1. Mɛni hewɔ esa akɛ ohã wekukpaa ni yɔɔ okɛ Yehowa teŋ lɛ mli awa be fɛɛ be lɛ?

KƐ́ Yehowa Odasefonyo ní abaptisi lɛ ji bo lɛ, oyɛ nɔ ko ni jara wa waa. No ji wekukpaa ni yɔɔ okɛ Yehowa teŋ lɛ. Shi Satan je lɛ kɛ emuu ni wɔyeee lɛ baanyɛ afite nakai wekukpaa lɛ. No hewɔ ni esa akɛ ohã wekukpaa ni yɔɔ okɛ Yehowa teŋ lɛ mli aya nɔ awa be fɛɛ be lɛ.

2. (a) Kɛ́ akɛɛ wekukpaa kpakpa yɛ mɛi enyɔ ateŋ lɛ, te atsɔɔ tɛŋŋ? (Kwɛmɔ shishigbɛ niŋmaa lɛ.) (b) Mɛni baahã wekukpaa ni yɔɔ wɔ kɛ Yehowa teŋ lɛ mli awa?

² Ani oheɔ oyeɔ akɛ Yehowa yɛ lɛɛlɛŋ? Ani onuɔ he akɛ eji o-Naanyo? Ani obaasumɔ ni wekukpaa ni yɔɔ okɛ lɛ teŋ lɛ mli aya nɔ awa? Kɛ́ nakai lɛ, Yakobo 4:8 lɛ tsɔɔ bo nɔ ni esa akɛ ofee. Ekɛɔ akɛ: “Nyɛtsia nyɛbɛŋkɛa Nyɔŋmɔ, ni ebaatsi ebɛŋkɛ nyɛ.” Wekukpaa ni yɔɔ okɛ Yehowa teŋ lɛ damɔ bo kɛ Yehowa nɔ. * (Kwɛmɔ shishigbɛ niŋmaa lɛ.) Kɛ́  ofee nibii ni baahã obɛŋkɛ Yehowa lɛ, lɛ hu ebaafee nibii ni baahã ebɛŋkɛ bo. Kɛ́ ofee nakai be fɛɛ be lɛ, obaana Yehowa akɛ mɔ ko ni yɔɔ lɛɛlɛŋ, ni wekukpaa ni yɔɔ okɛ lɛ teŋ lɛ mli baawa aahu akɛ, obaanu he taakɛ Yesu nu he lɛ. Ewie akɛ: “Mɔ ni tsu mi lɛ yɛ lɛɛlɛŋ” ni “mile lɛ.” (Yohane 7:28, 29) Shi mɛni ji nibii komɛi ni obaanyɛ ofee koni no aye abua bo ni obɛŋkɛ Yehowa kpaakpa?

3. Te wɔɔfee tɛŋŋ wɔkɛ Yehowa agba sane?

³ Kɛ́ oosumɔ ni otsi obɛŋkɛ Yehowa lɛ, ehe miihia waa ni okɛ lɛ agba sane be fɛɛ be. Shi ani obaanyɛ ofee nakai? Hɛɛ, obaanyɛ. Bo lɛ susumɔ bɔ ni ofeɔ okɛ onaanyo ko ni kɛ bo teŋ jekɛ lɛ gbaa sane lɛ he okwɛ. Ekolɛ nyɛŋmalaa nyɛhe woji yɛ be kɛ beiaŋ, ni nyɛfɔɔ sanegbaa yɛ tɛlifoŋ nɔ. Nakai nɔŋŋ obaanyɛ okɛ Yehowa awie daa kɛtsɔ sɔlemɔ nɔ. (Kanemɔ Lala 142:3.) Shi mɛni obaafee koni Yehowa anyɛ ekɛ bo awie? Kɛ́ okane ewiemɔ ni ji Biblia lɛ daa, ni ojwɛŋ nɔ lɛ, no baatsɔɔ akɛ oohã Yehowa kɛ bo miiwie. (Kanemɔ Yesaia 30:20, 21.) Kɛ́ okɛ Yehowa gba sane lɛ, wekukpaa ni yɔɔ okɛ lɛ teŋ lɛ mli baawa, ni ebaatsɔ o-Naanyo. Nyɛhãa wɔkwɛa nɔ hewɔ.

4, 5. Kɛ́ ookase Biblia lɛ, mɛɛ gbɛ nɔ Yehowa kɛ bo wieɔ? Okɛ enɛ he nɔkwɛmɔnɔ ahã.

