2 Mose 33:1-23

  • Wiemɔ ni Nyɔŋmɔ kɛjaje amɛ (1-6)

  • Kpee buu lɛ yɛ nsara lɛ sɛɛ (7-11)

  • Mose bi ní ahã ena Yehowa anunyam lɛ (12-23)

33  Yehowa tee nɔ ekɛɛ Mose akɛ: “Yi mli ní oje biɛ, ní okɛ maŋ ni onyiɛ amɛhiɛ* kɛshi Ejipt shikpɔŋ lɛ nɔ lɛ aya. Nyɛyaa shikpɔŋ ni mikã Abraham kɛ Isak kɛ Yakob kitã yɛ he akɛ, ‘Oseshi lɛ mikɛbaahã’ lɛ nɔ.+  Matsu bɔfo ko kɛnyiɛ nyɛhiɛ,+ ni mashwie Kanaanbii, Amorbii, Hitbii, Perizbii, Hivbii, kɛ Yebusbii lɛ.+  Nyɛyaa* shikpɔŋ ni mliki kɛ wo hoɔ yɛ nɔ lɛ nɔ.+ Shi mihiŋ nyɛteŋ kɛyaŋ, ejaakɛ maŋ ni kuɛŋ ti ji nyɛ,+ ni ekolɛ mabule nyɛshishi yɛ gbɛ lɛ nɔ.”+  Be ni maŋ lɛ nu wiemɔ ni yɔɔ dɔlɛ nɛɛ, amɛbɔi awerɛho yeli, ni amɛteŋ mɔ kome folo po wooo ehewulamɔ nibii.  Yehowa kɛɛ Mose akɛ: “Kɛɛmɔ Israelbii lɛ akɛ, ‘Maŋ ni kuɛŋ ti ji nyɛ.+ Manyɛ makpa nyɛteŋ yɛ hiŋmɛitswaa kome mli ní mabule nyɛshishi.+ No hewɔ lɛ, agbɛnɛ, be mli ni mikwɛɔ nɔ ni mafee nyɛ lɛ, nyɛkawoa nyɛhewulamɔ nibii lɛ.’”  No hewɔ lɛ, kɛjɛ Horeb Gɔŋ lɛ he kɛyaa lɛ, Israelbii lɛ wooo* amɛhewulamɔ nibii lɛ.  Agbɛnɛ, Mose jie emama tsũ lɛ ni eyafee yɛ nsara lɛ sɛɛ, yɛ he ko ni kɛ nsara lɛ teŋ jekɛ fioo, ni etsɛ lɛ kpee buu. Mɔ fɛɛ mɔ ni miitao ebi Yehowa nii+ lɛ yaa kpee buu lɛ naa yɛ nsara lɛ sɛɛ.  Kɛ́ Mose je kpo kɛmiiya kpee buu lɛ mli nɔŋŋ lɛ, maŋbii lɛ fɛɛ teɔ shi ni amɛdamɔɔ amɛ diɛŋtsɛ amɛmama tsũi lɛ shinai lɛ anaa, ni amɛkwɛɔ Mose yisɛɛ aahu kɛyashiɔ eboteɔ kpee buu lɛ mli.  Kɛ́ Mose bote kpee buu lɛ mli nɔŋŋ lɛ, atatu ni damɔ shi jaŋŋ+ lɛ kpelekeɔ shi ni ebadamɔɔ kpee buu lɛ shinaa lɛ naa, ni Nyɔŋmɔ kɛ Mose wieɔ.