2 Kronika 26:1-23

  • Uzia batsɔ Yuda maŋtsɛ (1-5)

  • Tai ni Uzia wu (6-15)

  • Kpiti shwie henɔwolɔ Uzia (16-21)

  • Uzia gbele (22, 23)

26  Kɛkɛ ni Yuda maŋ muu lɛ fɛɛ mɔ Uzia*+ ni amɛwó lɛ maŋtsɛ yɛ etsɛ Amazia sɛɛ; no mli lɛ, eye afii 16.+  Etswa Elot+ maŋ lɛ ekoŋŋ ni esaa ekɛhã Yuda be ni maŋtsɛ* lɛ egbo* lɛ sɛɛ.+  Be ni Uzia+ batsɔ maŋtsɛ lɛ, no mli lɛ, eye afii 16, ni eye nɔ afii 52 yɛ Yerusalem. Atsɛɔ emami Yekolia, ni ejɛ Yerusalem.+  Etee nɔ efee nɔ ni ja yɛ Yehowa hiɛ tamɔ bɔ ni etsɛ Amazia fee lɛ pɛpɛɛpɛ.+  Ni etee nɔ etao Nyɔŋmɔ sɛɛ gbɛ yɛ Zakaria, mɔ ni tsɔɔ lɛ ni eshe anɔkwa Nyɔŋmɔ lɛ gbeyei lɛ gbii lɛ amli. Be ni etaoɔ Yehowa sɛɛ gbɛ lɛ, anɔkwa Nyɔŋmɔ lɛ jɔɔ lɛ.+  Etee ni ekɛ Filistibii+ lɛ yawu ni ekumɔ Gat+ gbogbo lɛ, kɛ Yabne+ gbogbo lɛ, kɛ Ashdod gbogbo lɛ. Kɛkɛ ni eto maji yɛ Ashdod+ kpokpaa lɛ nɔ kɛ agbɛnɛ hu yɛ Filistibii lɛ ashikpɔŋ lɛ nɔ hei krokomɛi.  Anɔkwa Nyɔŋmɔ lɛ tee nɔ eye ebua lɛ ni eye Filistibii lɛ, kɛ Arabiabii+ ni yɔɔ Gurbaal lɛ, kɛ Meunbii lɛ anɔ kunim.  Amonbii+ lɛ kɛ nikeenii* bahãa Uzia. Fiofio lɛ, egbɛ́i jije kɛtee Ejipt tɔ̃ɔ, ejaakɛ ená hewalɛ waa.  Agbɛnɛ hu, Uzia mamɔ mɔji+ yɛ Yerusalem Koŋ Agbó+ lɛ he, kɛ Jɔɔ Agbó+ lɛ he, kɛ Gbogbo Sɛɛ Akulashiŋ lɛ nɔ, ni ewaje amɛ. 10  Agbɛnɛ hu, emamɔ mɔji+ yɛ ŋa lɛ nɔ, ni etsa* bui ni akɛtoɔ nu (ejaakɛ no mli lɛ, eyɛ kooloi babaoo); efee nakai nɔŋŋ yɛ Shefela lɛ, kɛ ŋa kplanaa lɛ nɔ. Eyɛ okwaafoi kɛ waintromsaalɔi yɛ gɔji lɛ anɔ kɛ Karmel, ejaakɛ esumɔɔ okwaayeli waa. 11  Agbɛnɛ hu, Uzia yɛ asraafoi ni awula amɛ kɛhã ta. Amɛyaa ta, ni ato amɛ kuikui. Yeiel, woloŋmalɔ+ lɛ, kɛ Maaseia, nɔkwɛlɔ lɛ kane amɛ ni amɛŋma amɛgbɛ́i+ yɛ maŋtsɛ lɛ lumɛi lɛ ateŋ mɔ kome ni atsɛɔ lɛ Hanania lɛ famɔ naa. 12  Tsɛmɛi ashĩai onukpai ni kwɛɔ tawulɔi kãkãlɔi nɛɛ anɔ lɛ ayibɔ ji 2,600. 13  Asraafoi ni amɛkwɛɔ amɛnɔ lɛ ayibɔ ji hii 307,500 ni asaa amɛ kɛhã ta, amɛji asraafoi ni he wala ni wuɔ ta amɛshiɔ maŋtsɛ lɛ henyɛlɔi lɛ.+ 14  Uzia wula asraafoi lɛ fɛɛ kɛ tsɛŋi, kɛ akpɔlɔi,+ kɛ fai, kɛ damai,+ kɛ gãii, kɛ akromia tɛi.