⁴ Wɔle akɛ saji ni yɔɔ Nyɔŋmɔ Wiemɔ, ni ji Biblia lɛ mli lɛ yɛ kɛhã mɔ fɛɛ mɔ. Shi ani Biblia lɛ baanyɛ aye abua bo koni obɛŋkɛ Yehowa? Hɛɛ, ebaanyɛ! Ehe miihia ni okane Biblia lɛ daa ni okase hu. Be fɛɛ be ni obaafee nakai lɛ, susumɔ bɔ ni sane ni okaneɔ lɛ kɔɔ ohe ehãa lɛ he. Agbɛnɛ hu, kwɛmɔ bɔ ni obaanyɛ okɛ nɔ ni okaseɔ lɛ atsu nii. Kɛ́ ofee nakai lɛ, no tsɔɔ akɛ oohã Yehowa kɛ bo miiwie. Ni no baahã okɛ lɛ teŋ naanyobɔɔ lɛ mli awa.—Hebribii 4:12; Yakobo 1:23-25.

⁵ Akɛ nɔkwɛmɔnɔ lɛ, Yesu wie akɛ: “Nyɛkpaa jwetrii ni nyɛbɔɔ nyɛhãa nyɛhe yɛ shikpɔŋ lɛ nɔ” lɛ. Kɛ́ okane wiemɔi nɛɛ lɛ, te onuɔ he tɛŋŋ? Kɛ́ oobo ŋaawoo nɛɛ toi, ni okɛ Yehowa miiye klɛŋklɛŋ gbɛhe yɛ oshihilɛ mli lɛ, obaanu he akɛ eyɛ ohe miishɛɛ. Shi  kɛjeee nakai lɛ, obaana akɛ Yehowa miitao eye ebua bo. Obaayɔse akɛ esa akɛ ohã oshihilɛ afee mlɛo, ni ohã Nyɔŋmɔ sɔɔmɔ lɛ afee nɔ ni he hiaa bo titri yɛ shihilɛ mli. Kɛ́ onyɛ otsu enɛ he nii lɛ, obaatsi obɛŋkɛ Yehowa.—Mateo 6:19, 20.

6, 7. (a) Kɛ́ wɔkase Biblia lɛ, mɛɛ gbɛ nɔ enáa suɔmɔ ni wɔyɔɔ kɛhã Yehowa lɛ kɛ suɔmɔ ni eyɔɔ kɛhã wɔ lɛ nɔ hewalɛ? (b) Kɛ́ wɔmiikase Biblia lɛ, mɛni ji oti titri ni esa akɛ wɔkɛma wɔhiɛ?

⁶ Kɛ́ wɔmiikase Biblia lɛ, wɔnaa tsakemɔi ni esa akɛ wɔfee koni wɔnyɛ wɔsɔmɔ Yehowa jogbaŋŋ. Shi jeee no pɛ wɔnaa. Wɔnaa nibii kpakpai ni Yehowa feɔ kɛ esui kpakpai lɛ hu. Enɛ hãa suɔmɔ ni wɔyɔɔ kɛhã lɛ lɛ mli waa, ni suɔmɔ ni lɛ hu eyɔɔ kɛhã wɔ lɛ mli waa. Ni no hãa wekukpaa ni yɔɔ wɔ kɛ lɛ teŋ lɛ mli waa.—Kanemɔ 1 Korintobii 8:3.

⁷ Kɛ́ wɔmiitao wɔbɛŋkɛ Yehowa lɛ, esa akɛ wɔkɛ jwɛŋmɔ ni ja akase Biblia lɛ. Yesu wie akɛ: “Enɛ ji naanɔ wala lɛ, akɛ amɛbaale bo, anɔkwa Nyɔŋmɔ kome lɛ, kɛ Yesu Kristo, mɔ ni otsu lɛ lɛ.” (Yohane 17:3) Nibii kpakpai babaoo yɛ ni wɔbaanyɛ wɔkase yɛ Biblia lɛ mli. Shi kɛ́ wɔmiikane Biblia lɛ, oti titri ni esa akɛ wɔkɛma wɔhiɛ ji, ní wɔle Yehowa jogbaŋŋ akɛ Mɔ ko ni yɔɔ lɛɛlɛŋ.—Kanemɔ 2 Mose 33:13; Lala 25:4.

8. (a) Mɛni ekolɛ mɛi komɛi baasusu yɛ bɔ ni Yehowa kɛ Maŋtsɛ Azaria ye ehã lɛ he? (b) Kɛ́ ole Yehowa lɛ, te obaanu he tɛŋŋ yɛ nibii ni efeɔ lɛ ahe?