+ 10  Kɛ́ maŋbii lɛ fɛɛ na atatu ni damɔ shi jaŋŋ lɛ yɛ kpee buu lɛ shinaa lɛ naa lɛ, amɛteŋ mɔ fɛɛ mɔ teɔ shi ni emaa ehiɛ shi yɛ lɛ diɛŋtsɛ emama tsũ lɛ shinaa lɛ naa. 11  Yehowa kɛ Mose wieɔ hiɛ kɛ hiɛ,+ tamɔ bɔ ni gbɔmɔ kɛ enyɛmi gbɔmɔ wieɔ lɛ nɔŋŋ. Kɛ́ Mose ku esɛɛ kɛtee nsara lɛ mli lɛ, Yoshua,+ Nun bi lɛ, ni ji esɔɔlɔ kɛ etsulɔ lɛ,+ shiii kpee buu lɛ naa. 12  Agbɛnɛ, Mose kɛɛ Yehowa akɛ: “Naa, okɛɛ mi akɛ, ‘Nyiɛmɔ maŋ nɛɛ hiɛ kɛya,’* shi ohãko male mɔ ni obaahã efata mihe kɛya. Agbɛnɛ hu, okɛɛ akɛ, ‘Mile bo kɛ ogbɛ́i,* ni ohiɛ hu eba nyam yɛ mihiɛ.’ 13  Ofainɛ, kɛ́ mihiɛ eba nyam yɛ ohiɛ lɛ, hã male ogbɛi* lɛ,+ koni male bo ní mihiɛ aya nɔ aba nyam yɛ ohiɛ. Agbɛnɛ hu, kaimɔ akɛ maŋ nɛɛ, omaŋ ni.”+ 14  No hewɔ lɛ, Nyɔŋmɔ kɛɛ:* “Mi diɛŋtsɛ mikɛ bo baaya,*+ ni mahã oná hejɔlɛ.”+ 15  Kɛkɛ ni Mose kɛɛ lɛ akɛ: “Kɛ́ bo diɛŋtsɛ okɛ wɔ eyaaa* lɛ, no lɛ, kaahã wɔshi biɛ. 16  Te aaafee tɛŋŋ ní aaale akɛ mi kɛ omaŋ lɛ hiɛ eba nyam yɛ ohiɛ lɛ? Ani jeee ja okɛ wɔ etee dã+, koni ana akɛ esoro mi kɛ omaŋ lɛ yɛ maji krokomɛi fɛɛ ni yɔɔ shikpɔŋ lɛ nɔ lɛ ahe?”+ 17  Yehowa tee nɔ ekɛɛ Mose akɛ: “Mafee nɔ ni obi mi nɛɛ hu, ejaakɛ ohiɛ eba nyam yɛ mihiɛ, ni mile bo kɛ ogbɛ́i.” 18  Kɛkɛ ni Mose kɛɛ: “Ofainɛ, hã mana onunyam lɛ.” 19  Shi ekɛɛ: “Mahã ekpakpa ni mifeɔ lɛ fɛɛ abaho yɛ ohiɛ, ni majaje Yehowa gbɛ́i lɛ yɛ ohiɛ;+ ni madro mɔ ni misumɔɔ ni madro, ni mana mɔ ni misumɔɔ ni mana lɛ mɔbɔ lɛ mɔbɔ.”+ 20  Ni ekɛɛ kɛfata he akɛ: “Onyɛŋ mihiɛ ona, ejaakɛ gbɔmɔ ko gbɔmɔ ko enaŋ mi ní eyi aaaná wala.” 21  Yehowa tee nɔ ekɛɛ: “Gbɛ yɛ mimasɛi yɛ biɛ. Daamɔ tɛsaa lɛ nɔ. 22  Kɛ́ minunyam lɛ miiho lɛ, mikɛ bo baawo fɔlɔ ko mli yɛ tɛsaa lɛ mli, ni mikɛ minine baatsĩ onɔ kɛyashi maho. 23  No sɛɛ lɛ, majie minine, ni obaana misɛɛ. Shi mihiɛ lɛ, anaaa.”+

Shishigbɛ Niŋmaa

Loo “onyiɛ amɛhiɛ kɛkwɔ.”
Loo “Nyɛkwɔa kɛyaa.”
Hebri sht. ŋm., “jiejie.”
Loo “kɛkwɔ kɛya.”
Loo “Mihala bo.”
Loo “onifeemɔi.”
Hebri sht. ŋm., “ekɛɛ.”
Hebri sht. ŋm., “Mihiɛ kɛ bo baaya.”
Hebri sht. ŋm., “Kɛ́ ohiɛ kɛ wɔ eyaaa.”