ awerɛho efó fe henyɛlɔ gbele? Yehowa baakpɔ̃ adesai ni bo lɛ toi lɛ kɛjɛ gbele dɛŋ? Mɛɛ gbɛ nɔ? Kɛtsɔ esha ni wɔná kɛjɛ Adam ŋɔɔ, ni ji nɔ tuuntu ni kɛ gbele baa lɛ ni ebaajie yɛ shihilɛ mli lɛ nɔ. (Romabii 5:12) Yehowa baatsɔ Yesu kpɔmɔ afɔleshãa * lɛ nɔ eha adesai ni boɔ lɛ toi lɛ aye emuu. No sɛɛ lɛ, naagbee henyɛlɔ ni ‘abaakpata ehiɛ’ lɛ ji gbele. (1 Korintobii 15:26) Adesai anɔkwafoi baahi shi kɛya naanɔ yɛ gbɔmɔtsoŋ hewalɛnamɔ ni yeɔ emuu mli taakɛ Nyɔŋmɔ to lɛ.

“Ni . . . nɔnaa ko hu bɛ dɔŋŋ.” (Kpojiemɔ 21:4) Mɛɛ nɔnaa loo piŋmɔ nɛkɛ ehiŋ shi dɔŋŋ lɛ? Jwɛŋmɔŋ, henumɔŋ, kɛ gbɔmɔtsoŋ piŋmɔi fɛɛ ni wɔná kɛjɛ esha kɛ emuu ni ayeee mli, ní eha adesai akpekpei abɔ ashihilɛ efee mɔbɔ lɛ ehiŋ shi dɔŋŋ.

Etsɛŋ kwraa ni shihilɛ ni yaafonui, gbele, kɛ nɔnaa bɛ mli lɛ baaba lɛɛlɛŋ. Shi ekolɛ, obaabi akɛ, ‘Nɛgbɛ ebaaba yɛ? Ani eeenyɛ efee akɛ Nyɔŋmɔ shiwoo lɛ kɔɔ wala yɛ ŋwɛi he?’ Dabida. Susumɔ nɔ hewɔ lɛ he okwɛ. Klɛŋklɛŋ lɛ, akɛ wiemɔi ni ji “Nyɔŋmɔ buu lɛ yɛ gbɔmɛi ateŋ,” lɛ kpa shiwoo lɛ hiɛ, ni shikpɔŋ nɛɛ nɔ gbɔmɛi yɔɔ. (Kpojiemɔ 21:3) Nɔ ni ji enyɔ lɛ, shiwoo lɛ wieɔ jeŋ ko ni ‘gbele bɛ mli dɔŋŋ’ lɛ he—jeŋ ko ni kulɛ gbele yɔɔ mli shi esɛɛ baafo lɛ. Gbele ehiko ŋwɛi pɛŋ, shi etee nɔ ekpata mɛi babaoo ahiɛ yɛ shikpɔŋ nɛɛ nɔ be kplaŋŋ. Belɛ eyɛ faŋŋ akɛ, Nyɔŋmɔ shiwoo akɛ ekɛ shihilɛ kpakpa baaba lɛ baaná mlibaa yɛ shikpɔŋ nɛɛ nɔ.

Nyɔŋmɔ baaha hiɛ yaafonui ni nɔnaa kɛ awerɛhoyeli kɛbaa ni hoɔ tamɔ faa lɛ amii kwraa

Yehowa miisumɔ ni wɔhe eshiwoo lɛ wɔye akɛ ekɛ jalɛ jeŋ hee baaba. Beni etsɔɔ jɔɔmɔi ni baaba lɛ mli egbe naa nɔŋŋ kɛkɛ ni ema eshiwoo lɛ nɔ aduatsɔ ekɛɛ: ‘Naa! Miifee nii fɛɛ ehee.’ Kɛkɛ ni ekɛfata he akɛ: “Nɛkɛ wiemɔi nɛɛ anɔkwa wiemɔi ni ma shi shiŋŋ ni.” (Kpojiemɔ 21:5) Yaa nɔ okase nibii krokomɛi ni bo kɛ osuɔlɔi lɛ baanyɛ afee ni no aha nyɛfata Nyɔŋmɔ jálɔi ni yɔɔ miishɛɛ ni baana Nyɔŋmɔ shiwoi ni yɔɔ nyam lɛ amlibaa lɛ ahe.

^ kk. 5 Kɛ́ ootao ole Kristo kpɔmɔ afɔleshãa lɛ he saji krokomɛi lɛ, kwɛmɔ wolo ni ji Mɛni Biblia lɛ Tsɔɔ Diɛŋtsɛ? ni Yehowa Odasefoi fee lɛ yitso 5 lɛ.