⁸ Kɛ́ wɔbale Yehowa, ni wɔna lɛ akɛ wɔ-Naanyo kpakpa lɛ, egbaŋ wɔnaa kɛ́ Biblia lɛ hãaa wɔle nɔ hewɔ ni efee nibii komɛi yɛ gbɛi pɔtɛi komɛi anɔ. Akɛ nɔkwɛmɔnɔ lɛ, yɛ Maŋtsɛmɛi Awolo ni Ji Enyɔ lɛ mli lɛ, wɔkaneɔ Azaria he sane. Be ni Azaria yeɔ Yuda nɔ maŋtsɛ lɛ, maŋbii lɛ já amale nyɔŋmɔi, shi efataaa amɛhe kɛjáaa amale nyɔŋmɔi lɛ. “Efee nɔ ni ja yɛ Yehowa hiɛ.” (2 Maŋtsɛmɛi 15:1-5) Fɛɛ sɛɛ lɛ, Yehowa gbala Azaria toi, ni ehã kpiti shwie lɛ. Mɛni hewɔ? Amaniɛbɔɔ lɛ etsɔɔɔ. No hewɔ lɛ, te onuɔ he ohãa tɛŋŋ yɛ nɔ ni Yehowa fee lɛ he? Ani egbaa onaa? Ani onuɔ he akɛ Yehowa yeee jalɛsane, ni akɛ Azaria efeko nɔ ko ni sa toigbalamɔ? Kɛ́ ole Yehowa jogbaŋŋ lɛ, onuŋ he nakai kɔkɔɔkɔ, ejaakɛ ole akɛ etsɔsemɔ ja be fɛɛ be. Be fɛɛ be lɛ, egbalaa mɔ toi “bɔ ni sa kɛkɛ.” (Yeremia 30:11) No hewɔ lɛ, eyɛ mli akɛ ekolɛ oleee nɔ hewɔ ni Yehowa gbala Azaria toi lɛ moŋ, shi obaanyɛ oná nɔmimaa akɛ Yehowa fee nɔ ni ja.

9. Mɛɛ saji hãa wɔnaa nɔ hewɔ ni Yehowa gbala Azaria toi ni ehã kpiti shwie lɛ lɛ?

⁹ Biblia lɛ hãa wɔleɔ Maŋtsɛ Azaria, ní ale lɛ hu akɛ Maŋtsɛ Uzia lɛ, wala shihilɛ he saji krokomɛi. (2 Maŋtsɛmɛi 15:7, 32) Ehe sane ni yɔɔ 2 Kronika 26:3-5, 16-21 lɛ, hãa wɔleɔ akɛ “efee nɔ ni ja yɛ Yehowa hiɛ.” Shi ehãa wɔleɔ hu akɛ, sɛɛ mli lɛ “etsui wó ehe nɔ ni ehã ehiɛ kpata.” Maŋtsɛ lɛ ka akɛ ebaafee nɔ ko ni esa akɛ osɔfoi pɛ afee. Osɔfoi nyɔŋmai kpaanyɔ kɛ ekome kɛɛ lɛ akɛ, nɔ ni eyaafee lɛ ejaaa, ni amɛbɔ mɔdɛŋ ni amɛtsi enaa. Te Azaria fee enii ehã tɛŋŋ? Henɔwomɔ hã emli fũ amɛ waa! Enɛ hãa wɔnaa nɔ hewɔ ni Yehowa gbala maŋtsɛ lɛ toi, ni ehã kpiti shwie lɛ lɛ.

10. Mɛni hewɔ ehe ehiaaa ni Yehowa agbala nibii fɛɛ ni efeɔ lɛ mli etsɔɔ wɔ lɛ? Mɛni baahã wɔná hiɛkɛnɔfɔɔ babaoo yɛ Yehowa mli akɛ nɔ fɛɛ nɔ ni efeɔ lɛ ja lɛ?

 ¹⁰ Mɛni wɔkaseɔ yɛ sane nɛɛ mli ni he hiaa waa? Biblia lɛ ehã wɔle Maŋtsɛ Azaria he saji krokomɛi, ni no ehã wɔna nɔ hewɔ ni Yehowa gbala etoi lɛ. Shi eji akɛ saji krokomɛi nɛɛ wooo Biblia lɛ mli kulɛ, mɛni obaafee? Ani obaanu he akɛ bɔ ni Yehowa kɛ lɛ ye ehã lɛ ejaaa? Aloo obaadamɔ nɔ ni Biblia tso muu lɛ fɛɛ hãa wɔleɔ yɛ Yehowa he lɛ nɔ oná nɔmimaa akɛ, efeɔ nɔ ni ja be fɛɛ be? (5 Mose 32:4) Kɛ́ obale Yehowa akɛ Mɔ ko ni yɔɔ lɛɛlɛŋ lɛ, suɔmɔ ni oyɔɔ kɛhã lɛ lɛ mli baawa, ni obaaná nɔmimaa akɛ nɔ fɛɛ nɔ ni efeɔ lɛ ja. Enɛ hewɔ lɛ, ehe ebahiaŋ ni egbala nibii fɛɛ ni efeɔ lɛ mli etsɔɔ bo. Be ni oyaa nɔ okaseɔ Biblia lɛ, obaana Yehowa akɛ Mɔ ko ni yɔɔ lɛɛlɛŋ, ni obaabɛŋkɛ lɛ kpaakpa.—Lala 77:13, 14.

