Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ DECEMBER 2014

 SANEYITSO LƐ MLITSƆƆMƆ | OBAANYƐ OBƐŊKƐ NYƆŊMƆ

Ani Ofeɔ Nɔ ni Nyɔŋmɔ Taoɔ ni Ofee?

Ani Ofeɔ Nɔ ni Nyɔŋmɔ Taoɔ ni Ofee?

“Nɔ fɛɛ nɔ ni otaoɔ lɛ, bo lɛ kɛɛmɔ mi kɛkɛ ni maná he miishɛɛ akɛ mafee.” Ekã shi faŋŋ akɛ okɛŋ mɔ ko ni olé lɛ loo mɔ ko ni onaa lɛ kɛkɛ lɛ nɔ ko tamɔ nakai ni osusuuu he. Kɛ̃lɛ, ewaŋ kɛhaŋ bo kwraa akɛ obaakɛɛ onaanyo ko ni osumɔɔ esane waa lɛ nakai. Bei pii lɛ, yɛ nanemɛi ni bɛŋkɛ kpaakpa lɛ agbɛfaŋ lɛ, mɔ nɛ feɔ nɔ ni mɔ nɛ biɔ lɛ ehãa lɛ, ni mɔ nɛ hu feɔ nakai nɔŋŋ.

Biblia lɛ tsɔɔ akɛ, be fɛɛ be lɛ Yehowa feɔ nibii ni ele akɛ ebaahã mɛi ni jaa lɛ lɛ aná miishɛɛ. Akɛ nɔkwɛmɔnɔ lɛ, Maŋtsɛ David, ni kɛ Nyɔŋmɔ bɔ waa lɛ wie akɛ: “Yehowa, mi-Nyɔŋmɔ, onaakpɛɛ nii ni otsuɔ kɛ ojwɛŋmɔi ni ojwɛŋɔ yɛ wɔhe lɛ fa naakpa. . . . Amɛfa fe bɔ ni aaanyɛ akane.” (Lala 40:6) Kɛfata he lɛ, Yehowa feɔ nibii ni baahã mɛi ni amrɔ nɛɛ amɛleko lɛ lɛ po aná miishɛɛ, ‘ehãa amɛ ŋmaa ni ehãa amɛtsuiiaŋ yimɔɔ obɔ kɛ miishɛɛ.’Bɔfoi lɛ Asaji 14:17.

Wɔkɛ miishɛɛ feɔ nibii wɔhãa mɛi ni wɔsumɔɔ ni wɔbuɔ amɛ lɛ

Akɛni Yehowa yɛ he miishɛɛ akɛ ebaafee nibii ni baahã mɛi krokomɛi aná miishɛɛ hewɔ lɛ, nilee yɛ mli akɛ mɛi ni miisumɔ ni amɛtsɔmɔ Nyɔŋmɔ nanemɛi lɛ hu baafee nibii ni baahã ‘etsui anyɔ emli.’ (Abɛi 27:11) Shi mɛni tuuntu obaanyɛ ofee ni ohã Nyɔŋmɔ aná miishɛɛ? Biblia lɛ hãa hetoo akɛ: “Shi ejurɔfeemɔ kɛ nikee lɛ, nyɛhiɛ akakpaa nɔ; ejaakɛ nakai afɔlei saa Nyɔŋmɔ hiɛ jogbaŋŋ.” (Hebribii 13:16) Ani enɛ tsɔɔ akɛ ejurɔ ni wɔɔfee mɛi kɛ nibii ni wɔɔke mɛi lɛ ji nɔ pɛ ni he hiaa ni esa akɛ wɔfee kɛsa Yehowa hiɛ?

Biblia lɛ kɛɔ akɛ: “Kɛ́ hemɔkɛyeli bɛ lɛ, anyɛŋ Nyɔŋmɔ hiɛ asa.” (Hebribii 11:6) Nɔ ko ni sa kadimɔ waa ji akɛ, “Abraham he Nyɔŋmɔ eye” dani “atsɛ lɛ akɛ Nyɔŋmɔ shieŋtsɛ.” (Yakobo 2:23) Yesu Kristo hu ma nɔ mi akɛ, kɛ́ wɔmiisumɔ ni Nyɔŋmɔ ajɔɔ wɔ lɛ, esa akɛ ‘wɔhe Nyɔŋmɔ nɔ wɔye.’ (Yohane 14:1) No hewɔ lɛ, te ooofee tɛŋŋ oná hemɔkɛyeli ni Nyɔŋmɔ taoɔ ni mɛi ni esumɔɔ ni egbala amɛ kɛba emasɛi lɛ aná lɛ eko? Obaanyɛ oje shishi kɛtsɔ Nyɔŋmɔ Wiemɔ, ni ji Biblia lɛ ni oookase daa lɛ nɔ. Kɛ́ ofee nakai lɛ, ‘obaale nɔ ni ji esuɔmɔnaa nii,’ ni no baahã ole bɔ ni ooofee ‘osa ehiɛ kwraa.’ No sɛɛ lɛ, be ni oyaa nɔ okaseɔ Yehowa he nii babaoo ni okɛ nibii ni okaseɔ yɛ ejalɛ taomɔnii lɛ ahe lɛ tsuɔ nii lɛ, hemɔkɛyeli ni oyɔɔ yɛ emli lɛ baada, ni no baahã etsi ebɛŋkɛ bo kpaakpa.Kolosebii 1:9, 10.