+ 15  Agbɛnɛ hu, ehã ŋaalɔi fee tsɔji ni akɛwuɔ ta yɛ Yerusalem; akɛ tsɔji nɛɛ mamɔ mɔji+ lɛ kɛ gbogboi lɛ akoji lɛ anɔ, ni anyɛɔ akɛ tsɔji nɛɛ tsɛ̃ɔ gãimlibii, ni anyɛɔ akɛfɔ̃ɔ tɛi wuji hu. No hewɔ lɛ, egbɛ́i jije kɛtee shɔŋŋ diɛŋtsɛ, ejaakɛ aye abua lɛ waa, ni ená hewalɛ. 16  Shi be ni ená hewalɛ lɛ nɔŋŋ lɛ, etsui wó ehe nɔ, ni no kɛ lɛ tee hiɛkpatamɔ mli, ni etɔ̃ Yehowa, e-Nyɔŋmɔ lɛ nɔ, ejaakɛ etee Yehowa sɔlemɔ shĩa lɛ koni eyashã tsofa-kɛ-ŋma yɛ tsofa-kɛ-ŋma afɔleshaa latɛ lɛ nɔ.+ 17  Kɛkɛ ni osɔfo Azaria kɛ Yehowa osɔfoi 80 krokomɛi ni yɔɔ ekãa yi esɛɛ. 18  Amɛtsĩ Maŋtsɛ Uzia gbɛ, ni amɛkɛɛ lɛ akɛ: “Uzia, jeee onitsumɔ ji oshã tsofa-kɛ-ŋma ohã Yehowa!+ Osɔfoi lɛ pɛ afee amɛ krɔŋkrɔŋ akɛ amɛshã tsofa-kɛ-ŋma, ejaakɛ Aaron seshibii ji amɛ.+ Jee kpo kɛje jamɔhe lɛ, ejaakɛ ootɔ̃, ni Yehowa, o-Nyɔŋmɔ lɛ, woŋ ohiɛ nyam yɛ enɛ he.” 19  Shi Uzia, ni no mli lɛ ehiɛ tsofa-kɛ-ŋma shãanɔ yɛ edɛŋ ni eeba ebashã tsofa-kɛ-ŋma lɛ mli wo la;+ ni be ni emli wo la ewo osɔfoi lɛ, kpiti+ shwie ehiɛnaa yɛ osɔfoi lɛ ahiɛ yɛ Yehowa shĩa lɛ yɛ tsofa-kɛ-ŋma afɔleshaa latɛ lɛ masɛi. 20  Be ni osɔfonukpa Azaria kɛ osɔfoi lɛ fɛɛ yaakwɛ Uzia hiɛ lɛ, naa, kpiti eshwie ehiɛnaa sakoo! Ni amɛshwie lɛ kɛje jɛmɛ oya nɔŋŋ, ni lɛ diɛŋtsɛ hu ehe fee oya kɛje kpo, ejaakɛ Yehowa egbala etoi.* 21  Maŋtsɛ Uzia ye kpiti kɛyashi gbi ni egbo, ni ehi shĩa kroko mli akɛ kpitiyelɔ,+ ejaakɛ ahãaa ebote Yehowa shĩa lɛ. Ebinuu Yotam ji mɔ ni kwɛɔ maŋtsɛ shĩa lɛ nɔ, ni ekojoɔ shikpɔŋ lɛ nɔ bii lɛ.+ 22  Uzia shihilɛ mli saji krokomɛi fɛɛ, kɛjɛ shishijee kɛyashi naagbee lɛ, gbalɔ Yesaia,+ Amoz binuu lɛ ji mɔ ni ŋmala. 23  Kɛkɛ ni Uzia gbo,* ni afu lɛ yɛ etsɛmɛi lɛ amasɛi, shi yɛ maŋtsɛmɛi lɛ ashikpɔŋ nɔ, ejaakɛ amɛkɛɛ akɛ: “Kpitiyelɔ ji lɛ.” Ni ebinuu Yotam+ baye maŋtsɛ yɛ esɛɛ.

Shishigbɛ Niŋmaa

Atsɛɔ lɛ Azaria hu.
Ni ji, etsɛ Amazia.
Loo “kɛ etsɛmɛi lɛ eyawɔ.”
Eeenyɛ efee akɛ, “nikeenii” nɛɛ ji maŋ too ko ni Uzia biɔ yɛ amɛdɛŋ.
Loo “ekpɛ́.”
Loo “Yehowa eta ehe.”
Loo “kɛ etsɛmɛi lɛ yawɔ.”