11-13. Te wɔfeɔ tɛŋŋ wɔleɔ akɛ Yehowa boɔ sɔlemɔi atoi? (Kwɛmɔ mfoniri ni yɔɔ nikasemɔ lɛ shishijee lɛ.)

¹¹ Sɔlemɔ hãa wɔtsiɔ wɔbɛŋkɛɔ Yehowa. Kɛ́ wɔmiisɔle lɛ, wɔjieɔ eyi, wɔdaa lɛ shi, ni wɔbiɔ lɛ ni eye ebua wɔ. (Lala 32:8) Shi kɛ́ wɔmiitao wɔkɛ Yehowa abɔ naanyo gbagbalii lɛ, esa akɛ wɔná nɔmimaa akɛ eboɔ sɔlemɔi atoi.

¹² Mɛi komɛi kɛɔ akɛ Nyɔŋmɔ booo sɔlemɔi atoi, ni akɛ sɔlemɔ hãa mɔ tsui nyɔɔ emli kɛkɛ. Amɛheɔ amɛyeɔ akɛ kɛ́ osɔle yɛ naagba ko he lɛ, nɔ pɛ ni sɔlemɔ lɛ feɔ ji, eyeɔ ebuaa bo ni osusuɔ naagba lɛ he jogbaŋŋ, ni bo diɛŋtsɛ otaoɔ enaa tsabaa. Anɔkwa, wɔle akɛ sɔlemɔ baanyɛ aye abua wɔ yɛ gbɛi nɛɛ anɔ. Kɛ̃lɛ, wɔle hu akɛ Yehowa boɔ wɔsɔlemɔi atoi. Te wɔfeɔ tɛŋŋ wɔleɔ enɛ?

 ¹³ Susumɔ enɛ he okwɛ: Dani Yesu baaba shikpɔŋ lɛ nɔ lɛ, ena bɔ ni Yehowa boɔ etsuji ni yɔɔ shikpɔŋ lɛ nɔ lɛ asɔlemɔi atoi. Be ni Yesu yɔɔ shikpɔŋ lɛ nɔ lɛ, esɔle ehã e-Tsɛ ni yɔɔ ŋwɛi lɛ, ni ehã ele esusumɔi kɛ bɔ ni enuɔ he ehãa. Be ko po lɛ, esɔle nyɔɔŋ muu fɛɛ. (Luka 6:12; 22:40-46) Eji Yehowa booo sɔlemɔi atoi kulɛ, ani Yesu baafee nakai? Agbɛnɛ hu, Yesu tsɔɔ esɛɛnyiɛlɔi lɛ ni amɛsɔle. Eji Yehowa booo sɔlemɔi atoi kulɛ, ani Yesu baakɛɛ amɛ ni amɛsɔle? Ekã shi faŋŋ akɛ, efeŋ nakai. Yesu le akɛ Yehowa boɔ sɔlemɔi atoi. Be ko po lɛ, ekɛɛ akɛ: “Ataa, miida bo shi akɛ obo mi toi. Anɔkwa, mile akɛ oboɔ mi toi daa.” Wɔ hu wɔbaanyɛ wɔná nɔmimaa akɛ Yehowa boɔ wɔsɔlemɔi atoi.—Yohane 11:41, 42; Lala 65:3.

14, 15. (a) Kɛ́ wɔtsĩ nibii pɔtɛi ni wɔtaoɔ lɛ atã yɛ wɔsɔlemɔi amli lɛ, mɛɛ gbɛ nɔ wɔnáa he sɛɛ? (b) Mɛɛ gbɛ nɔ Kathy sɔlemɔi lɛ ye ebua lɛ ni etsi ebɛŋkɛ Yehowa?

¹⁴ Eyɛ mli akɛ jeee be fɛɛ be obaana faŋŋ akɛ Yehowa ehã osɔlemɔ ko hetoo moŋ, shi kɛ́ otsĩ nibii pɔtɛi ni otaoɔ lɛ atã otsɔɔ lɛ yɛ sɔlemɔ mli lɛ, ewaaa akɛ obaana akɛ ehã osɔlemɔ lɛ hetoo. Ni kɛ́ ona hetoo lɛ faŋŋ lɛ, no baahã ona Yehowa akɛ Mɔ ko ni yɔɔ lɛɛlɛŋ. Kɛ́ ohã Yehowa le nɔ fɛɛ nɔ ni gbaa onaa lɛ, ebaatsi ebɛŋkɛ bo.

¹⁵ Akɛ nɔkwɛmɔnɔ lɛ, no mli lɛ nyɛmi yoo ko ni atsɛɔ lɛ Kathy lɛ fɔɔ shiɛmɔ yaa, shi enáaa miishɛɛ yɛ mli. * (Kwɛmɔ shishigbɛ niŋmaa lɛ.) Ewie akɛ: “No mli lɛ, minyaaa shiɛmɔ nitsumɔ lɛ he. Miitsɔɔ akɛ, yɛ mitsui mli lɛ minyaaa he.” Be ni eba nitsumɔ mli hejɔɔmɔ lɛ, asafoŋ onukpa ko wo lɛ  hewalɛ ni esɔmɔ akɛ daa gbɛgbalɔ. Kathy wie akɛ: “Ehã mi gbɛbimɔ wolo po. Mikpɛ miyiŋ akɛ matsɔ gbɛgbalɔ, shi mibɔi sɔlemɔ hu koni Yehowa ahã manya shiɛmɔ nitsumɔ lɛ he, ni mifee enɛ gbi fɛɛ gbi.” Ani Yehowa bo esɔlemɔi lɛ atoi? Hɛɛ, ebo lɛ toi. Amrɔ nɛɛ Kathy kɛ afii etɛ esɔmɔ akɛ gbɛgbalɔ. Ewie akɛ: “Akɛni miyeɔ be babaoo yɛ shiɛmɔ nitsumɔ lɛ mli, ni mikaseɔ nii kɛjɛɔ nyɛmimɛi yei lɛ adɛŋ hewɔ lɛ, fiofio lɛ, mihe esa kɛ shiɛmɔ. Ŋmɛnɛ lɛ, jeee akɛ minyaa shiɛmɔyaa he kɛkɛ, shi misumɔɔ diɛŋtsɛ. Nɔ ni fe fɛɛ lɛ, wekukpaa ni yɔɔ mi kɛ Yehowa teŋ lɛ mli ewa fe tsutsu lɛ.” Kathy sɔlemɔi lɛ ye ebua lɛ ni etsi ebɛŋkɛ Yehowa.

16, 17. (a) Mɛni esa akɛ wɔfee koni wekukpaa ni yɔɔ wɔ kɛ Yehowa teŋ lɛ mli aya nɔ awa? (b) Mɛni he wɔbaasusu yɛ nikasemɔ ni nyiɛ sɛɛ lɛ mli?

¹⁶ Wɔbaanyɛ wɔya nɔ wɔtsi wɔbɛŋkɛ Yehowa kɛya naanɔ. No hewɔ lɛ, nyɛhãa wɔboa lɛ toi be fɛɛ be kɛtsɔ Biblia lɛ ni wɔɔkase daa lɛ nɔ, ní wɔya nɔ wɔkɛ lɛ awie kɛtsɔ sɔlemɔ nɔ. Kɛ́ wɔfee nakai lɛ, wekukpaa ni yɔɔ wɔ kɛ lɛ teŋ lɛ mli baaya nɔ awa, ni enɛ baaye abua wɔ ni wɔnyɛ wɔkpee shihilɛi ni jaraa anaa.

¹⁷ Bei komɛi lɛ, eyɛ mli akɛ wɔsɔle yɛ naagba ko ni wɔkɛkpeɔ lɛ he aahu moŋ, shi afũ ma he ni ema. Kɛ́ eba lɛ nakai lɛ, ekolɛ wɔkɛ wɔhiɛ efɔŋ Yehowa nɔ dɔŋŋ, wɔbaanu he akɛ ebooo wɔsɔlemɔi atoi, ni wɔyiŋ baafee wɔ kɔshikɔshi kɛji wɔji enanemɛi lɛɛlɛŋ. Kɛ́ okɛ shihilɛ ni tamɔ nakai kpe lɛ, mɛni obaanyɛ ofee? Nikasemɔ ni nyiɛ sɛɛ lɛ baaye abua bo.